قازاقستاننىڭ ەكس-پرەزيدەنتى نۇرسۇلتان نازارباەۆ ەلدەگى بيلىكتىڭ اۋىسۋى تۋرالى پىكىر ءبىلدىرىپ، ادەتىنشە 90-شى جىلدارى «قۇلدىراعان ەكونوميكانى» قايتا كۇشەيتۋ تاريحىنان ەستەلىكتەر ايتتى.  

بۇگىن استانا تورىندە ءوتىپ جاتقان «استانا كلۋبى»   ساياسي فورۋمىنىڭ بەسىنشى وتىرىسىنىڭ پلەنارلىق ماجىلىسىندە نازارباەۆ:

– بيلىك ءترانزيتى تۋرالى سۇراق ءجيى قويىلىپ ءجۇر. مەنىڭ مانداتىم 2020 جىلدىڭ سوڭىندا اياقتالۋى ءتيىس ەدى، بىراق مەن وسىنداي شەشىم قابىلدادىم. نەگە؟ وعان نە سەبەپ بولدى؟ ەڭ الدىمەن، مەن پرەزيدەنت لاۋازىمىن ناعىز تانىمال شاعىمدا قالدىردىم. 2015 جىلى سايلاۋدا مەن 96% داۋىس جينادىم. مەنىڭ كەتكەنىم ءۇشىن حالىق قامىققانىن بىلەمىن. بىراق، بۇل بىرەگەي وقيعا ەمەس. ءبىر كەزدەرى دە گولل دە لاۋازىمىنان باس تارتقان، لي كۋان يۋ، ماحاتحير مىرزالار دا ءوزى كەتكەن، – دەدى نۇرسۇلتان نازارباەۆ Astana club پانەلدىك وتىرىسىندا.

ول كەڭەس كەزىنەن بەرى قازاقستان باسشىلىعىندا بولعانىن جانە «ەسەڭگىرەگەن ەلدىڭ» ءال-اۋقاتىن قالاي 19 ەسەگە وسىرگەنىن ادەتتەگىدەي قايتالادى. «1984 جىلى مەنى قازاقستان مينيسترلەرى كەڭەسىنىڭ توراعاسى ەتىپ سايلادى. سودان بەرگى 35 جىلدا – كسرو ىدىراۋىنان كەيىنگى اۋىر جىلدار باستان ءوتتى، الىپ مەملەكەت قيرادى. بارلىق بايلانىس ءۇزىلدى، 2 ميلليون ادام جۇمىسسىز قالدى، ەلەكتر قۋاتى جوق، دۇكەندە نان مەن ءسۇت، شۇجىق جوق. مەن قازاقستاندى وسى كۇيىندە قابىلداپ الدىم. بۇل جىلدارى ەل ەكونوميكاسى 20 ەسە كوتەرىلدى، حالىقتىڭ ءال-اۋقاتى 19 ەسە ءوستى. ءبىز الەم كارتاسىندا بولماعان مەملەكەتتى قۇردىق. قازىر بۇل مەملەكەت الەم كارتاسىندا بار جانە قۇرمەت-بەدەلگە يە»، – دەدى ول.

سونىمەن قاتار ول 14,5 مىڭ شاقىرىم بولاتىن ەل شەكاراسىنىڭ شەگەلەۋ تاريحىنا توقتالىپ، الپاۋىت دەرجاۆالار اراسىندا «ءبىزدىڭ كوپۆەكتورلى ساياساتىمىز ەشكىمنىڭ اۋماعىنا ەنبەي، تەڭ قارىم-قاتىناس قۇرۋعا نەگىزدەلەتىنىن» قايتالاپ ايتتى.

ساراپشىلار تاراپى نازارباەۆتىڭ ادەتتە ارقانداي تۇڭعىش پرەزيدەنت اتقارۋى ءتيىس «بازالىق مىندەتتەمەلەردى» ۇنەمى ماقتانىش ەسەبىندە ءسوز ەتۋىن «ءالسىز ارگۋمەنت» دەپ ساناپ، ءجيى سىنعا الادى.

ەكس-پرەزيدەنت اكەسىنىڭ وڭ جاعىندا وتىرعان سەنات توراعاسى داريعا نازارباەۆا. ەلوردا. 12 قاراشا 2019 جىل. فوتو: اەسي

«استانا كلۋبى» ساياسي فورۋمىنىڭ بەسىنشى وتىرىسىنا توراعالىق ەتۋشى ەكس-پرەزيدەنت ن.نازارباەۆ. ەلوردا. 12 قاراشا 2019 جىل. فوتو: اەسي

«استانا كلۋبى» ساياسي فورۋمىنىڭ بەسىنشى وتىرىسى. ەلوردا. 12 قاراشا 2019 جىل. فوتو: اەسي

"The Qazaq Times"