قر ەكس-پرەزيدەنتى، «قاۋىپسىزدىك كەڭەسىنىڭ ماڭگىلىك توراعاسى»، «ۇلت كوشباسشىسى» نۇرسۇلتان نازارباەۆ كەشە تۇركيا پرەزيدەنتى رەجەپ تايىپ ەردوعان جانە وزبەكستان پرەزيدەنتى شاۆكات ميرزيوەۆپەن كەزدەستى.
ازەربايجان استاناسى باكۋدە تۇركى تىلدەس مەملەكەتتەردىڭ ىنتىماقتاستىعى كەڭەسىنىڭ 7-ءشى ءسامميتى اياسىندا كەزدەسكەن نازارباەۆ پەن ەردوعان «تۇركى الەمى ەلدەرى ينتەگراتسيالىق ۇدەرىسىنىڭ قازىرگى جاعدايى مەن الداعى پەرسپەكتيۆالارىن تالقىلاعان» كورىنەدى.
Elbasy.kz تۇڭعىش پرەزيدەنتتىڭ اقپاراتتىق سايتى كەلتىرگەن مالىمەت بويىنشا، تاراپتار ايماقتىق قاۋىپسىزدىكتى جانە ەۋرازيا قۇرلىعى مەملەكەتتەرىنىڭ تۇراقتى دامۋىن قامتاماسىز ەتۋ ماسەلەلەرى جونىندە پىكىر الماسقان.
قازاقستاننىڭ بۇرىنعى پرەزيدەنتى ن.نازارباەۆ تۇركيا پرەزيدەنتى ت.ەردوعانمەن كەزدەستى. باكۋ، ءازىربايجان. 15 قازان 2019 جىل. فوتو: elbasy.kz
سونىمەن قاتار، باكۋدەگى جيىن بارىسىندا قازاقستاندىق ەكس-پرەزيدەنت تاسى ورگە دومالاعان وزبەك ەلىنىڭ كوشباسشىسى شاۆكات ميرزيوەۆپەن دە جۇزدەسىپ، ارنايى شارا وتكەن.
كەزدەسۋ كەزىندە نازارباەۆ ميرزيوەۆتىڭ باسشىلىعىمەن قول جەتكىزىلگەن وزبەكستاننىڭ الەۋمەتتىك-ەكونوميكالىق دامۋىنىڭ ناتيجەلەرىنە توقتالدى دەسەدى.
– قازاقستان مەن وزبەكستان وتە جاقىن جانە ماڭىزدى سەرىكتەس. ءوزارا تاۋار اينالىمى 2,5 ميلليارد دوللارعا جەتتى. بۇعان دەيىن مۇنداي كورسەتكىشتەر بولعان ەمەس. بۇل جاقسى پەرسپەكتيۆالارعا جول اشىپ وتىر، – دەگەن نازارباەۆ.
قازاقستاننىڭ بۇرىنعى پرەزيدەنتى ن.نازارباەۆ وزبەكستان پرەزيدەنتى ش.ميرزيوەۆپەن كەزدەستى. باكۋ، ءازىربايجان. 15 قازان 2019 جىل. فوتو: elbasy.kz
سونداي-اق، ش.ميرزيوەۆ وزبەكستانداعى قازاقستان جىلى اياسىندا ءوتىپ جاتقان ءىس-شارالاردىڭ ورىندالۋ جايىن ءسوز ەتتى. ايتپاقشى، مۇقىم تۇركى جۇراعاتىنىڭ كەڭەسىندە نازارباەۆ تۇركى الەمىنىڭ جوعارى وردەنىمەن ماراپاتتالعان. بۇعان قاتىستى نازارباەۆ:
– ماعان «تۇركى كەڭەسىنىڭ قۇرمەتتى توراعاسى» مارتەبەسىن بەرۋ تۋرالى ۇسىنىسى ءۇشىن پرەزيدەنت رەجەپ ەردوعانعا العىس بىلدىرەمىن. وسى باستامانى قولداعاندارىڭىز ءۇشىن بارشاڭىزعا ريزامىن. بۇل جوعارى مارتەبە ماعان ورتاق ۇيىمىمىزدىڭ جۇمىسىنا ودان ءارى بەلسەندى قاتىسۋعا مۇمكىندىك بەرەدى، – دەپ اعىنان جارىلدى.
قازاقستان-وزبەكستان دەلەگاتسيالارى كەزدەسۋى بارىسىندا ەكس-پرەزيدەنت پەن قىزمەتتەگى پرەزيدەنت تىلدەسكەن. باكۋ، ءازىربايجان. 15 قازان 2019 جىل. فوتو: elbasy.kz
ەكس-باسشىنىڭ سىرتقى ىستەردە وكىلدىك ميسسياسىندا ءجيى كورىنۋى الەۋمەتتىك جەلى قولدانۋشىلارى مەن ساراپشىلاردىڭ سىني پىكىرىنە ىلىكتى. تۇركى تىلدەس ەلدەردىڭ باسشىلارى وكىلدىك ەتكەن وتىرىسقا قازاقستاننىڭ قازىرگى پرەزيدەنتى قاسىم-جومارت توقاەۆ قاتىسقان جوق. جەتى جۇرتتىڭ باسشىلارى باس قوسقان القالى جيىنعا نازارباەۆپەن بىرگە قازاقستان ۆيتسە-پرەمەرى بەردىبەك ساپارباەۆ ەرە بارعان.
تۇركىتىلدەس مەملەكەتتەر ىنتىماقتاستىق كەڭەسىنە مۇشە ەلدەر باسشىلارىنىڭ 7-ءشى ءسامميتىنىڭ وتىرىسى. باكۋ، ءازىربايجان. 15 قازان 2019 جىل. فوتو: elbasy.kz
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
Oyan, Qazaqstan قوزعالىسىنىڭ تاعى ءبىر بەلسەندىسىن پوليتسيا بولىمىنە شاقىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا