م.و. اۋەزوۆ اتىنداعى ادەبيەت جانە ونەر ينستيتۋتىندا وتكەن كونفەرەنتسيا. فوتو: QT

بۇگىن م.و. اۋەزوۆ اتىنداعى ادەبيەت جانە ونەر ينستيتۋتىندا "الەم ادەبيەتى تەورياسى قازاق تىلىندە" اتتى كونفەرەنتسيا ءوتتى. كونفەرەنتسيادا كىرىسپە جانە 4 تومدىق انتولوگيادان تۇراتىن "ادەبيەت تەورياسى" جيناعى تانىستىرىلدى. 

امانتاي ءشارىپ جانە جانات اسكەربەك اۋدارما بارىسى جانە جاڭا ۇسىنىستار تۋرالى ايتتى. فوتو: QT. .

شەتەلدىك ادەبيەتشىلەر قاۋىمى مەن جوعارى وقۋ ورىندارىندا الەم ادەبيەتى تەورياسىنىڭ نەگىزى ەڭبەگى رەتىندە تارالعان  "ادەبيەت تەورياسى" تومدىعى قازاق ادەبيەتى مەن ونىڭ بولاشاعى ءۇشىن ۇلكەن جاڭالىق دەۋگە بولادى. وندا شەتەلدىك 75 اۆتوردىڭ شىعارمالارىنا تالداۋ جاساي وتىرىپ، الەم ادەبيەتىنىڭ جالپى تەورياسى تۇسىندىرىلەدى.  بۇگىنگى كونفەرەنتسيادا اتالعان ەڭبەكتىڭ اعىلشىن تىلىنەن قازاق تىلىنە اۋدارىلۋ بارىسى، اۋدارما ساپاسى مەن جاڭا عىلىمي ۇعىمدار، تەرميندەر قولدانىسى جايىندا اۋدارما ىسىنە ارالاسقان اۋدارماشىلار مەن رەداكتورلار، ادەبيەتتانۋشى ماماندار، تانىمال عالىمدار مەن عىلىمي قىزمەتكەرلەر كەڭىنەن سويلەپ ءوتتى.

اۋدارما ىسىنە ارالاسقان اۋدارماشى، زەرتتەۋشىلەر. فوتو: QT.

اتالعان بەس تومدىق ەڭبەكتى قازاق تىلىنە اۋدارۋدىڭ جالپى رەداكتسياسىن باسقارعان ف.ع.د كەنجەحان ماتىجانوۆ جيناقتاعى سترۋكتۋراليزم، فەنومەنولوگيا، پستسترۋكتۋراليزم، پسيحواناليز ۇعىمدارى جانە وتارشىلىقتان كەيىنگى ادەبيەت پەن ترانسۇلتتىق تانىم تۋرالى ءسوز قوزعادى. امانتاي ءشارىپ اۋدارۋ ءىسى كەزىندەگى بارىسىن ايتا وتىرىپ، ادەبيەتشىلەر قاۋىمىن جيناقتىڭ قازاق تىلىندە جارىق كورۋىمەن قۇتتىقتادى. سونداي-اق، ول بۇل ەڭبەكتىڭ قازاق تىلىندە شىعۋىن "قازاق ادەبيەتى تەورياسىنداعى رەۆوليۋتسيالىق سەكىرىس" دەپ باعالادى.

اسەت قۇرانبەك جاڭا ۇسىنىستارىن ورتاعا سالدى. فوتو: QT.

جانات اسكەرحان حانىم جيناقتاعى جاڭا اعىمدار، جاڭا تانىمداردىڭ كەي تۇسىن قازاق ادەبيەتى ءۇشىن ۇلكەن جاڭالىق ەكەنى، ءتىپتى مۇلدە قابىلداۋ قيىن تۇستارىنىڭ دا بار ەكەنىن ەسكەرتە كەلىپ، ونى جەتكىزۋ مەن جالپىلاستىرۋدىڭ، وقىتۋدىڭ جاڭا جوباسىن جاساۋ كەرەك دەگەن ويدى ۇسىندى. ادەبيەت عانا ەمەس عىلىم مەن ءبىلىمنىڭ وركەندەۋىنە اۋدارمانىڭ ۇلكەن ۇلەس قوساتىنىن ەرتەدەگى گرەك، ريم وركەنيەتتەرىنىڭ، يسلام الەمنىڭ دامۋ كەزەڭدەرىنەن مىسال كەلتىرگەن اسەت قۇرانبەك اۋدارمانى دامىتۋدى توقتاتپاۋ كەرەكتىگىن ايتتى. ول جانە عالىمدارىمىز بەن ادەبيەتتانۋشىلاردى قولداۋدى كۇشەيتۋ كەرەكتىگىن باسا ايتتى.

جاڭا جيناق الداعى ۋاقىتتا كىتاپحانالارعا تاراتىلادى. فوتو: QT.

جيناق الداعى ۋاقىتتا ۇلتتىق كىتاپحانالار مەن جوو ورىندارىنىڭ كىتاپحانالارىنا جەتكىزىلمەك. جيىنداعى عالىمدار مەن زەرتتەۋشىلەر، اۋدارماشى ماماندار جيناقتىڭ قازاق تىلىندە جارىق كورۋىمەن بارلىق ادەبيەتشىلەر قاۋىمىن قۇتتىقتادى.

قۇندى اۋدارما م.و. اۋەزوۆ اتىنداعى ادەبيەت جانە ونەر ينستيتۋتى، ل. گۋميلەۆ اتىنداعى ەۆرازيا ۇلتتىق ۋنيۆەرسيتەتى قازاق ادەبيەتى كافەدراسى بىرلەسە وتىرىپ، "رۋحاني جاڭعىرۋ" باعدارلاماسىنىڭ ءبىر پاراسى بولعان "جاڭا گۋمانيتارلىق ءبىلىم – قازاق تىلىندەگى 100جاڭا وقۋلىق" جوباسى اياسىندا شىققانىن ايتا كەتەيىك.

“The Qazaq Times”