وڭتۇستىك قازاقستان وبلىسىندا 2,3 مىڭ گەكتار ورماندى القاپ جاقىندا جەكە كومپانيانىڭ قولدانىسىنا بەرىلۋى مۇمكىن. ولار جاسىل جەلەكتەردى جاپىرىپ، قۇنارلى جەردەن ۋران ىزدەۋگە كوشكەلى جاتىر. بۇل تۋرالى قازتاگ اقپارات اگەنتتىگى حابارلادى.

ەل ۇكىمەتى ءتيىستى قاۋلى قابىلداپ تا قويعان. وسى ايدىڭ سوڭىنا دەيىن بۇل ماسەلە قوعام تالقىسىنا ءتۇسىپ، كوپشىلىك قولداسا، ورماندى القاپ تولىعىمەن جاپىرىلماق. ىزىنشە بوساعان ورىن "قاراتاۋ" سەرىكتەستىگىنە بەرىلەدى. ولار الگى اۋماقتا ۋران بايىتۋدى جوسپارلاۋدا. ال، كەسىلگەن اعاشتاردىڭ وتەمى رەتىندە مەملەكەتكە 80 ملن تەڭگە تولەۋگە مىندەتتەلەدى ەكەن.

بىلتىر جەلتوقسان ايىندا "قازاتومپروم" ۇلتتىق كومپانياسى ەلدە ۋران ءوندىرىسىن 20 پايىزعا ازايتاتىندارىن مالىمدەگەن ەدى. ولار مۇنداي شەشىم قابىلداۋعا - ۋران قورىنىڭ ازايىپ بارا جاتقانى تۇرتكى بولدى دەگەن.

“The Qazaq Times”