كەشە الماتىداعى «الاتاۋ» ءداستۇرلى ونەر تەاترى ءوزىنىڭ العاشقى سپەكتاكلىنىڭ تۇساۋىن كەستى. «جىر-جولبارىس» اتتى مۋزىكالىق سپەكتاكل حالىق اۋىز ادەبيەتىنىڭ وتكەن عاسىرداعى الىبى جامبىل جاباەۆتىڭ ومىرىنەن كورىنىس تاپقان. جاس تەاتر العاشقى ساحنالىق قويىلىمىندا جامبىلدىڭ XIX عاسىردىڭ سوڭعى شيرەگىندەگى ءومىرىن، تۇلعالىق، ازاماتتىق بولمىسىن زاماناۋي ساحنالىق بەينەلەۋ تاسىلدەرىمەن جەتكىزۋگە تىرىسقان.

جامبىل مەن كەنەسارىۇلى سىدىق تورە. فوتو: فوتو: QT.

تالانتتى جاس دراماتۋرگ ءانناس باعداتتىڭ پەساسىن جۇماباي شاشتايۇلى كەڭەسشىلىك ەتىپ، ەسلام نۇرتازين ساحنالاعان. بەكبولات نۇرقاسىموۆ مۋزىكامەن ارلەپ، اسەل اباقاەۆا بيمەن ساندەگەن.

قۇلمانبەت پەن جامبىل. فوتو: QT.

قويىلىم ءداستۇرلى قانىق بوياۋىمەن، مۋزىكالىق تەرەڭ وبرازىمەن، جاڭا ساحنالىق بەينەلەۋ تاسىلدەرىمەن، ەشكىمگە ۇقساماعان جاڭا بوياۋ-بوگەنايىمەن تۇساۋكەسەرگە جينالعان كورەرمەننىڭ ىقىلاسىنا بولەندى.

قازاقستاننىڭ حالىق ءارتيسى، م. اۋەزوۆ اتىنداعى قازاق مەملەكەتتىك اكادەميالىق دراما تەاترى ديرەكتورىنىڭ كەڭەسشىسى ە. وباەۆ قويىلىم سوڭىندا تەاتر مۇشەلەرىن، ارتيستەرى مەن رەجيسسەرلەرىن جانە كورەرمەندى جاڭا تەاترمەن قۇتتىقتادى. «بۇل تەاتردىڭ وزگەشەلىگى سوندا، ەشكىمگە ۇقسامايتىن، ەشكىمدى قايتالامايتىن، ەشبىر اكادەميزمدى قابىلداماعان، ءوزىنىڭ شەشىمىمەن جۇرە العان. ۇلتتىق ماعىناداداعى قويىلىمى ۇلكەن سۋرەتكەرلىك، وبرازدى دەتالداردى جاقسى قولدانىپسىزدار»، – دەدى.

ە. وباەۆ تەاتر ارتيستەرىن قۇتتىقتادى. فوتو: QT.

ەسمۇحان وباەۆ ۇلتتىڭ تاريحي الىپ تۇلعالارىنىڭ بىرىنە اينالعان جامبىلدى تاقىرىپ ەتىپ، ساحنالىق شىعارما جازۋعا باتىلدىق ەتكەن اننەس باعداتتى القادى. ونىڭ جامبىل ءومىرىن ءبىر سىدىرعى جەتكىزبەستەن، كەدەرگىلەر ارقىلى، سول كەزدەگى قاۋىم، جالپى قازاق ارقىلى الىپ كەلىپ، تۇلعانى اشالاپ جەتكىزگەن شەبەرلىگىن تىلگە تيەك ەتتى. سونىمەن بىرگە، قويۋشى رەجيسسەرى ەسلام ءنۇرتازيندى، رەجيسسەر-حورەوگراف  اسەل اباقاەۆا، مۋزىكالىق سۇيەمەلدەۋدەگى وبرازدىلىق ءۇشىن بەكبولات نۇرقاسىموۆ جانە جامبىل ءرولىن سومداعان اسەت ەسجان قاتارلى تەاتر ارتيستەرىن القادى.

فوتو: QT.

“The Qazaq Times”