اپتا باسىنداعى جاعىمدى جاڭالىق. بۇگىن، جەلتوقساننىڭ 23-ءى جاركەنت قالاسىنداعى پانفيلوۆ اۋداندىق سوتى قىتايدان قاشىپ كەلگەن، قىلمىستىق كودەكستىڭ 392-بابى، ياعني «شەكارانى زاڭسىز كەسىپ ءوتۋ» بابى بويىنشا ايىپتالعان ەتنيكالىق قازاق قايشا اقاننىڭ ءىسى تۋرالى ۇكىم شىعاردى.

ازاتتىقتىڭ حابارلاۋىنشا، سۋديا ەلميرا اسۋباەۆا قايشا اقاندى قىتايعا قايتارماي، قازاقستاندا قالدىرىپ، التى اي شارتتى جازاعا كەستى.

سوت قىتايدان قاشىپ كەلگەن قانداستىڭ ءوز قىلمىسىنا شىن وكىنەتىنىن، ءىسىن مويىنداعانىن ەسكەرە وتىرىپ، شارتتى جازانى التى اي پروباتسيالىق باقىلاۋمەن الماستىردى. سۋديا شەشىم شىعاراردا اقاننىڭ قازاقستان ازاماتىنا تۇرمىسقا شىققانىن، ەتنيكالىق قازاق ەكەنىن، پانا ىزدەۋشى كۋالىگى بارىن، بوسقىن مارتەبەسىن سۇراعانىن، قازاقستان ازاماتىن الۋعا باسىم قۇقىعى بارىن، قىتايدا ەشقانداي قىلمىس جاساماعانىن، قىتايدان قازاقستانعا بىرنەشە رەت وتە الماعانىن ەسكەرگەن.

بۇگىنگى وتىرىستىڭ ءجارىسسوز كەزىندە پروكۋرور ارزىگۇل يمياروۆا سۋديادان شىڭجاڭ قازاعىن قىتايعا قايتارماۋدى، التى اي پروباتسيالىق باقىلاۋ تاعايىنداۋدى، جوعارىدا اتالعان ارگۋمەنتتەردى ەسكەرۋىن سۇراعان. ايىپتالۋشىنىڭ ءوزى دە سوتتان قىتايعا قايتارماۋدى جانە باس بوستاندىعىنان ايىرماۋدى وتىنگەن. بۇعان دەيىن ءدال وسىنداي ايىپپەن شەكارانى كەسىپ وتكەن سايراگۇل ساۋىتباي ىسىندە دە پروكۋرور يمياروۆا ونى قازاقستان اۋماعىنان شىعارماۋدى، جازاسىن جەڭىلدەتىپ، سوت زالىنان بوساتۋدى سۇراعان بولاتىن.

قاراشاداعى سوت وتىرىسىندا 43 جاستاعى قايشا اقان «قىتايداعى قىسىمنان سەسكەنىپ، شەكارانى زاڭسىز كەسىپ وتۋگە ءماجبۇر بولعانىن مويىنداعان». ايتۋىنشا، قازاقستانعا بىلتىر مامىردا قورعاس كەدەن بەكەتىنەن ساۋداگەر ايەلدەرمەن ىلەسە وتكەن.

سايراگۇل مەن قايشاعا "ەرەكشە ىقىلاسپەن" قاراعان پروكۋرور پروكۋرور ارزىگۇل يمياروۆا. فوتو: ازاتتىق

دەسەك تە جارتى جىلدان كەيىن ۋاقىتشا پانا تاپقان قايشا اقاننىڭ جاعدايى قالاي بولارى انىق ەمەس. مەرزىمى اياقتالىپ، امالى تاۋسىلعان سايراگۇل بيىل جازدا شۆەتسياعا قونىس اۋدارعان ەدى.

“The Qazaq Times”