كەشە، تامىزدىڭ 26-سى قر پرەزيدەنتى قاسىم-جومارت توقاەۆتىڭ №133 جارلىعى شىعىپ، كۇللى تۇركى جۇرتىنىڭ ماقتانىشى، «مۇعالىم ءساني» (ەكىنشى ۇستاز) اتانعان عالىم-فيلوسوف ءابۋ ناسىر ءال-ءفارابيدىڭ 1150 جىلدىق (870-2020) مەرەيتويىن مەملەكەتتىك دەڭگەيدە اتاپ ءوتۋ تۋرالى قاۋلى جاريالادى.

2020 جىلى ءوتۋى ءتيىس اۋقىمدى شاراعا بايلانىستى ق.توقاەۆ ءال-ءفارابيدىڭ 1150 جىلدىق مەرەيتويىنا دايىندالۋ جانە وتكىزۋ جونىندەگى مەملەكەتتىك كوميسسيا قۇرۋ تۋرالى قاۋلىعا قول قويدى.

قاۋلىعا سايكەس، ءبىلىم جانە عىلىم مينيسترلىگى مەملەكەتتىك كوميسسيانىڭ نەگىزگى جۇمىس ورگانى بولماق. ۇكىمەت مەملەكەتتىك كوميسسياعا 2019 جىلدىڭ 1 قازانىنا دەيىن مەرەيتويدى وتكىزۋ جوسپارىنىڭ نوبايىن دايىنداپ، ۇسىنۋى ءتيىس. ال كوميسسيا جوسپاردى 2019 جىلدىڭ 1 قاراشاسىنا دەيىن بەكىتۋى كەرەك. جوسپاردىڭ جۇزەگە اسىرىلۋى پرەزيدەنت اكىمشىلىگىنە جۇكتەلگەن. كوميسسيا قۇرامىنا مينيسترلەر كابينەتىنىڭ وكىلدەرى، اكىم-قارالار، رەكتورلار مەن دەپۋتاتتار، تۇركسوي ديرەكتورى، «ەگەمەن قازاقستان» توراعاسى، پرەزيدەنت اكىمشىلىگى، كينورەجيسسەر احان ساتاەۆ پەن ءبىر عانا فارابيتانۋشى پروفەسسور اقمارال سىرعاقباەۆا ەنگەن. ءبىر قىزىعى، مۇشەلىكتە 85%-ى بيلىكتىڭ اتقارۋشى ماماندارى، ۇيلەستىرۋ ىستەرىنە تەك ءبىر عانا ونەر ادامى، ءبىر عانا فارابيتانۋشى قاتىستىرىلعان.

ەستەرىڭىزگە سالا كەتسەك، وسىدان ەلۋ جىل بۇرىن كەڭەستىك جانە اراب ەلدەرى عالىمدارىنىڭ تارتىسىندا عالىم اقجان ءال-ءماشانيدىڭ تاباندىلىعى مەن عىلىمي ىزدەنىسىنىڭ ارقاسىندا ءال-ءفارابيدىڭ قازاق جەرىنەن شىققاندىعىن بۇلتارتپاس ايعاقتارمەن دالەلدەنىپ، 1100 جىلدىق  مەرەيتويىن اتاپ ءوتۋ قازاقستاننان باستالعان ەدى.

شىعىستىڭ عۇلاما ويشىلى، امبەباپ عالىم ءابۋ ناسىر ءال-فارابي 870 جىلى بۇگىندە وتىرار اتالاتىن، ارىس وزەنىنىڭ سىرعا بارىپ قۇياتىن ساعاسىنداعى فاراب قالاسىندا دۇنيەگە كەلگەن (قازىرگى وڭتۇستىك قازاقستان وبلىسىنداعى وتىرار قالاسىنىڭ ماڭايىنداعى ورتاعاسىرلىق قالا). وتىرارداعى اسا باي كىتاپحاناسىندا ءال-فارابي پارسى، گرەك تىلدەرىن ۇيرەنەدى، وسى تىلدە عىلىمي تراكتاتتار وقىدى. فاراب پەن بۇقارادا باستاپقى ءبىلىم العان سوڭ ءال-فارابي ءوز ءبىلىمىن جەتىلدىرۋ ماقساتىندا باعداتقا اتتانادى. بىلىمگە دەگەن قۇشتارلىعىنىڭ ارقاسىندا ءال-فارابي سول ۋاقىتتاعى عىلىم مەن ءبىلىمنىڭ ورداسى سانالعان داماسك، حالەب، كاير، شاش، سامارقان، بۇحارا، مەرۆ، نيشاپۋر، رەي، حامادان قالالارىندا دا بولىپ، ءبىلىمىن ۇنەمى جەتىلدىرىپ وتىرعان. ارتىنان 150-گە جۋىق فيلوسوفيالىق جانە عىلىمي تراكتاتتار قالدىرعان ءال-فارابي 950 جىلدارى داماسكتە دۇنيە سالعان. «كەمەڭگەرلىك مەرۋەرتى», «ىزگى قالا تۇرعىندارىنىڭ كوزقاراسى», «ماسەلەلەردىڭ ءتۇپ مازمۇنى», «عىلىمداردىڭ شىعۋى», «باقىتقا جەتۋ», «ازاماتتىق ساياسات», «مەملەكەتتىك قايراتكەرلەردىڭ ناقىل سوزدەرى» سياقتى كوپتەگەن سىندارلى فيلوسوفيالىق ەڭبەكتەرى ءالى كۇنگە دەيىن ءوز ءمانىن جويماعان.

ەندىگى جىلى ەلىمىزدە ءال-فارابي مەرەيتويىمەن بىرگە اقىن اباي قۇنانبايۇلىنىڭ 175 جىلدىعى دا اتاپ وتىلمەك.

ءال-فارابي تۋرالى تۇسىرىلگەن "سەن بىلەسىڭ بە؟" وقۋ روليگىنەن پورترەت. فوتو: YouTube

الەم عالىمدارى ءال-فارابي جايلى

«ءال-فارابي اريستوتەلدىڭ «فيزيكاسىن» – قىرىق رەت، «ريتوريكاسىن» – ەكى ءجۇز، «جان تۋرالى» اتتى كىتابىن – ءجۇز رەت وقىعان ەكەن. نەتكەن تاڭعالارلىق ەڭبەك!»

گەگەل،
نەمىستىڭ ۇلى فيلوسوفى


«بۇكىل مۇسىلمان شىعىسىنىڭ اسا ۇلى ويشىلى ءال-فارابي وزىنەن بۇرىنعىلار تەك شەت پۇشپاقتاپ اينالاسقان كوپ ماسەلەلەر بويىنشا اسا زور جۇمىس تىندىردى. بۇل كەمەڭگەر ادام گرەك فيلوسوفياسىنىڭ ەڭ تەرەڭ قىرلارىنا دەيىن بويلاپ، بايىبىنا جەتتى. سوندىقتان دا شىعىستا فيلوسوفيانى عىلىمي زەرتتەۋدى شىن مانىندە باستاۋشى كىم دەگەندە، باسقا ەشكىم دە ەمەس، تەك سونىڭ ەسىمى اتالۋى كەرەك».

ا. ميۋللەر،
نەمىستىڭ شىعىس زەرتتەۋشىسى


«....سول بەلگىسىز بولىپ كەلگەن ويشىل-شىعىس فيلوسوفياسىنىڭ اتاسى ءال-فارابي ەدى».

ي.مادكۋر،
اراب فيلوسوفى


«ءسان-سالتانات قاۋىمىنان اۋلاقتا جانە ولاردىڭ كوزىنە تۇسپەي مۇسىلمانداردىڭ اسا ۇلى ويشىلدارىنىڭ ءبىرى ءالفارابي ءومىر ءسۇردى. ونىڭ مەديتسينا مەن مۋزىكا جايلى ەڭبەكتەرى عيبرات الارلىق اسقان ۇلگىلەر قاتارىنا قوسىلادى.ال، اراب فيلوسوفياسىندا سىڭىرگەن زور ەڭبەگى ونىڭ زاڭعار ەسىمىن ماڭگىلىك ەتتى».

ح.ا. گيبب،
اعىلشىن ءارابيسى


«ءال-فارابي كوپتەگەن سىندارلى شىعارمالار تۋعىزدى. فارابي مۇراسى ۇشاڭ تەڭىز جانە سان الۋان. ول سول تۇستاعى بۇكىل ءبىلىم سالالارىن، ەتيكانى، ساياساتتى، پسيحولوگيانى، جاراتىلىستانۋدى، مۋزىكانى وقىپ زەرتتەدى!...

ءال-فارابي تاماشا ماتيماتيك بولىپ، سول تۇساتعى تەوريالىق مەديتسينانىڭ بۇكىل قىرلارىن جەتىك مەڭگەردى. ول مۋزىكا تەورياسى جونىنەن كوپ ەڭبەكتەر جازدى. كومپوزيتور رەتىندە كەڭىنەن ءماشھۇر بولدى، جاڭا مۋزىكالىق اسپاپ شىعاردى».

ە.ە. بەرتەلس،
كورنەكتى شىعىس زەرتتەۋشىسى


«ءال-فارابي تەك اريستوتەلدىڭ ۇلكەن بىلگىرى عانا بولعان جوق، ول ورتا عاسىرلىق وي پىكىرگە اسا جاقىن، ءارى اسا قاجەتتى ءىس- اريستوتەليزىمدى نەوپلاتونيزممەن بايلانىستىرۋدى جۇزەگە اسىردى».

ن.ي. كونراد،
كورنەكتى شىعىس زەرتتەۋشىسى


«ورتاعاسىرلىق عىلىم تااريحىندا ءوزىنىڭ اۋقىمدى عىلىمي جۇمىستارى، تەرەڭ ءارى جان-جاقتى ەنتسيكلوپەديالىق ءبىلىمى جونىنەن ءال-فارابيمەن تەڭدەسە الاتىن عالىمدى تابۋ قيىن»

پ.ن. فەدوسەەۆ،
اتاقتى ورىس عالىمى


«ءال-ءفارابيدىڭ وزىنەن كەيىنگى مادەنيەتتىڭ دامۋىنا، اسىرەسە شىعىس ورتالىق ازيا، قازاقستان، كاۆكاز حالىقتارىنىڭ مادەنيەتتەرىنە اسەرى جان-جاقتى ءارى ۇزاق بولعان ەدى».

ب.ع. عافۋروۆ،
كورنەكتى شىعىس زەرتتەۋشىسى

ءال-فارابي ايتقان ەكەن...

بەلگىلى عالىم، ەتنوگراف ا. سەيدىمبەك قۇراستىرعان تاريحي تۇلعا، اسقان وقىمىستى ءال-فارابي بابامىزدىڭ تاپقىر سوزدەرىن نازارلارىڭىزعا ۇسىنامىز.

ءبىر كۇنى الدە كىم ءابۋ ناسر ءال-فارابيگە تاماشا بولىپ تولىسا پىسكەن المانى كورسەتىپ، ساۋال قويىپتى: «وسى المانىڭ ءبىتىم-بولمىسىنداعى جاقسى قاسيەت نە؟ ءتۇسى مە، شىرىنى ما، ءدامى مە، الدە ءبىتىمى مە؟» سوندا ءال-فارابي: «بارىنەن دە ونىڭ ۇرىعى تاماشا. ويتكەنى، وسى المانىڭ ءوزى سول ۇرىقتان ءوسىپ شىققان جانە ودان بۇكىل باق پايدا بولدى عوي!» – دەپ جاۋاپ بەرگەن ەكەن.

* * *

تاريحشى مۇحاممەد حۋسايني ەڭبەگىندە فارابي ومىرىنە قاتىستى مىناداي ءبىر قىزىق جايدى باياندايدى. ءال-فارابي بىردە داماسكىدەگى (سيريا) شىعىس بازارىن ارالاپ كەلە جاتىپ، تەرلەپ-تەپشىپ ەتىك تازالاپ وتىرعان بالاعا كوزى تۇسەدى.

– بالاقان، وسىنشا قينالىپ، ماڭداي تەرىڭدى توككەندە كۇنىنە قانشا ديرحام (اقشا) تاباسىڭ؟ – دەيدى فارابي. سوندا بالا:

– ەكى-اق ديرحام، – دەيدى مۇڭايىپ. ۇلى عالىم بالانى اياپ كەتەدى دە، وزىنە كۇن سايىن سايف اد-داۋلا جىبەرىپ تۇراتىن ءتورت ديرحامدى بەرەدى. كەيىنىرەك سول بالا ءفارابيدىڭ ەڭ جاقسى شاكىرتتەرىنىڭ ءبىرى بولعان ەكەن.

* * *

ءال-فارابي باعداتقا كەلگەندە وعان حاليفا مۇقتاديد يبن-مۋاففاك ءال-بيللاح (892-902) بىلاي دەپ سۇراق قويادى:

– وسى سەنى وقۋدىڭ تۇبىنە جەتىپتى دەپ ەستىدىم، سوندا سەن كوپ بىلەسىڭ بە، الدە اريستوتەل كوپ بىلە مە؟ سوندا ءال-فارابي:

− ەگەر مەن ونىڭ زامانىندا ءومىر سۇرگەن بولسام، ءشۇباسىز ونىڭ ۇزدىك شاكىرتتەرىنىڭ ءبىرى بولعان بولار ەدىم، – دەپ جاۋاپ بەرگەن ەكەن.

* * *

عىلىمنىڭ ءمانى تۋرالى اڭگىمە وربىگەن ءبىر وتىرىستا ءال-فارابيگە «دانىشپان كىم؟» دەگەن سۇراق قويىلىپتى. سوندا ءال-فارابي:

– «دانىشپان كىم؟» دەگەن سۇراققا مەن الدىنداعى ءومىرىن ۇمىتپاعان كىسى دەپ جاۋاپ بەرەر ەدىم. مەنىڭ الدىم – تۇڭعيىق. بۇگىن حاليفانىڭ قادىرمەندى قوناعى رەتىندە توردەمىن. ەگەر سىنىقتان سىلتاۋ شىقسا، ەرتەڭ كوردەمىن عوي. عىلىم مەن سوپىلىق بىرىنە ءبىرى قاراما-قارسى نارسە. عىلىم – شىندىق، سوپىلىق – سۇمدىق. بۇل – اقيقات، – دەگەن ەكەن. بۇل كەز باعدات حاليفاسى مۇتتاقيدان ءال-ءفارابيدىڭ ءزابىر كورىپ، قۋعىنعا ءتۇسىپ، باس ساۋعالاپ جۇرگەن كەزى بولسا كەرەك.

* * *

جولى ءتۇسىپ، تۋعان جەرى وتىرارعا قايتا ورالعان ءبىر شاقتا ءال-فارابي توڭىرەگىنە ەل بالالارىن جيناپ، ولاردى وقىتۋدى نيەت ەتەدى. كەشىكپەي-اق، عۇلاما جەرلەسىنىڭ الدىن كورۋگە جينالعان شاكىرتتەردىڭ سانى كوبەيە تۇسەدى. سونداي كۇندەردىڭ بىرىندە ءبىر جاس بالا ساباققا كەلگەندە، ونىڭ اتىن سۇراسا، ايتپايدى. جاس شاكىرت ەكى قولىن كوكىرەگىنە باسىپ، تاعزىم ەتىپ تۇرىپ بىلاي دەيدى:

– و، قادىرلى ۇستازىم، ءوز ەسىمىمدى ءوزىم اتاي الماۋىما مەن جازىقتى ەمەسپىن. اتا-انام بىلە تۇرا ماعان ءسىز سياقتى ۇلى ادامنىڭ اتىن قويىپتى. وسى اتىم ءۇشىن تالاي رەت وپىق جەدىم. بىرەۋلەر – قانداي جاقسى ەسىم، ەكىنشى ۇستازعا ۇقساساڭ يگى دەسە، ەندى بىرەۋلەر – قوراشىل توبەتتى ءبورباسار اتاسا دا تازى بولماس دەپ، مازاق ەتەدى.

–  جاقسى، بالام، ەسىمىڭ ءابۋ-ناسر ەكەن، ودان ءارى قالاي ەدى؟ – دەپ سۇرايدى فارابي.

– وسىعان يسمايل حاممەدۇلى دەگەندى قوسساڭىز بولادى.

– دۇرىس، – دەيدى فارابي، – ءابۋ ناسر يسمايل بين حاممەد. ءبىر ءابۋ-ناسر وقىتتى، ەكىنشى ءابۋ-ناسر وقىدى، وندا تۇرعان نە بار. ءبىر جاۋھاريدەن (عابباس بين سايد ءال-جاۋھاري وتىراردان باعداتقا بارعان ماتەماتيك، استرونوم، ءبايت ەل-حيكمەتتە پروفەسسور بولعان) وقىدىم، ەكىنشى ءجاۋھاريدى وقىتتىم دەپ، مەن دە ايتىپ جۇرەيىن. ءومىرىڭ ۇزاق بولعاي! بالام، عابباس جاۋھاريمەن قانداي جاقىندىعىڭ بار؟

– ول كىسى باباممەن – تۋاجات ەكەن، اكەممەن  – جۇرەجات، مەنىمەن – تۋمايجات بولادى. ءبىزدىڭ ارعى بابالارىمىز – اتالاس، تىپتەن، قۇلاجات – ءبىر اۋىل ەكەنبىز. جازعى جايلاۋىمىز ءبىر، تايپامىز – قاڭلى. نەگە ەكەنىن بىلمەيمىن، كوبىنەسە قىپشاق دەيتىنىن ەستىپ ءجۇرمىن، − دەپتى شاكىرت بالا. ءال-فارابيدەن وقىعان وسى بالا كەيىن كورنەكتى عالىم بولادى. باعداتتا ۇستازدىق ەتىپ، «سىحاق في-ل-لۇعات» دەگەن كىتاپ جازادى. وسى ەڭبەگى اراب ءتىلىنىڭ كوپتەگەن كەيىنگى سوزدىكتەرىنە نەگىز بولادى. ءابۋ-ناسر يسمايل بين حاممەد ءال-جاھاري (937-1003 جىلدار شاماسى) ءوز زامانىنىڭ بەلگىلى قايراتكەرى دە بولعان.

* * *

باعدات حاليفاسى حارۋن ءال-راشيد اقىندىق ونەر سايىسى مەن وقىمىستىلاردىڭ وي ورەلەستىرۋىن مەيلىنشە جاقسى كورگەن ادام ەكەن. كوپتەگەن ەل باسقارۋشىلار ۇلى حاليفاعا ەلىكتەپ وتكەن. بىردە ءال-راشيد سارايىندا ادەتتەگىدەي وي مەن ونەرسۇيەر قاۋىمنىڭ باس قوسۋى بولىپ جاتادى. بۇل قوسۋ ءراسىمىن ەڭ قۇرمەتتى ورىنعا جايعاسقان سۇلتان سەيف ءال-داۋلەت باسقارىپ وتىرسا كەرەك. ءبىر كەزدە حابارشى اياعىنىڭ ۇشىمەن باسىپ جاقىنداپ كەلەدى دە، سارايعا مۇحاممەد ءال-ءفارابيدىڭ كەلىپ تۇرعانىن حابارلايدى.

– ەسىمى تانىس قوي، دانىشپاندى كىرگىزىڭدەر! – دەپ ءامىر بەرەدى سۇلتان. ءابۋ-ناسر ءال-فارابي زالعا ءتاجىم ەتپەستەن كىرگەندە جينالعان جۇرت داعدارىپ قالادى.

– كەلىپ وتىرۋىڭىزدى وتىنەمىن، – دەيدى سۇلتان. – و، ۇلى ءامىرشى، قاي جەرگە وتىرايىن؟ – دەيدى ءال-فارابي.

– مۇندا اركىم وزىنە لايىق ورىنعا وتىرادى، – دەپ ءتىل قاتادى سۇلتان. مۇحاممەد ءال-فارابي سۇلتانعا جاقىنداپ كەلىپ، ونىڭ ارىرەك ىعىسۋىن ءوتىنىپتى. ءامىرشىنىڭ ساقشىلارى تىكسىنىپ قالادى. سۇلتان قوناعىنا ورنىن بوساتىپ بەرەدى دە، قىزمەتشىلەرىن تىنىشتاندىرىپ، سارايدىڭ قۇپيا تىلىندە بىلاي دەيدى:

– ەگەر بۇل شىنىمەن-اق ۇلى عۇلاما بولسا، كەشىرىم جاسايىق. ولاي بولماي شىقسا جازاسىن تارتادى. سابىر ساقتاڭدار! سوندا مۇحاممەد ءال-فارابي جىميىپ كۇلەدى دە:

– ايتقانىڭىز ءجون، ءامىرشىم، سابىرلىلىق ارقاشان دا دانىشپاندار مەن قۇدىرەتتىلەردىڭ ۇلەسىنە تيگەن، – دەپ، جاڭاعى قۇپيا تىلدە جاۋاپ قاتادى.

– ءسىز بۇل قۇپيا ساراي ءتىلىن قايدان بىلەسىز؟ – دەپ تاڭىرقايدى سۇلتان.

– مەن جەتى ءتىل بىلەمىن، – دەيدى مۇحاممەد ءال-فارابي.

– و، ءسوزدىڭ قادىرىن بىلەتىن ۇستازىم، وندا ءسوز باسى سىزدە بولسىن، قۇلاعىمىز سىزدە! – دەگەن ەكەن سۇلتان سەيف ءال-داۋلەت.

* * *

تۋعان جەردەن شالعايعا ءجۇرىپ،  بار ءومىرىن عىلىم-بىلىمگە سارپ ەتكەن ءال-فارابي  قارتايعان شاعىندا ءوز ەلىنىڭ كەرۋەن-كىرە تارتىپ جۇرگەن ادامدارىن كەزدەستىرىپ قاتتى تولقيدى. ەل-جۇرتتىڭ حال-جاعدايىن تاپتىشتەپ سۇراپ، كوڭىل ورنىقتىرعان سوڭ، قوشتاساردا ءوزىنىڭ جان سەرىگى – «قىپشاق» دەپ اتالاتىن دومبىراسىنىڭ بەتىنە: «اينالايىن اتام قىپشاق، تۋعان جەرىم ساعىندىم. ءوز اتىڭا، ۇرمەتىڭە قايدا جۇرسەم تابىندىم!» – دەپ جازىپ، تۋعان جەرى مەن ەلىنە سالەمدەمە بەلگى رەتىندە بەرىپ جىبەرگەن ەكەن دەيدى.

* * *

ءبىر جولى ءامىر سارايىندا اكىمدەر، عالىمدار مەن ونەرپازدار باس قوسقان سىر-سۇحبات كەشى ءوتىپ جاتسا كەرەك. وسى كەشكە جۇپىنىلاۋ كيىنگەن ءال-فارابي تاپ بولادى دا، ەلەۋسىز عانا ءبىر شەتتەن ورىن الادى. نەبىر تاپقىر ءسوز سايىستارى بولىپ، نەبىر ارقالى ونەر تۇرلەرى دەبەلە قوزدىرعان كەزدە جيىندى باسقارۋشى:

– قوناقتىڭ قانداي ونەرى بار ەكەن؟ – دەپ ءال-فارابيگە ءتىل قاتادى. سوندا ءال-فارابي ءوزى جاساعان «قىپشاق» دەپ اتالاتىن دومبىراسىن قورجىنىنان الىپ، قۇلاعىن كۇيلەپ تارتا جونەلەدى. العاشقىدا ورتەكەدەي ويناقتاعان ەركە كۇي جينالعان جۇرتتىڭ ءبارىن كۇلدىرىپ، ەلىكتىرىپ اكەتكەندەي بولادى. مۇنان ءارى دومبىراسىن باسقاشا كۇيلەپ، سۇڭقىلداتا زارلاتقاندا تىڭداۋشى قاۋىمنىڭ ارقايسىسى ءوز باسىنداعى قايعى-مۇڭمەن قاۋىشقانداي، كوزدەرىنە جاس الىپتى دەيدى. كەلەسى ءبىر تىنىستا، قىپشاق-دومبىرانىڭ قۇلاق كۇيى قوڭىر سازعا اۋىسىپ، جانعا راحات ۇنمەن بەسىكتەي تەربەگەندە تىڭداۋشىلار ماۋجىراپ، قالعي باستايدى. سول كەزدە «بۇل كۇيلەردى تارتقان – قىپشاق ءال-فارابي­­­­­­­» دەپ ءبىر پاراق قاعازعا جازىپتى دا، ءال-فارابي سارايدان شىعىپ جۇرە بەرگەن ەكەن دەيدى.

* * *

شىعىس امىرلەرىنىڭ ءبىرى ءال-ءفارابيدى سارايىنا ارنايى شاقىرىپ، مىنانداي ساۋال قويادى:

– ۋا، ەكىنشى ۇستاز، مەنىڭ مەملەكەتىمنىڭ بولاشاعى قانداي كۇيدە بولماق؟ بولجالىڭدى ەستىگىم كەلەدى، − دەيدى. سوندا ءال-فارابي:

– ەلىڭنىڭ بولاشاعىن بىلگىڭ كەلسە، ماعان جاستارىڭدى كورسەت، سونسوڭ ايتىپ بەرەيىن، − دەگەن ەكەن.

"The Qazaq Times"