«دەنى ساۋ ۇرپاق - جارقىن بولاشاق». بۇل - «تۇران سپورت گرۋپ» ۇجىمىنىڭ تۋ قىلىپ كوتەرگەن ۇرانى. جاي عانا ۇران ەمەس. ۇجىم سوعان ساي جۇمىس اتقارىپ كەلەدى. سونىڭ ءبىر دالەلى - تۇركىستان وبلىسى، تۇلكىباس اۋدانىنا قاراستى ساستوبە كەنتىندە بوي كوتەرگەن «ەر جانىبەك» باتىر اتىناعى شىنىقتىرۋ-ساۋىقتىرۋ سپورت كەشەنى.

اتالعان عيماراتتىڭ سپورت كۇنىنە وراي لەنتاسى قيىلىپ، اشىلۋ ءراسىمى ءوتتى. سالتاناتتى شاراعا اۋدان جۇرتى كوپ جينالدى. حالىقتىڭ قۋانىشىندا شەك جوق. اسىرەسە، ەل ەرتەڭى جەتكىنشەكتەردىڭ ءجۇزى باقىتتان بال-بۇل جانادى. ويتپەي شە، اۋداندا بوي كوتەرگەن الىپ سپورت كەشەنى تالاي بالانىڭ ارمانىنا قانات ءبىتىرىپ، قيىن دا قىزىقتى سپورت جولىنا كەڭ ەسىك اشقان ەدى.

قۇنى جارتى ميللياردقا جۋىق قارجىنى قۇرايتىن سپورت كەشەنى تۇركىستان  وبلىستىق  دەنە  شىنىقتىرۋ جانە  سپورت  باسقارماسى مەن  تۇلكىباس  اۋدانى  اكىمدىگى،  سونىمەن  قاتار، «تۇران سپورت گرۋپپ» كومپانياسىمەن ءۇش  جاقتى  كەلىسىمنىڭ  ناتيجەسىندە  سالىنعان. ال شىن مانىندە كەشەننىڭ بارلىق قارجىسىن كوتەرىپ، "تۋعان جەرگە تۋىڭدى تىك" باعدارلاماسى ارقىلى سالعان ازامات، كاسىپكەر، «تۇران سپورت گرۋپپ» قۇرىلتايشىسى ەسبول اۋەسبەكۇلى قامباروۆ مىرزا.

سپورت كەشەنى 240 ادامعا ارنالعان. شىنىقتىرۋ-ساۋىقتىرۋ ورتالىعى دەپ سانالاتىن عيماراتتا بوكس، دزيۋدو، ۇستەل تەننيسى، باسكەتبول، ەركىن كۇرەس تاعى باسقا سپورت تۇرلەرىمەن ەركىن اينالىسۋعا بولادى. سپورتشىلاردىڭ كيىم اۋىستىرۋ، جۋىنۋ سەكىلدى قاجەتتىلىكتەرىنە ىڭعايلى جاعداي جاسالعان. سونداي-اق، باپكەرلەر مەن مەدبيكەلەرگە ارنالعان بولمەلەر دە ەسكەرۋسىز قالماعان. وسى مىندەتتى موينىنا العان «تۇران سپورت گرۋپپ» كومپانياسى قۇرىلىستى بەلگىلەنگەن 11 ايدا ەمەس، ودان ەرتە 9 ايدا ءبىتىرىپ، پايدالانۋعا بەرگەن.

عيماراتتىڭ اشىلۋى جاس سپورتشىلاردى جەڭىس جولىنا باستايتىن جارىس قورىتىندىسىن جاريالاۋ راسىمىمەن تۇسپا-تۇس كەلدى. بوكستان 10 سالماق بويىنشا سىنعا تۇسكەن 80-گە جۋىق بىلعارى قولعاپ باھادۇرلەرى باق سىنادى. جەڭىمپازدارى جۇلدەلى ورىنعا كوتەرىلدى. ءتۋرينردىڭ باس  تورەشىسى بايقادام وماروۆتىڭ  ايتۋىنشا، جەڭىمپاز سپورتشىلار ەندىگى كەزەكتە  رەسپۋبليكالىق  جارىسقا  جولداما  الادى ەكەن. بايقاعانىمىزداي، جەڭىس تۇعىرىنا كوتەرىلگەن بوكسشى بالالاردىڭ دەنى "ەر جانىبەك" سوپرت كەشەنى اتىنان تۇسكەنى اڭعارىلىپ تۇردى...

سالتاناتتى شارانىڭ اشىلۋىنا دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ، وبلىستىق دەنە شىنىقتىرۋ جانە سپورت باسقارماسىنىڭ باسشىسى بولات قىرىقباەۆ، كسرو-نىڭ سپورت شەبەرى، قر ەڭبەك سىڭىرگەن جاتتىقتىرۋشىسى ماحامبەت ساپارباەۆ، عالىم، تۇركولوگ قارجاۋباي سارتقوجا، "ەر جانىبەك" حالىقارالىق قوعامدىق قورىنىڭ پرەزيدەنتى جەڭىس تۇركيا، اتالعان قوردىڭ سولتۇستىك ءوڭىر بويىنشا ۆيتسە-پرەزيدەنتى تولقىن اقان جانە تۇلكىباس اۋدانىنىڭ اكىمى نۇربول تۇرشابەكوۆ قاتارلى قۇرمەتتى قوناقتار قاتىستى.

"ەر جانىبەك باتىر بابامىز ابىلاي حان زامانىندا ەرەن ەرلىك كورسەتكەن، ەلگە تۇتقا، جەرگە قورعان بولعان تۇلعا. ول قابانباي، بوگەنباي، تۇرسىمباي جانە باسقا قازاق باتىلارىمەن بىرگە حالقىمىزدىڭ ۇلى كۇرەستەرىندە تۋ ۇستاپ، الدىڭعى شەپتە جۇرگەن قولباسشى. سوندىقتان، تۇلكىباس جەرىندە سالىناتىن وسى سپورت كەشەنىمىزگە باتىردىڭ اتىن بەرۋ تۋرالى وبىلىسقا، اۋدانعا ءوتىنىش حات جازدىق. ول كىسىلەر كەلىسىم بەرىپ، كەشەن باتىر بابامىزدىڭ اتىمەن اتالدى. بۇل ءبىز ءۇشىن ۇلكەن مەرەي. وسىنداي ۇلى تۇلعالاردىڭ، ءباھادۇر بابالارىمىزدىڭ رۋحى قولداپ، سپورت ورتالىعىنان ەلدىڭ اتىن اسپاناتىپ، الەم ارەنالارىندا تۋىن كوتەرەر تالاي جەڭىمپاز سپورتشىلا شىعادى دەگەن سەنىمدەمىز" - دەيدى ەسبول قامباروۆم مىرزا.

"ەر جانىبەك" حالىقارالىق قوعامدىق قورى تاراپىنان كەشەنگە باتىردىڭ ارنايى سالىنعان كارتيناسى تارتۋ ەتىلدى، سونداي-اق، جەڭىمپاز سپورتشىلاردىڭ موينىنا باتىر اتىنداعى مەدالدار تاعىلدى، قور ارقىلى شىعارىلعان كىتاپ-جۋرنالدار ۇلەستىرىلدى. ال، ەسبول قامباروۆقا قور پرەزيدەنتى جەڭىس تۇركيا قازاقتىڭ تاعى ءبىر داڭىقتى ۇلى، قولباسشىسى باۋىرجان مومىشۇلى اتىنداعى "نامىس" وردەنىن تابىس ەتتى.

ايتا كەتەيىك، بۇل سپورت كەشەنى - ەسبول قامباروۆ مىرزا باسقاراتىن ۇجىم سالعان ەكىنشى سپورت كەشەنى. ءۇشىنشى عيماراتتىڭ دا قۇرىلىسى ءجۇرىپ جاتقانىن ءبىلىپ، كەۋدەمىزدى ريزالىق سەزىمى بيلەدى. ۇلت سالاۋاتىن، ۇرپاق ساۋلىعىن تۋ ەتكەن وسىنداي ازاماتتاردىڭ بارى قۋانتتى.  ەر ەلىن ويلاعان، ەلى تاريحي تۇلعالارىن تۇگەندەپ، بەرەكە-بىرلىكتە ۇيىسقان وسىنداي يگى شارالار كوپ بولا بەرسىن دەگەن تىلەكتەن باسقا ايتارىمىز جوق.

مۇرات الماسبەك

"The Qazaq Times"