19 شىلدە تۇندە ورمۋز بۇعازىندا يران بيلىگى ەكى بريتاندىق كەمەنى باسىپ الدى. ۇستالعان ەكى كەمەنىڭ بىرىندە – بريتان تۋى، ەكىنشىسىندە ليبەريا تۋى ءىلىنگەن

ۇلىبريتانيانىڭ سىرتقى ىستەر ءمينيسترى دجەرەمي حانت ورمۋز بۇعازىندا كەمەلەر قوزعالىسىنا شەكتەۋ قويىلسا، بۇدان يران جاعى كوبىرەك زارداپ شەگەدى دەپ ەسكەرتتى. وسىعان وراي وتكەن قاۋىپسىزدىك ماسەلەلەرىنە ارنالعان ۇكىمەتتىڭ شۇعىل وتىرىسىندا حانت كەمەلەردى باسىپ الۋعا جول بەرۋگە بولمايدى دەدى.

يران تارابىنىڭ مالىمدەۋىنشە، بريتانيالىق Stena Impero مۇناي تانكەرى جۇما كۇنى تۇندە حورموزگان پروۆينتسياسىنىڭ ايلاق جانە تەڭىز ۇيىمىنىڭ وتىنىشىمەن ۇستالعان. وعان حالىقارالىق تەڭىز ەرەجەلەرىن بۇزدى دەگەن ايىپ تاعىلىپ وتىر.

ايتا كەتەر جايت، Stena Impero تانكەرى شۆەتسيالىق Stena Bulk كومپانياسىنا تيەسىلى. ول ساۋد ارابياسىنا بەت العان. ەكيپاج بورتىندا 23 مۇشە بار.

"The Qazaq Times"