بيىلدان باستاپ مەكتەپ تۇلەكتەرى ۇبت-نى اعىلشىن تىلىندە تاپسىرادى

ءساۋىر ايىنىڭ 25-ءى كۇنى حالىقپەن كەزدەسۋ بارىسىندا ءبىلىم جانە عىلىم ءمينيسترى ەرلان ساعاديەۆ: «بيىل تۇلەكتەر ۇبت-نى اعىلشىن تىلىندە تاپسىرا الادى. قازىردىڭ وزىندە 200-گە جۋىق بالا اعىلشىن تىلىندە تەست تاپسىرۋعا ءوتىنىش ءبىلدىردى. بىراق بۇعان قاراماستان ۇبت زاڭى وزگەرمەيدى. وقۋشىلار بۇرىنعىسىنشا بەس پاننەن تەست تاپسىرادى. ولاردىڭ ۇشەۋى نەگىزگى ءپان دە، قالعان ەكەۋى تاڭداۋ ءپانى» - دەگەن.

بۇدان بولەك ەرلان ساعاديەۆ استانا قالاسىنداعى جوو-دا بولعان IELTS سەرتيفيكاتىن زاڭسىز الىپ وقۋعا تۇسكەن 117 ستۋدەنتتىڭ داۋىنا بايلانىستى جۋرناليستەر الدىندا جاۋاپ بەردى. وندا ول: «ستۋدەنتتەردىڭ ءبىر بولىگى سوتقا شاعىمداندى. دەسە دە، زاڭ ورىندالۋى ءتيىس. ۋنيۆەرسيتەتتەردىڭ ولاردى وقۋدان شىعارعانى دۇرىس» - دەگەن.

“The Qazaq Times”