الماتىدا ۇيلەرى سۇرىلەتىن تۇرعىندار وتەماقى الا الماي ءجۇر. ولار اكىمدىك قىزمەتكەرلەرى تولەم جاساۋدى وتكەن جىلى ۋادە ەتكەن دەيدى. الايدا سودان بەرى شەندىلەردەن ەش حابار جوق. ولار اشىنعان جۇرتپەن ءتىپتى تىلدەسكىلەرى دە كەلمەيدى ەكەن. بار ايتارى - قازىنادا قاراجات قالمادى دەۋمەن شەكتەلەدى.

جوسپار بويىنشا، بىلتىر الماتىدا قوس جولايرىقتىڭ قۇرىلىسى باستالۋى كەرەك ەدى. قاجەتتى جەر تەلىمدەرىن الۋ ءۇشىن مەملەكەتتىك بيۋدجەتتەن 7 ملرد تەڭگەدەن اسا قاراجات قاراستىرىلىپتى. وسى اقشاعا 300-دەن اسا ەسكى ءۇي ساتىپ الىنىپ، كەيىن بۇزىلاتىن بولعان. الايدا بۇل ءىستىڭ ۇزاققا سوزىلاتىن ءتۇرى بار. ويتكەنى، قالا اكىمدىگى اۋەلدە ۋادە ەتكەن اقشالارىن تۇرعىندارعا ءالى تولەمەگەن.

فوتو: QT

جولايرىقتىڭ ءبىرى نازارباەۆ پەن جانسۇگىروۆ كوشەلەرىن بايلانىستىرسا،  ەكىنشىسى جانسۇگىروۆ پەن سەيفۋلين كوشەلەرىنىڭ قيىلىسىندا ورىن تەبۋى ءتيىس ەدى. وتكەن جىلى قۇرىلىس كومپانياسى 30-عا جەتەعابىل ءۇيدى ءسۇرىپ، ءبىراز اۋماقتى بوساتىپتى. بىراق قالعاندارىنا اقشا بەرىلمەگەن سوڭ، الگى قۇرىلىس تۇرالاپ قالعان.

فوتو: QT

ەلدىڭ ەسىن ەكەۋ، ءتۇسىن تورتەۋ قىلعانداردىڭ بۇل قىلىعى - تۇرعىنداردى شىعىنعا باتىرىپتى. ولار ءۇيىمىز سۇرىلەتىن بولعان سوڭ، قالانىڭ باسقا جەرىنەن باسپانا قاراستىرىپ قويدىق دەيدى. قوجايىندارىمەن كەلىسىپ، الدىن الا كەپىلاقى تولەپ تە قويعان. ارالارىندا 1 ملن تەڭگە بەرگەندەرى دە بار ەكەن. بىراق اكىمدىك وتەماقىنى كەشىكتىرگەن سوڭ، الگى قوجايىندارى ءۇيدى باسقا ادامدارعا ساتىپ جىبەرىپتى.

فوتو: QT

باستاپقىدا ارنايى كومپانيا وكىلدەرى جەر ۇيلەردى تومەن باعالاپتى. بىرەۋىنە 5 ميلليون، ەندى بىرىنە 7 ميلليون تەڭگەدەن ارتىق اقشا بەرمەيمىز دەگەن. وسىدان كەيىن، تۇرعىندار اكىمدىكپەن سوتتاسىپ، ءۇي باعاسىن نارىقتاعى قۇنمەن ەسەپتەۋ كەرەكتىگىن دالەلدەپتى. اقىر سوڭىندا بۇقارا اۋداندىق سوتتا جەڭىسكە جەتىپ، تالاپ ەتكەن وتەماقىلارىن كوپ كەشىكپەي الاتىن بولعان. بىراق اكىمدىك قىزمەتكەرلەرى سوت ۇكىمىن دە پىسقىرمادى.

فوتو: QT

اكىمدىككە الدانىپ قالدىق دەگەن تۇرعىندار - ەندى كىمگە بارىپ شاعىمدانارىن بىلمەيدى. ولاردىڭ مۇددەسىن قورعاپ جۇرگەن زاڭگەرلەر دە سوت شەشىمى نەگە ورىندالماي جاتقانىن تۇسىنبەيدى. قىزىلكەڭىردەك بولعان ەل ەندىگى كۇنىنە ەلەڭدەپ جۇرگەندە، توڭىرەكتى تونايتىندار كوبەيىپ كەتىپتى. ال وسىعان دەيىن بۇزىلىپ بولعان تامدار قاڭعىباستاردىڭ تۇنەيتىن ورنىنا اينالعان.

“The Qazaq Times”