گازا شەكاراسىندا 6 اپتاعا سوزىلاتىن نارازىلىق شەرۋ باستالدى. فوتو: AFP.

گازانىڭ دەنساۋلىق ساقتاۋ مينيسترلىگى جاريالاعان مالىمەتتە، يزرايلدىڭ ارتيللەريالىق شابۋىلىنان ءبىر پالەستينالىق جاي بۇقارانىڭ مەرت بولعانى ءمالىم بولدى. وسىدان كەيىن حاماس جانە وزگە دە پالەستينالىق ۇيىمداردىڭ ۇيىمداستىرۋىمەن جاپپاي حالىقتىق ەرەۋىل باستالدى. حابارلارعا قاراعاندا دەمونستراتسيا 6 اپتاعا دەيىن جالعاسپاق. بۇل تۋرالى BBC ونلاين قىزمەتى حابارلادى.

پالەستينا جاقتىڭ مالىمەتىنە سەنسەك، گازانىڭ سولتۇستىگىندە ەگىنشىلىكپەن اينالىسىپ جۇرگەن ديحان يزرايل قارۋلى كۇشتەرىنىڭ شابۋىلىنان قازا تاپقان. ال، يزرايل ارمياسىنىڭ مالىمەتىندە شەكارادا ەكى پالەستينالىق ازامات قاۋىپسىزدىك پەن شەكارالىق ءتارتىپتى بۇلدىرۋگە ارەكەت ەتكەنى ايتىلعان.

پالەستينا مەن يزرايل اراسىنداعى شيەلەنىس قايتادان ۋشىعا تۇسۋدە. سوڭعى كىسى ولىمىنەن كەيىن ەكى تاراپ كەزەكتەسكەن ايىپتاۋلارىن جولداۋدا. بۇعان دەيىن پالەستينالىق ۇيىمدار «قايتا ورالۋ» دەپ اتالاتىن دەمونستراتسيا ۇيىمداستىرۋعا دايىندالىپ جاتقان ەدى. 6 اپتاعا جالعاساتىن دەمونستراتسيا يزرايل شەكاراسىنا جاقىن ماڭدا باستالىپ كەتتى.

حاماس جانە وزگە پالەستينالىق ۇيىمدار شەكاراعا جاقىن ماڭدا شاتىرلار تىگىپ، لاگەرلەر تۇرعىزدى. ولار بۇل نارازىلىق شاراسى بەيبىت تۇردە وتەدى دەپ سەندىردى. مالىمەتتەرگە قاراعاندا 10 مىڭنان استام پالەستينالىق اتالعان شەرۋگە شاقىرىلعان. دەگەنمەن شەرۋگە قاتىسۋشىلار سانى 30 مىڭ ادامنان اسىپ كەتكەن.

يزرايل تارابى شەكاراداعى قارۋلى كۇشتەردىڭ سانىن كوبەيتۋدە جانە شەرۋشىلەرگە شەكاراعا جاقىن كەلمەۋدى ەسكەرتىپ جاتىر. يزرايل تارابى گازامەن شەكتەسكەن اۋماقتى «ەرەكشە اۋماقتار» دەپ اتاپ، پالەستينالىقتاردى شەكارا اۋماعىنا جاقىن جولاتپايدى. 1948 جىلى يزرايل مەملەكەتى قۇرىلعاننان بەرى ءجۇز مىڭداعان پالەستينالىق مۇسىلماندار ەرىكسىز جەر اۋدارىلىپ كەتتى.

 “The Qazaq Times”