قىرعىزستان كۇش قۇرىلىمدارى ەكس-پرەزيدەنت المازبەك اتامباەۆتىڭ قوي-تاس اۋىلىنداعى رەزيدەنتسياسىنا قايتا باسا كوكتەپ كىرگەن. بۇل تۋرالى BBC اگەنتتىگىنىڭ وزبەك قىزمەتى حابارلادى.
8 تامىز ساعات 16:30-دار شاماسىندا المازبەك اتامباەۆ جاعىنداعى 400-گە تارتا قولداۋشىلارى قۇقىق ورگاندارى وكىلدەرىنە تاس-تاياقتار مەن بەنزين قۇيىلعان بوتەلكەلەر اتقىلاۋ ارقىلى قارسىلىق كورسەتكەن. اتامباەۆقا تيەسىلى «اپرەل» تەلەارناسىنىڭ مالىمەتىنە قاراعاندا، ارنايى وپەراتسياعا مىڭداعان سارباز قاتىسقان. سونىمەن قاتار ارنايى قارۋلى جاساق كولىكتەرى قوي-تاستىق رەزيدەنتسيانىڭ قاقپاسىنا سوعىلىپ، جالىن تۇتانعان.
Sputnik قىرعىزستان اقپاراتتىق اگەنتتىگىنىڭ حابارلاۋىنشا، قاقتىعىستان سوڭ قۇقىق قورعاۋ ورگاندارى وكىلدەرى المازبەك اتامباەۆتى تۇتقىنداعان.
ال، قازىرگى پرەزيدەنت سوورونباي جەەنبەكوۆ قاۋىپسىزدىك كەڭەسىنىڭ جيىنىندا وقيعاعا قاتىستى كىنالىلەر جاۋاپقا تارتىلاتىنىن مالىمدەدى:
«ايتىلعان فاكتىلەر بويىنشا قىلمىستىق ءىس قوزعالدى. ايىپتىلار ءسوزسىز جاۋاپقا تارتىلادى. كەشەگە دەيىن اتامباەۆ تەرگەۋگە كۋاگەر ەسەبىندە شاقىرىلىپ كەلسە، ەندى ول اۋىر قىلمىسقا كۇدىكتى رەتىندە شاقىرىلاتىن بولادى».
باسسىزدىقتى تىيۋ ءۇشىن مەملەكەتتىڭ كۇشى مەن ساياسي ەركى جەتكىلىكتى ەكەندىگىن ايتقان پرەزيدەنت «بۇل ەكى ادامنىڭ تەكەتىرەسى ەمەس، جەمقورلىقتىڭ شەگى بولعان بارلىق قىلمىستىق ىستەردى اشۋعا، تەرگەۋدىڭ زاڭ اياسىندا تازا جۇرۋىنە، سوت پروتسەستەرىنىڭ ادىلدىگىن قامتاماسىز ەتۋىنە قارسى جاسالىپ جاتقان كۇرەس» دەدى.
بۇگىنگى قىرعىز ەلىنىڭ جاڭا ۇكىمەتى اتامباەۆتى كوررۋپتسيا دەرەگى جانە قىلمىستىق توپ سەركەسى ازيز باتۋكاەۆتىڭ زاڭسىز بوساتىلۋى، ءوز وكىلەتتىلىگىن اسىرا پايدالانۋ اەرەكەتى بويىنشا ايىپتاۋدا. دەگەنمەن باسى كۇدىككە ىلىككەن بۇرىنعى پرەزيدەنت بۇل ايىپتاۋلاردى نەگىزسىز دەپ بىلەدى، كەلىسپەيدى. وسى ۋاقىتقا دەيىن 3 رەت تەرگەۋگە شاقىرتىلعان ەكس-پرەزيدەنتتىڭ ۇيىنە 7 تامىز ارنايى جاساق ساربازدارى باسىپ كىرىپ، ۇستاماق بولعان. الايدا سوڭى قاقتىعىسقا ۇلاسقان وپەراتسيادا 1 جاۋىنگەر كوز جۇمىپ، 45 بەيبىت تۇرعىن جارالانعان ەدى.
قوي-تاس ەلدى مەكەنىندە ەكس-پرەزيدەنت ا.اتامباەۆتىڭ رەزيدەنتسياسى ورنالاسقان. 8 تامىز 2019 جىل. قىرعىزستان. فوتو: BBC Uzbek قىزمەتى
8 تامىز قۇقىق قورعاۋ ورگاندارىنىڭ ەكىنشى رەت قوي-تاسقا وپەراتسيا بارىسىمەن بارۋى. 8 تامىز 2019 جىل. قىرعىزستان. فوتو: sputnik.kg
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
Oyan, Qazaqstan قوزعالىسىنىڭ تاعى ءبىر بەلسەندىسىن پوليتسيا بولىمىنە شاقىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
قىرعىزستاندا تاۋەلسىز Kloop باسىلىمىنىڭ قىرعىز تىلىندەگى سايتى بۇعاتتالدى
ەكس-مينيستر ايەلىن ساباپ ءولتىردى دەگەن كۇدىكپەن ۇستالدى