الماتىنىڭ ەكس-اكىمى ۆيكتور حراپۋنوۆ ءوزىنىڭ facebook پارىعىندا شۆەيتساريالىق Tribune de Genève  باسىلىمىنا بەرگەن سۇحباتىن ءبولىسىپ، وزىنە قاتىستى سوت ىستەرى تۋرالى مالىمدە جاسادى.

 حراپۋنوۆ ينتەرۆيۋىندە شۆەيتساريادا وزىنە قارسى قوزعالعان قىلمىستىق ءىستىڭ اياقتالعانى تۋرالى مالىمدەدى. ول «جۇزدەگەن ميلليون دوللاردى جىمقىردى» دەگەن كۇدىككە ىلىككەن ەدى. دەسە دە جەتى جىلعا سوزىلعان اتىشۋلى ىسكە قاتىستى وتكەن ايدا Reuters اقپارات اگەنتتىگى جەنەۆا پروكۋراتۋراسىنىڭ وعان تاعىلعان ايىپتى الىپ تاستاعاننىن حابارلاعان بولاتىن.

«جەتى جىل بويى ءبىز شۆەيتساريانىڭ سوت تورەلىگى تاراپىنان بولعان ءۇنسىز تۇقىرتۋ ماقساتىن ءاردايىم ايىپتادىق. جەتى جىل – ۇزاق ۋاقىت. شۆەيتساريادا باستالعان قۋعىن-سۇرگىندى ەسكە تۇسىرگەندە، قالايشا اشۋلانبايسىڭ؟ بىرنەشە اپتا جاۋاپ الۋعا كەيدە وسى جەنەۆادا رەجيم اگەنتتەرى قاتىسادى. ەكستراديتسيادان قورىققان جىلدارى قازاقستان بىزگە قارسى بار كۇشىن پايدالاندى. ءتىپتى شۆەيتساريا پارلامەنتىن اينالىپ ءوتىپ، رەجيم جاقتاۋشىلارى مەنى جەنەۆادا ۇستاپ، ۇرلاپ اكەتۋگە تىرىستى»، – دەيدى ەكس-الماتىلىق.

حراپۋنوۆ ءوزىن «زاڭسىز بايىعان اۋقاتتى كاسىپكەر» ەمەس، كەڭەس كەزدە ءوز ەڭبەگىمەن كوتەرىلگەن ەلەكتريك دەپ سانايتىنىن ايتقان. ول ءوزىنىڭ «شىنايى بەينەسىن» سيپاتتاۋعا تىرىستى:

«مەن كاسىپكەر ەمەسپىن. مەن كەڭەس داۋىرىندەگى مانساپ ساتىسىنىڭ بارلىعىنان ءوتىپ، مينيستر بولىپ، سودان كەيىن ءومىرىمنىڭ وتىز بەس جىلىن الماتى قالاسىنا ارناعان ەلەكتريك بولىپ قالا بەرەمىن. ءيا، بارلىق جوعارى لاۋازىمدى شەنەۋنىكتەر سياقتى، تاۋەلسىزدىك العاننان كەيىن مەن دەموكراتيالىق بولاشاققا سەندىم. بىراق وپپوزيتسيا ليدەرلەرىنىڭ، ونىڭ ىشىندە الماتىدا مەنەن بۇرىن اكىم بولعان دوسىم زامانبەك نۇرقادىلوۆتىڭ ولىمىنەن كەيىن بۇل رەجيمگە قىزمەت ەتە المادىم»، – دەدى.

سونىمەن قوسا حراپۋنوۆ شۆەيتساريا بيلىگىنىڭ وزىنە قارسى ءىس قوزعاعانىنا ەش رەنجىمەيتىنىن جانە الداعى ۋاقىتتا ەلگە ورالاتىنى تۋرالى ءسوز ەتتى. ول ءوز ءسوزىن «مەن پاتريوت بولىپ قالا بەرەمىن. كۇندەردىڭ ءبىر كۇنى ەلگە ورالىپ، قازاقستاندا تۇبەگەيلى رەفورمالاردى باستاۋ ءۇشىن بيلىككە كەلەتىن قازاق جاستارىنا پايدام تيەدى دەپ ۇمىتتەنەمىن»، – دەپ تۇيىندەدى.

بىلتىر كۇزدە الماتىنىڭ قىلمىستىق ىستەر جونىندەگى ماماندانداندىرىلعان اۋدانارالىق سوتى ونى «قىزمەتىن اسىرا پايدالانا وتىرىپ، جەمقورلىقپەن اقشا جىمقىرۋ» ايىبىمەن كىنالى دەپ تاۋىپ، سىرتتاي 17 جىلعا سوتتاعان. سونداي-اق سوت ونىڭ ايەلى لەيلا حراپۋنوۆانى دا سىرتتاي 14 جىلعا ۇكىم وقىپ، وتباسلىق ورتاق مۇلىكتەرىن تاركىلەۋگە شەشىم شىعارعان. قازىر ەرلى-زايىپتى حراپۋنوۆتار شۆەيتساريادا تۇرادى.

شۆەيتساريالىق "Tribune de Genève" گازەتىندە جاريالانعان حراپۋنوۆتىڭ "قازاقستان رەجيمى شۆەيتسريالىق سوتتى مانيپۋلياتسيالاماق بولدى" ماقالاسى. فوتو: اشىق دەرەككوز

"The Qazaq Times"