كورنەكى كوللاج. ءبىلىم ءمينيسترى اسحات ايماعامبەتوۆ پەن ۆەدومستۆو رەيتينگىسىندەگى ساپاسى تومەن وقۋ ورنىنىڭ ءبىرى استانا ۋنيۆەرسيتەتى. فوتو: اشىق دەرەككوزدەردەن

ءبىلىم جانە عىلىم مينيسترلىگى قازاقستاندىق 10 جوعارى وقۋ ورنىنىڭ ليتسەنزياسىن توقتاتتى.

«مۇنىڭ الدىندا ءبىز بەس جوو-نىڭ ليتسەنزياسى توقتاتىلعانىن حابارلاعان بولاتىنبىز. قازىر ءبىز جوو-لاردا قوسىمشا تەكسەرىس جۇرگىزىپ جاتىر. سول تەكسەرىستىڭ ناتيجەسى بويىنشا ءبىز شەشىم قابىلدادىق، تاعى بەس جوو-نىڭ ليتسەنزياسىن توقتاتامىز. زاڭ بويىنشا ول جوو-لار بۇل شەشىمگە ون كۇن ىشىندە شاعىم تۇسىرە الادى. سوندىقتان دا بىزگە قازىر ۋاقىت كەرەك، شامامەن 10 كۇندەي. سول ۋاقىتتى كۇتەمىز. شاعىم تۇسپەسە، ناقتى قاي جوو-لاردىڭ ليتسەنزياسى توقتاتىلعانىن ايتا الامىز»، – دەدى ءبىلىم جانە عىلىم ءمينيسترى اسحات ايماعامبەتوۆ.

سونداي-اق  ۆەدومستۆو باسشىسى ەلدەگى وقۋ ورىندارىنىڭ قانداي ەرەجەلەر بۇزاتىنىن ايتىپ ءوتتى. «ءبىز جوو-لاردىڭ ۇبت سەرتيفيكاتىنسىز وقۋعا قابىلداپ جاتقانىن كوردىك. بۇل ءبىلىم ساپاسىنىڭ قانداي ەكەنىن بىلدىرەدى. بۇدان بولەك، ستۋدەنتتەردىڭ ساباق بارمايتىنىن، بىراق ەمتيحانداردان ءوتىپ، ديپلومدارىن الىپ جاتقانىن بىلەمىز. ارينە، ءبىز، مەملەكەتتىك ورگان رەتىندە مۇندايعا جول بەرە المايمىز. سوندىقتان قاتاڭ شارالار قابىلداپ جاتىرمىز. بىرنەشە كۇننەن كەيىن ليتسەنزياسى توقتاتىلعان 10 جوو-نى اتاپ بەرەمىز»، – دەدى مينيستر.

سوڭعى كەزدەرى ءبىلىم مينيسترلىگى قوعامدا مونوپوليا مەن كوررۋپتسيا  وشاعى رەتىندە كوپ سىنالاتىن ارناۋلى جانە جوعارى وقۋ ورىندارىنىڭ ماسەلەسىنە شىنداپ كىرىسىپ، ءجيى كوتەرىپ كەلەدى. قوعامدىق بەلسەندىلەر اتالعان ليبەرالدى باعداردىڭ «سوڭى سۇيىلىپ كەتپەسە ەدى» دەپ الاڭداۋشىلىق تانىتادى.

كەشە ورتالىق كوممۋنيكاتسيالار قىزمەتىندە وتكەن بريفينگتە مينيسترلىككە قاراستى باقىلاۋ كوميتەتىنىڭ توراعاسى گۇلزات كوبەنوۆا جوو-داعى ءبىلىم بەرۋ باعدارلامالارىنىڭ 73%-ى جۇمىس بەرۋشىلەردىڭ سۇرانىسىنا ساي كەلمەيتىنىن. ونىڭ سوزىنشە، 60-تام استام جوعارى وقۋ ورنى جۇمىسسىزدار جاساعىن دايىندايدى.

ۆەدومستۆو تاپسىرىسى بويىنشا «اتامەكەن» ۇلتتىق كاسىپكەرلىك پالاتاسى 109 جوو-نىڭ ءبىلىم بەرۋ باعدارلامالارىنا مونيتورينگ جاساپ، ارنايى رەيتينگىن شىعارىپتى. 17 كريتەريگە نەگىزدەلگەن تىزىمدە ءبىلىم باعدارلاماسى ەڭبەك نارىعىنا باعىتتالعان ساپالى مامان دايىنداۋ مۇمكىندىگى تومەن ۋنيۆەرسيتەتتەر دە انىقتالعان. ولاردىڭ قاتارىندا:

  • سىرداريا ۋنيۆەرسيتەتى;
  • SilkWay حالىقارالىق ۋنيۆەرسيتەتى;
  • قازاقستاننىڭ تەڭىز ۋنيۆەرسيتەتى;
  • وڭىرلىك الەۋمەتتىك-يننوۆاتسيالىق ۋنيۆەرسيتەتى;
  • ورتالىق ازيا ۋنيۆەرسيتەتى;
  • استانا ۋنيۆەرسيتەتى;
  • ا. قۋاتبەكوۆ اتىنداعى حالىقتار دوستىعى ۋنيۆەرسيتەتى;
  • بولاشاق ۋنيۆەرسيتەتى بار

«اتامەكەن» «جۇمىسقا جالعان تۇردى» دەگەن انىقتاما الدىرتۋ مەن «ساپاسىز ءبىلىمدى» جويۋدىڭ شەشىمى  رەتىندە اكىمشىلىك ءادىستى ۇسىنادى، ياعني وقۋ ورىندارى بولاشاق جۇمىسسىزداردى دايىنداماۋى ءۇشىن ولاردىڭ ليتسەنزيالارىن قايتارىپ الۋ قاجەت. سونىمەن قاتار رەيتينگ ناتيجەسى مەملەكەتتىك ءبىلىم بەرۋ گرانتتارىن ءبولۋ كەزىندە ەسكەرەلۋى ءتيىس. ۇيىم وكىلى ولجاس ورداباەۆتىڭ سوزىنشە، ساپاسىز مامان دايىندايتىن جوعارى وقۋ ورنىنا مەملەكەتتەن قاراجات بولىنبەۋى كەرەك. ەڭ باستىسى، وقۋ ساپاسى، ءبىلىمى تومەن وقۋ ورنىن مەملەكەتتىك تاپسىرىس بويىنشا وقىتۋ قۇقىعىنان ايىرۋ باستاماسى ۇسىنىلدى.

"The Qazaq Times"