ازاتتىق راديوسىنىڭ ءتىلشىسى نۇرگۇل تاپاەۆا.

ازاتتىق راديوسىنىڭ تىلشىلەرىنە بەلگىسىز بىرەۋلەر شابۋىل جاسادى.

بۇگىن، 22 شىلدەدە ازاتتىق ءتىلشىسى نۇرگۇل تاپاەۆا مەن وپەراتور توقمولدا قۇسايىنوۆقا بەلگىسىز بىرەۋلەر شابۋىل جاسادى. ازاتتىق تىلشىلەرى تاڭەرتەڭگى ساعات 11-دە الماتىداعى ادام قۇقىقتارى مەن زاڭدىلىقتى ساقتاۋ بيۋروسىنداعى ءباسپاسوز جيىنىنا بارعان. عيماراتتىڭ ءبىرىنشى قاباتىندا جۋرناليستەرگە تارپا باس سالعان بەس ايەل ازاتتىق تىلشىلەرىنە قول جۇمساپ، تەحنيكاسىن ءبۇلدىردى.

ازاتتىق تىلشىلەرى بۇگىن ادام قۇقىقتارى مەن زاڭدىلىقتى ساقتاۋ بيۋروسىنداعى "مەملەكەت انالار جانە بالالارمەن كۇرەسىپ وتىر" دەگەن تاقىرىپتا ءوتۋى ءتيىس ءباسپاسوز جيىنىنا بارعان. بۇل جيىندى ۇيىمداستىرۋشىلارى ەلدە تىيىم سالىنعان "قازاقستاننىڭ دەموكراتيالىق تاڭداۋى" قوزعالىسى (قازاقستان بيلىگى سىناۋشى، قازىر شەتەلدە تۇراتىن قۋعىنداعى بۇرىنعى بانكير مۇحتار ءابليازوۆ قۇرعان) قىزمەتىنە قاتىسى بار دەگەن كۇدىكپەن تۇتقىندالعان الماتىلىق كوپ بالالى انا وكسانا شەۆچۋك پەن جالعىزباستى انالار گۇلزيپا جاۋكەروۆا مەن جازيرا دەمەۋوۆانىڭ ۇستەرىنەن قوزعالعان ىستەردىڭ ءمان-جايىن ايتپاقشى بولعان ەدى.

"جيىن باستالماس بۇرىن جيىرماعا جۋىق ايەل كەلدى. ولار شۋ شىعارىپ، ءباسپاسوز جيىنىنا كەلگەن جۋرناليستەردىڭ كامەراسىن، ۇيالى تەلەفوندارىن تارتىپ الۋعا ارەكەت قىلدى. جيىنعا كەلگەن وزگە دە ادامدارعا شابۋىل جاسادى" دەدى بيۋرو وكىلى سەرگەي دۋۆانوۆ.

وقيعا بولعان جەرگە پوليتسيا كەلدى. ازاتتىق راديوسى مەن قازتاگ اگەنتتىگىنىڭ تىلشىلەرى ارىز جازىپ جاتىر.

"The Qazaq Times"