ۇزدىك ءبىلىم بەرۋشى – «زەردەلى» الماتىدا ءوز ورتالىعىن اشتى

بۇگىن، الماتى قالاسىندا مەكتەپ وقۋشىلارىن ءتۇرلى پاندەردە تەرەڭدەي وقىتۋدا ۇزدىك تاجىريبەگە يە «زەردەلى» اقىل-وي دامىتۋ ورتالىعى اشىلۋ سالتاناتىن وتكىزدى. بۇعان دەيىن ەلوردامىزدا اتالعان ءبىلىم وشاعىنىڭ التى بىردەي ورتالىعى جۇمىس ىستەپ كەلگەن.

اشىلۋ سالتاناتىندا فيزيكا-ماتەماتيكا عىلىمدارىنىڭ دوكتورى، پروفەسسور اسقار جۇمادىلداەۆ پەن «EDTECH-KZ» حالىقارالىق ءبىلىم بەرۋ ورتالىعىنىڭ باس ديرەكتورى عاني بەيسەمباەۆ جانە «التىن ساقا» وليمپياداسىنىڭ دەمەۋشىسى، «ەر جانىبەك» حالىقارالىق قوعامدىق قورىنىڭ پرەزيدەنتى جەڭىس تۇركيا مىرزا، سونداي-اق، بىرقاتار قوعام قايراتكەرلەرى مەن زيالى قاۋىم وكىلدەرى بولدى. الماتىدا اشىلىپ وتىرعان ورتالىقتىڭ تۇساۋىن پروفەسسور اسقار جۇمادىلداەۆ پەن يۋنەسكو كلۋبىنىڭ جەتەكشىسى عاني بەكتايۇلى كەستى.

اسقار سەرىكۇلى بالالارعا ءبىلىم بەرۋدىڭ ماڭىزدىلىعى تۋرالى سويلەپ تۇىر. فوتو: Qت7

اشىلۋ سالتاناتىنان كەيىن 6 سىنىپقا دەيىنگى وقۋشىلار اراسىندا وتكەن «التىن ساقا» قالالىق وليمپياداسىنىڭ جۇلدەگەرلەرى جانە ولاردىڭ ۇستازدارىن ماراپاتتاۋ ءراسىمى وتكىزىلدى. جۇلدەلى 4- ورىن يەگەرلەرى قازاقستان ماتەماتيكا ءپانى مۇعالىمدەر قاۋىمداستىعىنىڭ ۆيتسە-پرەزيدەنتى باقنۇر زيابەك مىرزانىڭ قولىنان «زەردەلى» ورتالىعىندا 1 جىلدىق ءبىلىم الۋدىڭ 30 پايىزدىق جەڭىلدىك سەرتيفيكاتىن الدى. 3- ورىن يەگەرلەرى 5 مىڭ تەڭگە اقشالاي سىيلىق جانە «زەردەلى» ورتالىعىندا ءبىر جىلدىق وقۋدىڭ 40 پايىز جەڭىلدىك سەرتيفيكاتىن يەلەدى. بۇل قاتارداعى جۇلدەگەرلەردى اتالعان وليمپيادانىڭ وتۋىنە دەمەۋشىلىك ەتكەن «شيپا-مەد» حالىقارالىق مەديتسينالىق ورتالىعىنىڭ ديرەكتورى قۇرمانبەك ايموللا مىرزا ماراپاتتادى.

10 مىڭ تەڭگە اقشالاي سىيلىق جانە ورتالىقتا ءبىر جىل وقۋدىڭ 50 پايىز جەڭىلدىك سەرتيفيكاتىن يەلەگەن 2 - ورىن جۇلدەگەرلەرىنە عاني بەكتايۇلى سەرتيفيكاتتارىن تابىستاسا، وليمپيادا دەمەۋشىسى Golden Bridge كومپانياسىنىڭ ديرەكتورى بولاتبەك دالەلحان مىرزا اقشالاي سىيلىقتارىن تابىس ەتتى.

«التىن ساقا» قالالىق وليمپياداسىنىڭ 1- ورىن يەلەگەن وقۋشىلار 30 مىڭ تەڭگە اقشالاي سىيلىق پەن جانە ورتالىقتىڭ ءبىر جىلدىق وقۋىنا 60 پايىز جەڭىلدىك سەرتيفيكاتىمەن ماراپاتتالدى. بۇعان قوسا جۇلدەلى وقۋشىلاردىڭ ۇستازدارى 20 مىڭ تەڭگەدەن اقشالاي سىيلاندى. الدىنعى قاتارلى جۇلدەگەرلەردى پروفەسسور اسقار سەرىكۇلى مەن «ەر جانىبەك» قورىنىڭ پرەزيدەنتى جەڭىس تۇركيا مىرزا ماراپاتتادى.

وليمپيادا جۇلدەگەوەردەرى جانە ونىڭ ۇستازدارى ماراپاتتالدى. فوتو: Qت.

بۇدان كەيىن «التىن ساقا» وليمپياداسىندا كوماندالىق ەسەپتە ەڭ كوپ ورىن العان مەكتەپتەر ماراپاتتالدى. «التىنساقا» كۋبوگىن قالالىق №173 مەكتەپ يەلەندى.

ايتا كەتەيىك، مەكتەپ جاسىنداعى بالالاردى ءتۇرلى پاندەردە تەرەڭدەي وقىتۋعا ارنالعان «زەردەلى» اقىل-وي دامىتۋ ورتالىعىندا قازاقستانداعى ەڭ ۇزدىك مۇعالىمدەر ساباق بەرىپ كەلەدى. ورتالىقتا 120 مۇعالىم قىزمەت ەتەدى جانە 2 مىڭنان اتسام وقۋشى ءبىلىم الادى. جىل سايىن ۇزدىك جوو جانە ءتۇيىندى مەكتەپتەرگە قابىلداناتىن شاكىرتتەر سانى دا ەڭ جوعارى وقۋ ورتالىعى سانالادى.