وزبەكستان پرەزيدەنتى شاۆكات ميرزيەەۆقا قاستاندىق جاساماقشى بولعان قىرعىزستان ازاماتى 15 جىلعا باس بوستاندىعانان ايىرىلدى.

Turmush باسىلىمىنىڭ مالىمەتىنشە، وش قالالىق سوتى وزبەكستان پرەزيدەنتى شاۆكات ميرزيەەۆقا قاستاندىق جاساماق بولعان جووش-قارا-سۋ اۋدانىنا قاراستى گايرات اۋىلىنىڭ 1988 جىلعى تۇرعىنىن قىرعىزستان قىلمىستىق كودەكسىنىڭ 27-226 بابىنىڭ 2 تارماعى، 241 بابىنىڭ 2 تارماعى  جانە 299-1 بابىنىڭ 3 تارماعى بويىنشا كىنالى دەپ تانىپ، 15 جىلعا باس بوستاندىعىنان ايىرعان. تەرگەۋ جۇمىستارى بارىسىندا وعان تاعىلعان ايىپتار تولىقتاي دالەلدەنگەن.

تەرگەۋ مالىمەتىنشە، 1988 جىلى دۇنيەگە كەلگەن س.د ەسىمدى ازامات 2013 جىلدان بەرى قاشقار-قىشتاق ەلدى مەكەنىندەگى مەشىتتەردىڭ بىرىنە ءجيى بارعان جانە مەشىت يمامى ونى سول ۋاقىتان بەرى سۇرياعا جيھادقا بارۋعا ۇگىتتەگەن. بىراق ول سۇرياعا وتباسىلىق جاعدايلارىنا بايلانىستى بارا المايتىندىعىن ايتقان. وسىدان كەيىن اۋىل يمامى مەن ونىڭ جاقتاستارى سۇرياعا وزدەرى اتتانعان. بىراق س.د ەسىمدى ازاماتپەن بايلانىستارىن ۇزبەگەن. 2017 جىلى س.د ەسىمدى ازامات ءسۇريا اۋماعىنداعى «دجاممات-تاۋحيد ۆا جيھاد» تەررورلىق ۇيىمىمەن بايلانىسقا شىققان. ۇيىم مۇشەلەرى وعان وش پەن بىشكەك قالاسىندا تەررورلىق شابۋىل ۇيىمداستىرۋعا جانە لاڭكەستىك شابۋىل وزبەكستان پرەزيدەنتى شاۆكات ميرزيەەۆتىڭ بىشكەككە جاساعان ءىس-ساپارى كۇنى بولۋى ءتيىس دەگەن تاپسىرما بەرگەن. الايدا ول تەررورلىق ۇيىمنىڭ بۇل تاپسىرماسىن ورىنداي الماعان. سەبەبى ونى 2017 جىلدىڭ  قىركۇيەك ايىنىڭ 3-ءى كۇنى قىرعىزستان ارنايى قىزمەتى تۇتقىنعا العان.

“The Qazaq Times”