گونكونگتىڭ الەمگە تانىمال جۇلدىزى دجەكي چاننىڭ ۆەتنام ساپارى كۇشتى نارازىلىققا تاپ بولدى. ۆەتنامدىق الەۋمەتتىك جەلىدە دجەكي چاننىڭ ەلدەرىنە ساپارلاي كەلۋىنە بايكوت جاريالاعان. الەمگە اتى ماشقۇر كينو جۇلدىزىنىڭ ساپارىنا قارسىلىق ونىڭ كەيبىر ساياسي كوزقاراستارىنا بايلانىستى ەكەنى ءمالىم بولدى. دجەكي چان بەيجىڭ بيلىگىنىڭ وڭتۇستىك قىتاي تەڭىزىندەگى داۋلى جوبالارىنا قولداۋ بىلدىرگەن. بۇل ۆەتنامدىقتاردىڭ نارازىلىعىن ءورشىتتى.

دجەكي چان اقش-تىڭ ۆيردجينيا شتاتىندا ورنالاسقان Operation Smile كوممەرتسيالىق ەمەس ۇيىمىنىڭ مۇشەسى. ۇيىمنىڭ ماقساتى الەمنىڭ شالعاي جانە كەدەي اۋداندارىنداعى بالالارعا مەديتسينالىق جاردەم بەرۋ. دجەكي چان وسى ۇيىمنىڭ قۇرىلعانىنا 30 جىل تولۋىنا وراي ۆەتنامدا وتەتىن شاراعا قاتىسۋ ءۇشىن 10 قاراشادا ۆەتنام ساپارىن جوسپارلاعان.

وتكەن اپتادا دجەكي چان قىتايدىڭ وڭتۇستىك قىتاي تەڭىزىندەگى «توعىز سەگمەنتتىك جول» جوباسىن قولدايتىنىن ءبىلدىرىپ، مالىمدەمە جاساعان بولاتىن. بۇل جوبا 2009 جىلدان بەرى وڭتۇستىك قىتاي تەڭىزىنە شەكتەسەتىن ەلدەرمەن قىتاي اراسىنداعى داۋدى ءورشىتىپ كەلە جاتقانى بەلگىلى. دجەكي چاننىڭ ساياسي كوزقاراسى اتالعان تەڭىز ماڭىنداعى بىرقاتار ەلدەردە ازاماتتاردىڭ كۇشتى نارازىلىعىنا تاپ بولدى.

كۇشتى نارازىلىقتاردان كەيىن Operation Smile ۇيىمى جوباداعى دجەكي چاننىڭ سۋرەتىن الىپ تاستاۋعا جانە ونى ساپارعا قاتىستىرماۋعا ءماجبۇر بولدى.

“The Qazaq Times”