فوتو: Forbes.kz

ازىرگە الماتىدا جولايرىق سالىناتىن ورىندى ساتىپ الاتىن اقشا  جوق. بۇل تۋرالى قالالىق جەر قاتىناستارى باسقارماسى باسشىسىنىڭ ورىنباسارى ارداق سامامبەتوۆ مالىمدەدى. ونىڭ ايتۋىنشا، بيىلعى جىلى 79 جەر تەلىمى يەسىنە 2 ملرد تەڭگە كولەمىندە وتەماقى بەرىلۋى ءتيىس ەدى. الايدا رەسپۋبليكالىق بيۋدجەتتەن قاجەتتى قاراجات ءالى بولىنبەپتى. سوندىقتان ولار تۇرعىندارعا وتەماقى تولەي الماي وتىر ەكەن.

الماتى قالاسى جەر قاتىناستارى باسقارماسى باسشىسىنىڭ ورىنباسارى ارداق سامامبەتوۆ. فوتو: 24.kz

ء"بىز وسى جىلى رەسپۋبليكالىق بيۋدجەتكە ءتيىستى بيۋدجەتتىك ۇسىنىس جاساعان بولاتىنبىز. الايدا رەسپۋبليكالىق بيۋدجەتتىك كوميسسيانىڭ شەشىمى بويىنشا، بىزگە قاجەتتى اقشا بەرىلگەن جوق. سوندىقتان وتەماقى تۇرعىندارعا تولەنبەدى. الايدا ءبىز ول سۇراقتى باقىلاۋدا ۇستاپ وتىرمىز. بيىل تاعى دا ءتيىستى بيۋدجەتتىك ۇسىنىس بەرىلەدى. تۇرعىندارعا وتەماقىنى وسى جىلى تولەي الماساق، كەلەسى جىلى بەرۋگە تىرىسامىز!"

وتكەن جىلى قالا بيلىگى جولايرىق قۇرىلىسىنا قاجەتتى 28 جەر تەلىمىن ساتىپ الىپتى. ول ءۇشىن مەملەكەتتىك قازىنادان 1,9 ملرد تەڭگە بولىنگەن ەكەن. جوسپار بويىنشا، ءالى 200-دەن اسا ءۇي ءسۇرىلۋ كەرەك. جولايرىق قۇرىلىسىن الماتى اكىمدىگى 2019 جىلى اياقتايمىز دەگەن. الايدا قارجى ءبولۋ ماسەلەسى تاپ وسىلاي سيىرقۇيىمشاقتانا بەرسە، وندا ۋادە ەتىلگەن ماگيسترال ۋاقىتىلى سالىنبايتىن سىندى.

تۇرعىندار وتىرىك ايتادى

قالالىق جەر قاتىناستارى باسقارماسى باسشىسىنىڭ ورىنباسارى ارداق سامامبەتوۆ ۇيلەرى سۇرىلەتىن تۇرعىندار جۋرناليستەرگە جالعان اقپارات بەرگەن دەيدى. سوزىنشە، اكىمدىك تاراپىنان تەلىم يەلەرىنە ۇيلەرىڭدى جاقىن ارادا بوساتىڭدار دەگەن تاپسىرما بەرىلمەپتى. ولار قاجەتتى قارجى بولىنبەيىنشە، ونداي ەسكەرتۋ جاساي المايمىز دەگەندى ايتتى. سوندىقتان بار ايىپتى تۇرعىنداردىڭ وزىدەرىنە ارتىپ وتىر:

"ونداي حابارلاما بولعان جوق. ويتكەنى، وسىنداي حابارلاما بەرىلۋ ءۇشىن ءتيىستى بيۋدجەتتىك ۇسىنىس قاناعاتتاندىرىلۋى كەرەك. اقشا تۇسپەيىنشە، ءبىز ونداي حابارلاما بەرە المايمىز"

جانسۇگىروۆ پەن سەيفۋللين كوشەلەرىنىڭ قيىلىسىندا ورنالاسقان ءۇيدى ءسۇرۋ جۇمىستارى. فوتو: QT

الماتىدا ۇيلەرى سۇرىلەتىن تۇرعىندارعا وتەماقى بەرىلمەي جاتقانىن كەشە حابارلاعان ەدىك. اكىمدىك ۋادە ەتكەن سوڭ، ونداعى جۇرت دۇنيە-مۇلكىن بۋىپ-ءتۇيىپ، باسقا ورىننان باسپانا قاراستىرىپ تا قويعان. قوجايىندارىمەن كەلىسىپ، الدىن الا كەپىلاقى تولەپ ۇلگەرىپتى. ءتىپتى ارالارىندا 1 ملن تەڭگە بەرگەندەرى دە بار ەكەن. بىراق اكىمدىك وتەماقىنى كەشىكتىرگەن سوڭ، الگى قوجايىندارى ءۇيدى باسقا ادامدارعا ساتىپ جىبەرىپتى.

“The Qazaq Times”