4 قىركۇيەك كۇنى الماتى قالاسىنداعى ءا. قاستەەۆ اتىنداعى قازاق مەملەكەتتىك ونەر مۇراجايىندا «تۇران ءرومانتيزمى» اتتى سۋرەت كورمەسى اشىلدى. كورمەگە قويىلعان تۋىندىلار وتكەن عاسىرداعى قازاق ۇلتازاتتىق قوزعالىسىنىڭ جەتەكشىسى وسپان باتىردى تاقىرىپ ەتكەن. اتالعان شارانى «ەر جانىبەك» حالىقارالىق قوعامدىق قورى مەن «TURAN-QAZAQ» سۋرەتشىلەر كونسوليداتسياسى» بىرلەسە ۇيىمداستىرعان.

ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى اقان ابدۋاليەۆ باستاۋ ءسوزىن سويلەدى. فوتو: QT.

وسپان باتىر ءسىلامۇلىنىڭ تۋعانىنا 120 جىل تولۋىنا وراي وتكىزىلىپ وتىرعان شارانى «ەر جانىبەك» قورىنىڭ قۇرمەتتى پرەزيدەنتى، م.ع.د. اكادەميك ماقسۇت تەمىرباەۆ، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى، اقان ابدۋاليەۆ، «ەر جانىبەك» قورىنىڭ پرەزيدەنتى جەڭىس تۇركيا، ا. قاستەەۆ اتىنداعى ونەر مۇراجايىنىڭ ديرەكتورى گۇلميرا شالاباەۆا جانە «TURAN-QAZAQ» سۋرەتشىلەر كونسوليداتسياسى» جەتەكشىسى جاناربەك بەرىستەنوۆ قاتارلى ءار سالا وكىلدەرى باستاپ اشتى. شارانىڭ اشىلۋىنا زيالى قاۋىم وكىلدەرىمەن بىرگە، ونەر سۇيەر شوعىرلى قاۋىم جينالدى.

ەستاي داۋباەۆ باستاعان بىرقاتار ونەرپازدار "تۇران" سىيلىعىمەن ماراپاتتالدى. فوتو: QT

وسپان باتىر بەينەسى بۇعان دەيىن پوەزيا، پروزا، دراماتۋرگيا سىندى ادەبيەت پەن ونەردىڭ بىرقاتار سالاسىندا ناسيحاتتالعان. بۇل باتىر ەسىمىنىڭ بەينەلەۋ ونەرىندە العاش رەت كەڭ كولەمدى ناسيحاتتالۋى. كورمەگە 50-دەن استام قىلقالام شەبەرلەرى قاتىسقان. 100-دەن اسا جاڭا تۋىندىلار قويىلعان.

"وسپان باتىر" تولەگەن سۇلەيمەنوۆتىڭ تۋىندىسى. فوتو: QT.

ايتا كەتەيىك، كورمە 25 قازانعا دەيىن جالعاسادى. «ەر جانىبەك» قورى جانە «TURAN-QAZAQ» سۋرەتشىلەر كونسوليداتسياسى» جاعىنان جاريالانعان قوماقتى جۇلدە قورى بار. كورمەگە قويىلعان تۋىندىلاردى ارنايى قازىلار القاسى ساراپتاي وتىرىپ 25 قازان كۇنى جۇلدەگەرلەر انىقتالىپ، جاريا ەتىلمەك.

كورمەنىڭ اشىلۋىنا وسپان باتىر مەن زۋقا باتىردىڭ ۇرپاقتارى قاتىستى. فوتو: QT.

“The Qazaq Times”