كاتالونيانىڭ يسپانيادان تاۋەلسىزدىگىن الۋىن جاقتاۋشىلاردىڭ ەرەۋىلى پوليتسيامەن قاقتىعىسقا ۇلاستى. كەيبىر ەرەۋىلشىلەر كولىكتەردى ورتەپ، كوشەلەردى جاۋىپ تاستاعان. بىرنەشە كۇن بۇرىن يسپانيا جوعارى سوتى كاتالونيانىڭ بىرقاتار ليدەرلەرىن ۇزاق مەرزىمگە باس بوستاندىعىنان ايىرۋ شەشىمىن شىعارىپ ەدى.

كاتالونياداعى دۇربەلەڭگە نازار اۋداراتىن سەبەبىمىز – دەموكراتيا مەن ۇلتتىق مۇددە ماسەلەسىنىڭ دامىعان ەۋروپانىڭ ورتاسىندا تەكە-تىرەسكە ءتۇسۋى دەسەك بولاتىنداي. يسپانيا جوعارى سوتىنىڭ شەشىمىن كاتالونيا ۇكىمەتى ايىپتاپ جاتىر. جالپى 12 ادام 9 جىلدان 13 جىلعا دەيىنگى قاماۋ جازاسىنا كەسىلگەن شەشىم دەربەستىكتى جاقتاۋشىلاردىڭ اشۋ-ىزاسىن ءورشىتتى.

ەرەۋىشلىلەر پوليتسيامەن قاقتىعىستى. فوتو: Reuters.

ەرەۋىلدەر كاتالونيانىڭ بارلىق جەرىندە بولىپ جاتىر ءارى 3 كۇننەن بەرى جالعاسىپ كەلەدى. كەشە عانا 51 ەرەۋىلشى قاماۋعا الىنعانى ءمالىم بولعان. جاراقات العانداردىڭ انىق سانى بەلگىسىز. پوليتسيا تارابى ەرەۋىلگىلەردىڭ ورتالىق كوشەلەردە بىرنەشە كولىكتى ورتەپ، جولداردى جاۋىپ تاستاعانىن ايتادى.

ءۇش كۇننەن بەرى شەرۋلەر جالعاسۋدا. فوتو: BBC.

ال، كاتالونيانىڭ دەربەستىگىن جاقتاۋشى ليدەرلەر ەرەۋىلشىلەردىڭ اسىرە ارەكەتتەرىن توقتاتۋىن تالاپ ەتتى. ولار كاتالونيا دەربەستىگىن جاقتاۋشىلاردىڭ اراسىنا ارانداتۋشىلار كىرىپ، وسىنداي باسبۇزارلىق ارەكەتكە باردى دەگەن مالىمدەمەلەر دە تاراتتى. كاتالونيانىڭ ۇكىمەت باسشىسى كيم توررا دا وسىعان ۇقساس مالىمدەمە جاساعان.

“The Qazaq Times”