توكيودا ءىرى شەرۋ ءوتتى

توكيودا جاڭا يمپەراتور نارۋحيتونىڭ تاققا وتىرۋىنا بايلانىستى ءىرى شەرۋ ءوتتى. بۇل تۋرالى Japan Times حابارلادى.

قازاندا ءوتۋى ءتيىس شەرۋ تايفۋن ورىن العان سوڭ، كەيىنگە شەگەرىلگەن ەدى. سالتاناتتى شاراعا قاتىسۋعا ونداعان مىڭ ادام كەلگەن. يمپەراتور مەن ونىڭ جارى ارنايى جاسالعان Toyota Century كولىگىمەن ءجۇرىپ ءوتتى.

ۇلىقتاۋ راسىمىندە يمپەراتور نارۋحيتو سوزىندە: «وتىز جىلدان استام ۋاقىت بويى اسا مارتەبەلى، قۇرمەتتى يمپەراتور اكيحيتو حالقىنىڭ باقىتتى بولۋىن، الەمدەگى بەيبىتشىلىكتىڭ بەرىك بولۋىن تىلەدى. مەن جاپونيانىڭ بىرلىگى مەن مەملەكەتتىگىنىڭ نىشانى رەتىندە كونستيتۋتسياعا سايكەس قىزمەت اتقارامىن»، – دەدى.

وسىعان دەيىن جاڭا يمپەراتوردى ۇلىقتاۋعا 170 مەملەكەتتەن ارنايى دەلەگاتسيا قاتىسقان بولاتىن. سالتاناتتى شەرۋگە بەلگيا، بۋتانا، يسپانيا، كامبودجا، مالايزيا، نيدەرلاندى كورولدەرى، بىرىككەن كورولدىكتىڭ مۇراگەر حانزاداسى چارلز، اۋستريا، ءۇندىستان، ۆەنگريا، فيليپپين، فينليانديا پرەزيدەنتتەرى، اقش-تىڭ كولىك ءمينيسترى ەلەين چاو، رەسەي فەدەراتسيا كەڭەسى توراعاسىنىڭ ورىنباسارى يلياس ۋماحانوۆ، قحر توراعاسىنىڭ ورىنباسارى ۆان تسيشان بار. سونىمەن قاتار، جاپونياعا ارمەنيا پرەزيدەنتى ارمەن ساركيسيان، گرۋزيا باسشىسى سالومە زۋرابيشۆيلي، قىرعىزستان پرەزيدەنتى سوورونباي جەەنبەكوۆ، ۋكراينا پرەزيدەنتى ۆلاديمير زەلەنسكي، مولداۆيا پرەزيدەنتى يگور دودون جانە قازاقستاننىڭ بۇرىنعى پرەزيدەنتى نۇرسۇلتان نازارباەۆ قاتىسقان.

جاپون جۇرتىنىڭ زاڭىنا سايكەس، پاتشا وتباسىندا ساياسي بيلىك جوق. الايدا، جاپونيانىڭ ەل بىرلىگى مەن ۇلت تۇتاستىعىنىڭ سيمۆولى رەتىندە پاتشا وتباسىنا ۇلكەن قۇرمەت كورسەتىلەدى. حالىق نارازى بولعان جاعدايدا ۇكىمەتتى دە اۋىستىرۋعا قاقىسى بار.  اكيحيتو پاتشانىڭ تۇسىندا جاپون حالقى تالاي اۋىر كۇندەردى باسىنان وتكەرگەن. اكيحيتو سونىڭ بارىندە شاپاعاتشىل، حالىقشىل پاتشا رەتىندە ەستە قالدى.

"The Qazaq Times"