كۇندەلىكتى ومىردە "جانىم كوزىمە كورىندى" نەمەسە "بار ءومىرىم كوز الدىمنان سىرعىپ ءوتتى" دەگەن تىركەستەردى باسىمىزدان وتكەن قورقىنىشى، قاتەرلى جاعىدايلاردى سيپاتتاعاندا قولدانىپ جاتامىز. جانە شىن ءولىم الدىندا ادامنىڭ وتكەن ءومىرى كوزىنە كورىنەتىندىگى جايلى دا تالاي ەستىگەن بولارسىز. ەندى بۇل قۇبىلىس جايلى عىلىمدا نە ايتىلعان جانە ول قالاي بولادى؟ 

ادامنىڭ كوزىنە بار وتكەن ءومىرىنىڭ كورىنۋى شىنىمەن بولاتىن قۇبىلىس ەكەندىگىن عالىمدار دالەلدەپ وتىر. ادامنىڭ ميىنا بەلگىلى ءبىر قاۋىپ تۋرالى حابار كەلگەندە نەمەسە كلينيكالىق ءولىم كەزىندە ميعا جازىلعان بارلىق اقپارات كورىنەدى. بۇل زەرتتەۋ ناتيجەلەرىن يزرايلدىك عالىمدار Consciousness and Cognition باسىلىمىندا جاريالاعان.

"حاداسسا" اتتى يەرۋساليمدىك ەمحانادا اتالمىش قۇبىلىستى تولىققاندى زەرتتەۋ ءۇشىن قاراپايىم ادامداردىڭ باستارىنان وتكەن كلينيكالىق ولىمدەر مەن اجالدان امان قالعان 7 جاعىداي الىنىپ وتىر.

بۇل ءساتتى  باسىنان وتكەرگەندەردىڭ بارلىعىنىڭ ايتۋىنا قاراعاندا، وتكەن جاعىدايلار بەلگىلى ءبىر ۋاقىت اياسىنا سايكەس كەلمەيدى جانە سول ساتتە  بولعان وقيعاعا قاتىسقان ادامداردىڭ بارلىعىنىڭ سەزىمدەرىن سەزىنە الادى ەكەن.

گيپوكسيا اسەرىنەن تۋىندايتىن تۇس سەكىلدى كورىنىستەر - ادامنىڭ ەستە ساقتاۋ قابىلەتىنە جاۋاپ بەرەتىن مي بولىكتەرىندەگى قاننىڭ ءالسىز اينالىمىنان تۋىندايدى. سونىمەن قاتار، بۇل كورىنىستەر دەجاۆيۋ مەن قاراپايىم ەستەلىكتەرگە ۇقساس كەلەدى.

ميدىڭ ءولۋى. فوتو: svetnsk.ru

مامانداردىڭ تۇجىرىمداماسىنا سايكەس، ءولىم الدىندا نەمەسە كلينيكالىق ءولىم كەزىندە ادامنىڭ كوز الدىنان بارلىق ءومىرىنىڭ ءوتۋى - ساۋ پسيحيكاعا ءتان نەيروكوگنيتيۆتى مەحانيزمنىڭ شوعىرلانعان  ۆارياتسياسى اسەرىنەن بولاتىن قۇبىلىس ەكەن. 

ولەر الدىنداعى ادامنىڭ وسيەت ايتاتىنى دا وتكەن ءومىرنىڭ بار كارتيناسى كوز الدىنا كەلگەسىن جاقىندارىنا سوڭعى ىستەرىن تاپسىراتىن بولۋى كەرەك. قالاي دەسەكتە اجالدىڭ ءتۇسى اپپاق ءارى جاپ جارىق بولادى دەگەن تۇسىنىكتى جوققا شىعارا المايمىز. اۋەلدە قاپ-قاراڭعى تۇنەككە جول العان جان كوز قاراتپاس جارىققا ەرىپ كەتەدى دەيدى عىلىمدا. سول اجالعا اپارار اق جارىق بالكىم وتكەن ءومىردىڭ جارقىن كارتيناسى سەكۋندىنا نەشە ميليارد كادر بولىپ زاۋلاپ وتە شىققانداعى جارىق بولۋى مۇمكىن.

“The Qazaq Times”