الماتى قالاسىندا عالىم جايلىبايدىڭ «سۇلۋبايدىڭ ءانى» كىتابىنىڭ تۇساۋكەسەرى ءوتتى. «ەر جانىبەك» حالىقارالىق قوعامدىق قورىنىڭ قولداۋىمەن جارىق كورگەن كىتاپ قازاق، تۇرىك، ورىس جانە اعىلشىن تىلىندە جارىق كورگەن.

«سۇلۋبايدىڭ ءانى» اتتى داستاننىڭ تۇساۋىن حالىق جازۋشىسى قابدەش ءجۇمادىلوۆ، اكادەميك، ءدىنتانۋشى ءابساتتار قاجى دەربىسالى، كورنەكتى جازۋشى مارال ىسقاقباي، مەملەكەتتىك سىيىلىقتىڭ يەگەرى ءسابيت دوسانوۆ، جازۋشىلار وداعىنىڭ توراعاسى ۇلىقبەك ەسداۋلەت، ۇيعىر ادەبيەتىنىڭ اقساقالى احمەتجان ءاشيري، ارداگەرلەر كەڭەسىنىڭ توراعاسى حاميت ءبىرجانوۆتار كەستى.

بۇدان بولەك شاراعا قوعام قايراتكەرلەرى، كورنەكتى اقىن، جازۋشىلار، اكادەميكاتەر بالتاش تۇرسىنباي، دانداي ىسقاق، حانكەلدى ءابجانوۆ، بيبىگۇل يمانعازينا، كۇلاش احمەتوۆا، يسلام جەمەنەي، تىنىمباي نۇرماعانبەتوۆ، بەيبىت قويشىباي، جاقاۋ داۋرەنبەك، ءۋاليحان قاليجان، تەمىرحان تەبەگەنوۆ، نۇرتىلەۋ يمانعالي، كەنجەحان ماتجان، جۇماباي باياحمەت، ءجادي شاكەن، الماس احمەتبەك، ماعيزا قۇناپيا سىندى ازاماتتار مەن الماتى اكىمىنىڭ كەڭەسشىسى ماماي احلەت جانە كىتاپحانالار جۇيەسىنىڭ قىزمەتكەرلەرى، جوو-نىڭ تۇلەكتەرى قاتىستى.

عالىم جايلىباي، اقىن: «سۇلۋبايدىڭ ءانى» كىتابىنىڭ جازىلۋىندا قىتاي قازاقتارىنان جەتىپ جاتقان ءتۇرلى حابارلار اسەر ەتكەن بولۋ كەرەك... مەن ەندى ول جاقتى كوپ ارالاعان قازاقتىڭ ءبىرىمىن. سۇلۋباي دەگەن اقىن وتكەن. وسپان باتىردىڭ كوتەرىلىسىنە قاتىسقان. 37 جاسىندا وپات بولعان. سول كىسىنىڭ:

« باسىندا ماۋەسى جوق قۋ قايىڭنىڭ،

جىگىتكە پايداسى جوق ۋايىمنىڭ.

سان جەردىڭ ءدامىن تاتىپ، سۋىن ءىشتىم،

بىلمەيمىن قايدا الارىن قۇدايىمنىڭ.

قايقايا شاپقان قاراگەر،

قايرىلار ما ەكەن قارا جەر» - دەگەن ءانى بار. سول قاتتى اسەر ەتتى. جالپى، مەن كوپ ىزدەندىم. سەگىز بولىمنەن تۇراتىن پوەما جازىپ شىقتىم. بۇنىڭ ىشىندە كوپ دۇنيە بار دەپ ويلايمىن.

ءجۇرسىن ەرمان، اقىن: بۇگىن قازاقتىڭ كورنەكتى اقىنى عالىم جايلىبايدىڭ «سۇلۋبايدىڭ ءانى» دەگەن كىتابىنىڭ تۇساۋىن كەسەيىن دەپ تۇرمىز. عالىم كىتاپ شىعارماي جۇرگەن ادام ەمەس. سوڭعى جىلدارى شىعارمالارى مولىنان جارىق كورىپ ءجۇر. مىنا كىتاپتىڭ ەرەكشەلىگى، بۇل ءتورت تىلدە جارىق كورگەن كىتاپ. «سۇلۋبايدىڭ ءانى» دەگەن داستانى قازاقشا، تۇركىشە، ورىسشا، اعىلشىنشا باسىلىپ، باسپادان قانات قاعىپ ۇشىپ، حالىقتىڭ قولىنا ءتيىپ جاتىر. بۇل داستاننىڭ تاقىرىبى دا كۇردەلى. قازىر ءبىزدىڭ ارعى بەتتەگى قانداستارىمىزدىڭ باسىنا كۇن تۋىپ تۇرعان كەزدە دەر كەزىندە جازىلعان كىتاپ. قازاقتىڭ ارعى بەتتە دە ءبىراز باتىرلارى بولعان. كەشەگى وسپان باتىر، زۋقا باتىرلار تاۋەلسىزدىك ءۇشىن ارپارىسقان. مىنا سۇلۋباي دا باتىر، سەرى، سال، تاعدىرى شەرلى ادام. سول سەبەپتى بۇنى شەرلى داستان دەپ اتاۋعا بولادى. سول سۇلۋبايدىڭ بىزگە جەتكەن ءانىنىڭ نەگىزىندە اقىننىڭ جۇرەگىنە شوق بولىپ تۇسكەن. بۇل ءالى تالاي اڭگىمەگە ارقاۋ بولاتىن داستان. جالپى، عالىم داستان جازۋعا بەيىمدەلىپ جۇرگەن ۇلكەن اقىندارىمىزدىڭ ءبىرى.

جەڭىس تۇركيا، «ەر جانىبەك» قورىنىڭ پرەزيدەنتى: بۇگىن شىعىپ وتىرعان «سۇلۋبايدىڭ ءانى» كىتابى وتكەن عاسىردىڭ 1930-1940 جىلدارى قىتايدىعى قازاق حالقىنىڭ تاعدىرىن بۇگىنمەن ۇشتاستىرعان كەڭ كولەمدە جازىلعان ۇلكەن شىعارما دەپ وتىرمىز. جالپى، بۇل پوەما، تاريحي رومان ەمەس. سوندىقتان وندا ادامنىڭ سەزىمى، تابيعاتى، ەرلىگى تۋرالى تولىق باياندالعان دەپ ايتا الامىن. قازاقي جۇرەگى بار ادامدارعا بۇل وتە تۇسىنىكتى، تىڭ تۋىندى.

 

"The Qazaq Times"