گەرمانيا رەسەيدى قولداۋعا كوشتى. ولار ورىستارعا ەكىنشى گاز قۇبىرىن سالدىرۋعا رۇقسات بەرىپ، ارزان ءونىم تۇتىنباق. وسىلايشا، گەرمانيا رەسەيدىڭ قىرىمدى ۋكراينادان تارتىپ الۋىنا  قارسىلىق بىلدىرمەيتىنىن اڭعارتتى. مۇنىڭ سوڭى - گەرمانيا مەن اقش اراسىنداعى تىرەسكە ۇلاسۋى بەك مۇمكىن. ەكىنشى ماسەلە، ەۋروپالىق وداق ورىس وليگارحتارىنىڭ باتىس ەلدەرى  بانكتەرىندەگى رەسەيدەن "جىمقىرىلعان قارجىلاردى بۇعاتتاۋ" ارەكەتتەرى. ءۇشىنشى ماسەلە، باتىستا ترانسلياتسيا جاسايتىن رەسەي تەلەارنالارىنىڭ جۇمىسىن "جالاڭ ناسيحات" ، "جالعان اقپاراتتاردى تاراتۋ -پروپاگاندا" دەپ باعالاۋى. ولاي بولسا، رەسەي تەلەديدارىنىڭ جۇمىسىن ەۋروپالىق وداقتا توقتاتۋ ماڭىزدى دەپ ەسەپتەلەدى. سونىمەن، رەسەيگە ەكىنشى گاز قۇبىرىن سالۋعا رۇقسات بەرىلسە، بىراق رەسەي گازىن ساتىپ الۋعا رۇقسات بەرمەۋى مۇمكىن. رەسەيدىڭ اقشاسىن بۇعاتتاسا، رەسەي تەلەديدارىن ەۋروپادا توقتاتسا، بۇل شارالار ءپۋتيننىڭ جاعدايىن جەڭىلدەتپەيدى. اتالعان جاعدايلار قازاقستانعا قانشالىقتى اسەر ەتەدى؟

الدىمەن، ۋكرايناعا اۋىز سالعان رەسەي ءبىزدىڭ سولتۇستىك ولكەلەرگە دامەلى ەكەنى بەلگىلى. سوندىقتان پۋتيندىك رەسەيدىڭ اگرەسسيۆتىك سىرتقى ساياساتى قىسپاققا الىنعانى بىزگە قولايلى. باتىستىڭ ەكىنشى شاراسى دا ءبىزدىڭ وڭ جامباسقا كەلەدى. رەسەي الپاۋىتتارىنىڭ "زاڭسىز جينالعان اقشالارى" تاركىلەنسە، رەسەيدەگى داعدارىستىڭ كۇشەيۋىنە اكەلەدى. رەسەيدىڭ "كوررۋپتسيا جولىمەن جينالعان قارجىلارى" قازاقستانعا "ينۆەستيتسيا بولىپ كەلىپ، ەلىمىزدىڭ ستراتەگيالىق سالالارىن قاداعالاۋدا". ءبىز دە رەسەيدىڭ "ۇرلىقتان جينالعان اقشالارىن ينۆەستيتسيا ەمەس", "ۇرلانعان اقشا" دەپ باعالاپ، بۇعاتتاۋىمىز كەرەك. ءۇشىنشى ماسەلە - رەسەيدىڭ يمپەريالىق، وتىرىكشىل ناسيحاتىنىڭ ەۋروپاداعى جابىلۋى ءبىزدىڭ اقپاراتتىق ساياساتتى وزگەرتۋ كەرەكتىگىن دالەلدەيدى. قازاقستان رەسەي تەلەارنالارىن وتاندىق مەديا كەڭىستىگىندە بۇعاتتاۋ كەرەكتىگىن كۇن تارتىبىنە قويىپ وتىرسا. سول سياقتى "حابار" تەلەارناسى تەك قازاقشاعا ءوتىپ، قازاقتى ورىستاندىرۋ ساياساتىن توقتاتسا. باتىس بوسقادان بوسقا ورىستىڭ ناسيحاتىنان بەكەر بەزىپ وتىرعان جوق. سونىمەن رەسەي تەلەديدارىن، ولاردىڭ ۋداي زاۋالدى ناسيحاتىن بۇعاتتاۋ بىزگە دە ماڭىزدى.

“The Qazaq Times”