مەملەكەت باسشىسى قاسىم-جومارت توقاەۆتىڭ شاقىرۋىمەن قازاقستانعا 21-22 قاراشادا شۆەيتساريا كونفەدەراتسياسىنىڭ پرەزيدەنتى – قارجى ءمينيسترى ۋلي ماۋرەر رەسمي ساپارمەن كەلمەك.

قر پرەزيدەنتىنىڭ ءباسپاسوز حاتشىسى بەرىك ءۋالي Facebook پاراقشاسىندا: «22 قاراشادا مەملەكەت باسشىلارى «اقوردا» رەزيدەنتسياسىندا شاعىن جانە كەڭەيتىلگەن قۇرامدا كەلىسسوزدەر وتكىزەدى دەپ جوسپارلانعان. شۆەيتساريالىق دەلەگاتسيانىڭ قۇرامىندا بيزنەس وكىلدەرى دە بولادى»، — دەپ جازدى.

مالىمەتتەر بويىنشا، ساپار اياسىندا ۋلي ماۋرەر قازاقستان ۇكىمەتىنىڭ باسشىلىعىمەن كەزدەسەدى جانە ەكى ەلدىڭ ىسكەرلىك توپتارىنىڭ قاتىسۋىمەن وتەتىن دوڭگەلەك ۇستەلدە ءسوز سويلەيدى دەپ جوسپارلانعان.

سونىمەن قاتار، كەلىسسوزدەر بارىسىندا ساياسي، ساۋدا-ەكونوميكالىق، ينۆەستيتسيالىق جانە گۋمانيتارلىق سالالار بويىنشا ەكىجاقتى ىنتىماقتاستىقتىڭ احۋالى مەن پەرسپەكتيۆالارى تالقىلانباق.

"The Qazaq Times"