سەربيا تاۋلى-قاراباق ماسەلەسىندە قاشان دا ازىربايجانمەن بىرگە – دەپ حابارلايدى oxu.az اقپارات كوزى.

جەرگىلىكتى باق وكىلدەرىنىڭ مالىمەتىنشە، مامىر ايىنىڭ 22-ءى كۇنى سەربيا پرەزيدەنتى الەكساندر ۆۋچيچ ءازىربايجان ماجىلىسىندە تاۋلى-قاراباق ماسەلەسىنە قاتىستى ءسوز سويلەگەن. وندا ول: «ءازىربايجان سەربيانىڭ جاقىن دوسى. ءبىز تاۋلى-قاراباق ماسەلەسىندە قاشان دا ازىربايجانمەن بىرگەمىز. سەربيا ءازىربايجاننىڭ تەرريتوريالىق تۇتاستىعىن قولدايدى» - دەپ مالىمدەگەن.

ەستەرىڭىزگە سالايىق، ءازىربايجان مەن ارمەنيا اراسىنداعى تاۋلى-قاراباق جانجالى 1988 جىلى باستالعان. ەكى ەل اراسىنداعى سوعىس ءورتىنىڭ تۇتانۋىنا تاۋلى-قاراباق اۆتونوميالىق اۋدانىنداعى ارميان حالقىنىڭ ءازىربايجان سسر-نان ءبولىنىپ، ارمەنيا سسر-نا قوسىلۋ باستاماسى سەبەپ بولعان. 1988 جىلى تاۋلى-قاراباقتاعى ارميان حالقى ارمەنيا سسر-نىڭ قولداۋىمەن اۋدانداعى ءازىربايجانداردى اياۋسىز باسىپ-جانشىعان. سالدارىنان ءازىربايجان حالقى باكۋگە قونىس اۋدارىپ، سوندا تۇراتىن ارميان دياسپوراسىنان كەكتەرىن العان. بىراق ولاردىڭ بۇل ىستەرىنە كەڭەس ۇكىمەتى بەيجاي قاراپ وتىرماعان. 1990 جىلدىڭ 19 قاڭتارىندا  كرەملدىڭ بۇيىرىعى بويىنشا، جەرگىلىكتى بيلىكتىڭ كەلىسىمىنسىز باكۋگە اسكەر كىرگىزىلگەن.  بۇل تاۋلى-قاراباق جانجالىن ودان سايىن ۋشىقتىرعان. ءازىربايجان مەن ارمەنيا اراسىنداعى سوعىس 1994 جىلعا دەيىن جالعاسقان. تاۋلى-قاراباق ارمەنيا قۇرامىنا كىرگەنىمەن رەسمي باكۋ ونى ءالى كۇنگە دەيىن مويىندامايدى. وسى تۇستا ايتا كەتەتىن ءبىر جايت، وسىدان بىرنەشە جىل بۇرىن ارمەنيا بيلىگى قازاقستاندى تاۋلى-قاراباق اۋدانىن مويىنداۋعا شىقىرعان. بىراق استانا رەسمي ەرەۆاننىڭ بۇل ۇسىنىسىن قاناعاتتاندىرماعان.

“The Qazaq Times”