قوستاناي وبلىستىق ءماسليحاتىنىڭ كەزەكتەن تىس سەسسياسىندا دەپۋتاتتار قازىرگى  پرەزيدەنت توقاەۆتىڭ باستاماسىن قولداپ، شاھارداعى باستى كوشەلەردىڭ بىرىنە ەكس-پرەزيدەنت نۇرسۇلتان نازارباەۆ داڭعىلى اتاۋىن بەردى.

وڭىرلىك  «كوستانايسكيە نوۆوستي»  باسىلىمنىڭ حابارلاۋىنشا، قالاداعى ەڭ باستى كوشە اتاۋىن نازارباەۆتىڭ ەسىمىمەن اۋىستىرۋ ۇسىنىسىن قاراپايىم ازاماتتار بەرگەن.

بۇل تۋرالى قوستاناي وبلىستىق تىلدەردى باسقارۋ باسقارماسىنىڭ ديرەكتورى گۇلجان مەندەكينوۆا:

– قالالار مەن اۋداندارداعى نەگىزگى كوشەلەرگە نازارباەۆ اتىن بەرۋ باستاماسى كوتەرىلگەن. ەستافەتانى ءبىزدىڭ ءوڭىر دە قابىلدادى. وبلىستىڭ ءىرى كاسىپورىندارى، اۋىل شارۋاشىلىعى قۇرىلىمدارىنىڭ باسشىلارى، قالالىق اۆتوموبيل كولىگى كوللەدجىنىڭ ۇجىمى، جەكە ازاماتتاردان ۇسىنىس ءتۇستى. قوعامدىق تىڭداۋعا 250-دەن استام ادام قاتىستى، – دەدى.

رەسپۋبليكالىق ونوماستيكالىق كوميسسيا قوستانايداعى يۋري گاگارين كوشەسىنىڭ اتاۋىن نۇرسۇلتان نازارباەۆ داڭعىلىنا اۋىستىرۋ، ال گۆاردەيسكايا كوشەسىنە يۋري گاگارين ەسىمىن بەرۋ ۇسىنىسىن قاراستىرىپ، ماقۇلداعاندىعى تۋرالى شەشىم شىعارعان.

كەزەكتەن تىس وتكىزىلگەن ءماسليحات سەسسياسىندا بۇل شەشىمدى دەپۋتاتتار ادەتتەگىدەي ءبىراۋىزدان قولداپ داۋىس بەرگەن. تىلدەردى دامىتۋ باسقارماسى ديرەكتورىنىڭ سوزىنشە، ەسكى اتاۋمەن جازىلعان كوشە تاقتالارىن جاڭارتۋعا قاراجات بيۋدجەتتەن ەمەس، دەمەۋشىلەردىڭ ەسەبىنەن جۇرگىزىلەدى.

رەسپۋبليكالىق كولەمدەگى «قۇرمەتشىلىك ەستافەتاسى» تۋرالى وسىعان دەيىن 20 ناۋرىزدا قاسىم-جومارت توقاەۆ قازاقستان پرەزيدەنتتىگى لاۋازىمىنا انت بەرۋ راسىمىندە «قالالاردىڭ ورتالىق كوشەلەرىنە نۇرسۇلتان نازارباەۆ ەسىمىن بەرۋ قاجەت دەپ سانايمىن» دەپ ۇسىنىسىن بىلدىرگەن ەدى. مۇنى ايماقتارداعى اكىمدىكتەر ۇسىنىستى بۇيرىقتاي قادىرلەپ، ىلە-اشالا قولعا الدى. ناتيجەسىندە تۇگەلدەرلىك وبلىس ورتالىقتارى مەن ءىرى مەگاپوليستەردە نازارباەۆ داڭعىلدارى پايدا بولدى. ازاماتتىق قوعام وكىلدەرى مەن قوعام بەلسەندىلەرى قۋىقتاي كوشەگە الاشوردا باسشىسى ءا.بوكەيحاننىڭ ەسىمىن بەرىپ، دەكوممۋنيزاتسيالاۋعا جاتاتىن «باسى ارتىق» اتاۋلاردان ارىلۋدا قول بايلايتىن قۇجاتتىق-قارجىلىق ماسەلەلەردى «العا تارتقىش» جەرگىلىكتى اكىمدىكتەردى قاتاڭ سىنعا العان بولاتىن.

جيىرما جىلدىق تاريحى بار، تەرشەڭ مەحناتپەن، قۇيىلعان ميلليردتاعان قارجىمەن برەندكە اينالعان استانا اتاۋى «نۇر-سۇلتان» دەپ وزگەرتىلگەن كەزدە ەل ىشىندە قارسىلىق كوڭىل-كۇي جۇرگەنىنە قاراماستان، ۇلىق-شەندىلەر مەن زيالىلار شوعىرى باس يزەسىپ، «تابىلعان شەشىمگە» قولداۋ ءبىلدىرىپ جاتتى. جازۋشى نەسىپبەك ءداۋتاي «استانامىز قازاقتىڭ ماڭدايىنا بىتكەن تۇلعانىڭ ەسىمىمەن اتالعانى قۇپتارلىق ءىس» دەسە، بەلگىلى اقىن اققۇشتاپ باقتىگەرەەۆا «سىن ساعاتتاردان سۇرىنبەي وتكەن شىدامىڭىز بەن پاراساتىڭىزعا كۋامىز، ريزامىز» دەپ، بۇل شەشىمگە وڭ قارايتىنىن بىلدىرگەن ەدى. سونىمەن قاتار قوعامدىق پىكىرتالاس قىزعان تۇستا قازاقستان جازۋشىلار وداعىنىڭ توراعاسى، اقىن ۇلىقبەك ەسداۋلەت «ەلباسىمىزدىڭ ءوزى باس ساۋلەتشىسى بولعان استانا قالاسىنا نۇر-سۇلتان اتى بەرىلۋ جونىندەگى شەشىمدى ءوز تاراپىمنان تولىقتاي قولدايمىن!» دەپ اعىنان جارىلعان-دى.

"The Qazaq Times"