«ااك-ءنى الماستىرۋى مۇمكىن» جاڭا جاردەماقىعا قۇجاتتار قابىلدانا باستادى

ەلوردادا 2020 جىلى كوپبالالى وتباسىلارعا بەرىلەتىن جاڭا مەملەكەتتىك جاردەماقىعا قۇجات قابىلداۋ باستالدى.

جاڭا مەملەكەتتىك جاردەماقى 2020 جىلدىڭ 1 قاڭتارىنان تولەنەدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمدەۋىنشە, «جاڭا جاردەماقىنىڭ  باستى ەرەكشەلىگى – وتباسى تابىسىنا قاراماي كوپبالالى ء(تورت بالادان باستاپ) وتباسىلارعا جاپپاي تولەنەتىن بولادى».

«مەملەكەتتىك جاردەماقى ءتورت نەمەسە ودان دا كوپ كامەلەتكە تولماعان، نەمەسە كۇندىزگى بولىمدە وقيتىن 23 جاسقا دەيىنگى بالالارى بار بارلىق كوپبالالى وتباسىعا تابىسىنا قاراماستان تولەنەدى»، – دەلىنگەن اكىمدىك حابارلاماسىندا.

• 4 بالاسى بار وتباسىلارعا –  42 496 تەڭگە;
• 5 بالاعا – 53 127 تەڭگە;
• 6 بالاعا – 63 757 تەڭگە;
• 7 جانە ودان دا كوپ بالالارعا 74 388 تەڭگە.

قۇجاتتاردى استانالىق حقكو بولىمدەرىندە، «جانۇيا» وتباسىن قولداۋ ورتالىعىندا جانە قالانىڭ باسقا دا پۋنكتەرىندە تاپسىرۋعا بولادى.

قۇجات قابىلداۋ جەلتوقسان بويى جۇرگىزىلىپ، 2020 جىلدىڭ قاڭتارىندا قايتا جالعاسادى.

مەملەكەتتىك جاردەماقىعا ىلىگۋ ءۇشىن وتباسىنىڭ بارلىق مۇشەسى بىرگە تۇرۋى ءتيىس جانە ءبىر مەكەنجايدا تىركەلۋى كەرەك. ولاي بولماعان جاعدايدا، وتباسىلاردىڭ جاڭا جاردەماقىنى الۋ قۇقىعى شەكتەلەدى. سوندىقتان كوپبالالى وتباسىلار حالىققا قىزمەت كورسەتۋ ورتالىعىنا كەلىپ، بالالارىن دا ءبىر مەكەنجايعا تىركەپ، سول جەردە جاڭا جاردەماقىعا ءوتىنىش بەرگەنى ءجون.

بيلىكتىڭ بۇل قادامى قوعامدا ءارتۇرلى پىكىر قايشىلىعىن تۋعىزدى. قوعام بەلسەندىلەرى كوپبالالى وتباسىنىڭ تابىسىنا قاراماستان بەرىلەتىن مەملەكەتتىك جاردەماقىنى «ااك-ءتى ىعىستىرۋ ءادىسى ءارى بيۋدجەت ۇنەمدەۋدىڭ جولى» دەپ باعالايدى. اتالعان ماسەلەگە قاتىستى تاۋەلسىز ساراپشىلار  «جاڭا مەملەكەتتىك جاردەماقى ۇلگىسى» بيلىكتىڭ 21 مىڭ تەڭگەنى قۇرايتىن قازىرگى ااك-ءنىڭ شىعىنىن قىسقارتۋ ءۇشىن ويلاپ تاپقان «تەتىگى» ەكەنىن ايتادى. ءار بالاعا 21 مىڭ تەڭگە الىپ وتىرعان وتباسىلارعا قوسىمشا تابىسىنا قاراماي بەرىلەتىن اتالمىش جاردەماقى جالپى تابىس ەسەبىنە ەنگىزىلىپ، تيىسىنشە توقساندىق تابىس مونيتورينگىندە شەكتى كورسەتكىشتەن ارتتىرۋ ءۇشىن «ازىرلەنگەن ءادىس» دەيدى كەيبىر بەلسەندىلەر. وسى ارقىلى جان باسىنا شاققاندا تابىسى 21 مىڭنان اسقاندا ااك تولەمى توقتاتىلاتىنىن ايتادى.

"The Qazaq Times"