گونكونگ. بەيجىڭ مالىمدەمەسىنەن "سۋ اتقىش" كولىكتەرگە دەيىن

بەيجىڭ باعالاعان «قاتەرلى كەزەڭ»

Reuters اقپارات اگەنتتىگىنىڭ حابارلاۋىنشا، بۇگىن قىتايدىڭ گونكونگ جانە ماكاو ىستەرى جونىندەگى باسقارماسى ەكى جارىم اي بويى ءجۇرىپ جاتقان قارسىلىق شارالارى تۋرالى «انتيۇكىمەتتىك كوشە پروتەستەرى مەن زورلىق-زومبىلىقتارى توقتاتىلۋى ءتيىس قاتەرلى كەزەڭگە جەتتى»، – دەپ مالىمدەدى.

سوڭعى ونجىلدىقتاعى ەڭ اۋىر ساياسي داعدارىسقا تاپ بولعان گونكونگ مەملەكەت ورتالىعى بەيجىڭمەن بايلانىسۋى كوپشىلىكتىڭ الاۋداۋشىلىعىن تۋدىرۋدا. كەلىسىم بويىنشا قىتاي اسكەرىن تەك گونكونگ ۇكىمەتى كومەك سۇراعاندا عانا ەلگە كىرگىزە الادى.

3 كۇننەن بەرى گونكونگ حالىقارالىق اۋەجايىندا جالعاسىپ جاتقان كوپتىلدى فورماداعى قارسىلىق شاراسى. 12 تامىز 2019 جىل. گونكونگ. فوتو: Reuters.com

گونكونگتىق پوليتسياعا قارسىلىعىن ءبىلدىرىپ تۇرعان نارازى. 12 تامىز 2019 جىل. گونكونگ. فوتو: Reuters.com

سيمۆوليكالىق ماندەگى "بيلىك وبرازىن" تانىتقىسى كەلگەن نارازىلار حالىقارالىق اۋەجايدىڭ ۇشىپ كەلۋ زالىندا وتىر. 12 تامىز 2019 جىل. گونكونگ. فوتو: Reuters.com

بەيجىڭ  كەڭسەسىنىڭ وكىلى يان گۋان تەلەۆيزيالىق ۇندەۋ ارقىلى «نارازىلىقتى تاراتۋداعى پوليتسيا ارەكەتىن قولدايتىنىن ءارى قالاعا قامقورلىق تانىتۋشىلاردى زورلىق-زاڭسىزدىققا قارسى شىعۋعا» شاقىراتىنىن  مالىمدەگەن. زورلىق-زاڭسىزدىقتى قوزدىرۋشى قىلمىسكەرلەر مەن ۇگىتشىلەردى سىرتقى كۇشتەر، سونىمەن قوسا بريتانيا دەمەپ، ايداپ سالىپ وتىر دەپ سانايدى.

سۋ اتقىش كولىكتەر كورسەتىلىمى – سەس ءبىلدىرۋ

12 تامىز ستراتەگيالىق پوليتسيا بولىمشەسى جاريالى تۇردە پروتەستى باسۋعا ارنالعان سۋ اتقىش كولىكتەرىن كورسەتكەن.

پوليتسيانىڭ قارقىندى رەاكتسياسى مەن قىتاي پوزيتسياسىنىڭ كۇشەيۋىنە قاراماستان، وسىدان ەكى اي بۇرىن ەلدەن ەكستراديتسيالاۋعا رۇقسات بەرەتىن زاڭ جوباسىنا قارسىلىق تۇرىندە باستالعان قوزعالىس بۇرىنعىسىنشا 7 ميلليون ادامنان استام حالقى بار قالادا كەڭىنەن قولداۋ تابۋدا.

پوليتسيا باسقارماسىنىڭ قۋاتى 30-40 مەترگە دەيىن جەتەتىن سۋ اتقىش كولىكتىڭ كورسەتىلىمى. 12 تامىز 2019 جىل. گونكونگ. فوتو: Reuters.com

كەشە. كوزى جاساۋراعان نارازىلار: «گونكونگتى بوساتىڭدار!»

كەشە، جەكسەنبى كەشكىلىك گونكونگتىڭ ەكى اۋدانىنىڭ بىرقاتار كوشەلەرىندە سانكتسيالانباعان شەرۋگە شىققان دەمونسترانتتارعا پوليتسيا كوز جاساۋراتقىش گاز شاشقان. شام شۋي پو ىسكەرلىك ايماعىندا ۇستەرىنە قارا كويلەك كيگەن نارازىلار «گونكونگتى بوساتىڭدار» دەپ ۇرانداتىپ شەرۋلەتكەن. كوشە بويىندا وزگە تۇرعىندار قوسىلىپ، كولىك جۇرگىزۋشىلەرى سيگنال سالىپ، باس بارماقتارىن كوتەرىپ قولدايتىن راي تانىتقان. Reuters تىلشىسىنە 93 جاستاعى اكەسىن مۇگەدەك ارباعا وتىرعىزعان 63 جاسار ليۋن تەگىندەگى ازامات «ءبىز گونكونگتا ءومىر بويى تۇرىپ كەلەمىز. ءارى ءبىز ءۇشىن قازىر ەڭ قيىن شاق. سەبەبى بيلىك ءوز ازاماتتارىن تىڭدامايدى» دەپ وكىنىشىن بىلدىرگەن.

نارازىلاردىڭ ءبىرى «ءبىز كۇنى بويى جۇگىرىپ جۇردىك، بىراق ءبىز شارشامادىق»، – دەيدى قالا جيلەت كيگەن، حيرۋرگيالىق ماسكا تاعىنعان 30 جاستاعى اح سينگ ەسىمدى ازامات. ول «بۇل ءبىزدىڭ جاۋابىمىز، كەرري لام»، – دەپ اتادى بەيجىڭ تاراپىنان قولداۋ تاپقان قالا باسشىسىنىڭ ەسىمىن. «ەگەر ول ادامدارعا تىڭداعىسى كەلمەسە جانە ءبىزدىڭ ورىندى، كوڭىلگە قونىمدى قونىمدى تالاپتارىمىزعا جاۋاپ بەرمەسە، ءبىز نارازىلىقتى بۇكىل گونكونگقا جايۋدى جالعاستىرامىز» دەپ قورىتىندىلادى. ۆان چاي بولىگىندە جانارىنا شاشىلعان گازدان بەتىن كوز جاسى جۋىپ  كەتكەن 27 جاستاعى ونەر ءپانىنىڭ مۇعالىمى ۆيكتور «ءبىز قىتايدىڭ تولىقتاي باسىپ الۋىنا جول بەرگىمىز كەلمەيدى. ەگەر نارازىلار شەگىنسەر بولساق، بيلىك بىردەن سولاردىڭ قولىنا وتەتىن بولادى» دەيدى. كوۋلۋن ايماعىندا گاز بالوندارىن قولدانعان پوليتسيا ساقشىلارى تاي كۋ ستانتسياسى ماڭىندا نارازىلاردى دۋبينكامەن ساباعان. وقيعا ناتيجەسىندە 600-دەي ازامات ۇستالعان.

گونكونگ ۇكىمەتى نارازىلىقتاردى «زاڭسىز جيىندار» رەتىندە تانىپ، «بۇزاقىلاردىڭ» بەنزين بومباسىمەن پوليتسيا قىزمەتكەرىن جاراقاتتاعانىن مالىمدەگەن.

«وسى تۇراقتى ءارى اۋقىمدى زاڭسىزدىقتارعا ۇلاسقان جيىنداردى ۇيىمداستىرۋعا قاندايدا ءبىر ۋاقىتى تىركەلمەگەن جانە ارنايى ورىندار بەكىتىلگەن جوق»، – دەلىنگەن ۇكىمەت وكىلىنىڭ حابارلاماسىندا.

نارازىلار ۆان چاي اۋدانىندا پوليتسيا تاراپىنان تاستالعان كوز جاساۋراتقىش كانيستردى سوندىرۋگە تىرىسۋدا. 11 تامىز 2019 جىل. گونكونگ. فوتو: Reuters.com

ۆان چاي اۋدانىنداعى "ەكستراديتسيالاۋ تۋرالى جاڭا زاڭناماعا" قارسى نارازىلىق ءبىلدىرۋشى كوز جاساۋراتقىش قۇرالدى وشىرۋگە تالپىنۋدا. 11 تامىز 2019 جىل. گونكونگ. فوتو: Reuters.com

"The Qazaq Times"