16 قىركۇيەك تاڭعى ساعات 8:00-دەر كەزىندە شىمكەنتتە جولاۋشىلار اۆتوبۋسى جول اپاتىنا ۇشىراپ، سالدارىنان 13 ادام زارداپ شەگىپ، 1 كىسى قايتىس بولعان.

بەلگىلى بولعانىنداي، تاڭەرتەڭگىسىن №40 باعىتتاعى قوعامدىق كولىك  جەڭىل كولىكپەن قاتتى سوقتىعىسىپ، سالدارىنان اۆتوبۋس اۋدارىلىپ كەتكەن. كۋاگەرلەردىڭ ايتۋىنشا، زارداپ شەككەندەر كوپ.  استانا داڭعىلى مەن بايتەرەكوۆ كوشەلەرىنىڭ قيىلىسىندا ورىن العان جكو 5 جەدەل-جاردەم بريگاداسى كومەك كورسەتكەن. وتىرار جەرگىلىكتى ارناسىنىڭ حابارلاۋىنشا, جول اپاتى ورنىندا 13 ادام زارداپ شەككەن، ولاردىڭ ۇشەۋى – بالالار، توعىزى – ەرەسەكتەر. وكىنىشكە وراي، كوندۋتور ايەل كوز جۇمعان. اتالعان وقيعا بويىنشا ازىرگە رەسمي اقپارات بەرىلگەن جوق.

ەستەرىڭىزگە سالا كەتسەك، وسىدان ءۇش كۇن بۇرىن ەل استاناسىندا دا №53 باعدارىنداعى اۆتوبۋس پەن تەپلوۆوز سوقتىعىسقان بولاتىن. كۇنى كەشە، قىركۇيەكتىڭ 15-ءى كەشكىلىك الماتى وبلىسىندا اقسەڭگىر-شامالعان ستانتسياسىندا وتكەلدە تۇرالاپ قالعان اۆتوبۋستى پوەزد سوعىپ ءوتىپ، ءبىر ادام (اۆتوبۋس جۇرگىزۋشىسى) قازا تاپقان ەدى.

ءۇش كۇننىڭ ىشىندە ەلىمىزدىڭ ەڭ ءىرى ءۇش مەگاپوليسىندە ورىن العان قوعامدىق كولىكتەردىڭ جول اپاتىنا ۇشىراۋ فاكتىلەرى قازاقستاندىقتاردىڭ الاڭداۋشىلىعىن تۋدىرۋدا.

ەلىمىزدە قوعامدىق كولىك تۇرلەرىنە قاتىستى جول اپاتى فاكتىلەرى جيىلەي تۇسكەن. الدىڭعى جىلعى شۋ ستانتسياسىنداعى تەمىر جول اپاتى، جىل سايىنعى جەڭىل كولىكتەر مەن اۆتوبۋستاردىڭ قاتىسۋىمەن بولاتىن سان الۋان قاقتىعىستار كوبىنە ادام شىعىنىنا الىپ كەلەدى. ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەكتەرىنە سۇيەنسەك، قازاقستاندا جىل سايىن جول-كولىك اپاتىنان شامامەن ەكى مىڭنان استام ادام قازا تابادى. ماسەلەن، 2017 جىلى 17019 جول-كولىك اپاتى تىركەلىپ، 22 256 ادام جاراقات الىپ، 2086 ادام قايتىس بولعان. ال، بىلتىر (2018 جىلى) قازاقستاندا 15 821 جول-كولىك اپاتى تىركەلىپ، وندا 20 445 ادام جاراقات السا، 2096 ادام قازا تاپقان.

The World Bank-تىڭ مالىمەتىنشە, قازاقستاندا 100 000 ادامعا شاققاندا جول-كولىك اپاتىنان قازا تاباتىندار سانى 23,8 كوەففيتسيەنتتى قۇرايدى. بۇل كورسەتكىش ەۋروپا ەلدەرىمەن سالىستىرعاندا الدەقايدا كوپ.

قوعامدىق كولىكپەن سوقتىعىسقان جەڭىل كولىكتىڭ كورىنىسى. 16 قىركۇيەك 2019 جىل. فوتو: اشىق دەرەككوز

"The Qazaq Times"