مارك تسۋكەربەرگ ءبىر كۇندە 6 ميلليارد دوللارىنان ايىرىلدى – دەپ حابارلايدى نەمىس تولقىنى اقپارات اگەنتتىگى.

اگەنتتىك مالىمەتىنشە، ناۋرىز ايىنىڭ 19-ى كۇنى تسۋكەربەرگكە تيەسىلى «Facebook» كومپانياسىنىڭ قۇندى قاعازدارى ءبىر كۇننىڭ ىشىندە 8 پايىزعا قۇنسىزدانعان. كومپانيا اكتسيالارىنىڭ قۇنسىزدانۋىنا ۇلىبريتانيالىق «Cambridge Analytica» كومپانياسىنىڭ «Facebook» الەۋمەتتىك جەلىسىنىڭ 50 ميلليونعا جۋىق قولدانۋشىلارىنىڭ جەكە اقپاراتتارىن پايدالانۋى سەبەپ بولعان.

بۇعان دەيىن «Facebook» دەرەكتەردى ساراپتاۋمەن اينالىساتىن «Cambridge Analytica» كومپانياسىن 50 ميلليون قولدانۋشىنىڭ جەكە اقپاراتتارىن ۇرلادى دەپ ايىپتاعان. بىراق بۇل «Facebook» تاريحىنداعى ەڭ شۋلى داۋلاردىڭ ءبىرى عانا. 2016 جىلى Facebook اقش پرەزيدەنت سايلاۋى كەزىندە قازىرگى مەملەكەت باسشىسى دونالد ترامپتىڭ شتابىمەن بىرگە جۇمىس ىستەگەن. كەيىننەن باق بەتتەرىندە «ترامپ شتابى سايلاۋ كەزىندە Facebook كومپانياسىنان العان اقپاراتتاردى پايدالانۋ ارقىلى ءوزىنىڭ سايلاۋ الدى باعدارلاماسىن جاساعان»، - دەگەن اقپارات تاراعان.

“The Qazaq Times”