ساۋد ارابياسىنىڭ مۇناي كومپانياسىنا جاسالعان شابۋىل الەمدەگى مۇناي باعاسىنىڭ كوتەرىلۋىنە سەبەپ بولعان. سەنبىدە يەمەننىڭ حۋسيت كۇشتەرى ساۋد ارابياسىنىڭ ۇلتتىق مۇناي كومپانياسىنىڭ نىساندارىنا شابۋىل جاسادى. ناتيجەسىندە مۇناي باعاسى 5 پايىزعا قىمباتتادى.

باتىستىق اقپارات قۇرالدارىنىڭ حابارىنا قاراعاندا، بۇگىن «برەنت» ماركالى مۇناي باعاسى 19 پايىزعا دەيىن قىمباتتاپ، 71,95 دوللار باعانى كورسەتكەن. ال، West Texas Intermediate مۇنايىنىڭ باعاسى 15 پايىزعا قىمباتتاپ، ءار باررەلى 63,34 دوللاردى قۇراعان.

اقش پرەزيدەنتى مۇناي باعاسىنداعى جاعدايدى رەتكە كەلتىرۋ ءۇشىن اقش مۇناي قورىن پايدالانۋعا بۇيرىق بەرگەن. وسىدان كەيىن مۇناي باعاسىنداعى الاساپىران جاعداي ازدا بولسا وڭالعان.

ساۋد ارابياسىنىڭ ماڭىزدى مۇناي نىساندارىنا جاسالعان شابۋىل. فوتو: Forbes

سەنبىدەگى شابۋىلدا الەمدەگى مۇناي وڭدەۋشى ەڭ ءىرى زاۋىت نىساناعا الىنعان. اقش مەملەكەتتىك دەپارتامەنتى شابۋىلدىڭ ارتىندا تەھران تۇرعانىن ايتتى. الايدا، يران ۇكىمەتى بۇل ايىپتاۋدى جوققا شىعارىپ، «اقش-تڭ الدامشىلىعى» دەپ سىنعا الدى. مالىمەتتەرگە قاراعاندا، ساۋد ارابياسىنىڭ مۇناي نىساندارىنىڭ قالپىنا كەلىپ، مۇناي وڭدەۋگە كىرىسۋىنە بىرنەشە اپتا ۋاقىت بار.

ساۋد ارابياسى الەمدەگى ەڭ ءىرى مۇناي وڭدەۋشى ەل رەتىندە كۇنىنە 7 ملن باررەل مۇناي شىعارادى. ساۋد بيلىگى شابۋىلدىڭ زارداپتارى تۋرالى تولىقتاي مالىمەت بەرۋدەن باس تارتۋدا. ەلدىڭ ەنەرگەتيكا مينيسترلىگى بولسا وندىرىستەگى تاپشىلىقتى رەزەرۆتەگى مۇناي ارقىلى تولتىرۋعا شەشىم قابىلداعان.

حالىقارالىق ساراپشىلار سەنبىدەگى شابۋىلدىڭ ورتا شىعىستاعى داعدارىستى كۇشەيتكەن اسا سالماقتى وقيعا دەپ قارايدى. سونىمەن بىرگە، شابۋىلدىڭ اسەرىنەن حالىقارالىق مۇناي باعامى ءبىر اپتاعا دەيىن استاڭ-كەستەڭ كۇيگە تۇسەدى دەپ بولجايدى.

“The Qazaq Times”