قازاقستان التىن قورى بويىنشا ءۇش ساتىعا كوتەرىلدى

قر ۇلتتىق بانكى التىن ۆاليۋتا قورى بويىنشا التىن كولەمىن كوبەيتۋ جۇمىستارىن جالعاستىرۋدا. 

دۇنيەجۇزىلىك التىن كەڭەسىنىڭ مالىمەتى بويىنشا، 2018 جىلعى 1 ناۋرىزدا قازاقستاننىڭ التىن ۆاليۋتا قورىنداعى قىمبات مەتال قورى 303 توننانى قۇرادى (1 اقپاندا 301 توننا) نەمەسە حالىقارالىق رەزەرۆتىڭ 41,3%-ىنان اسادى.

ال 2017 جىلدىڭ جەلتوقسان ايىندا ەلدەگى التىن كولەمى 291,9 توننانى نەمەسە حالىقارالىق رەزەرۆتىڭ 37,5%-ىن قۇراعان. 2016 جىلدىڭ قورىتىندىسى بويىنشا ۇلتتىق بانكتە  258,1 توننا التىن (حالىقارالىق رەزەرۆتىڭ 27,1%-ى) بولعان.

وسىلايشا ەسەپتىك كەزەڭدە قازاقستان باعالى مەتالل قورى بويىنشا 100 ەلدىڭ ىشىندە 18 ورىندا تۇر. بۇدان بۇرىن 21 ورىندا بولعان.

ەسەپتىك كەزەڭ باستالعالى بەرى التىن قورى ەڭ كوپ ەل رەتىندە اقش ءبىرىنشى ورىندا تۇر (8133,5 توننا). رەسەي 1857,7 توننا التىن قورىمەن 6 ورىندا. ال قىتايدىڭ التىن قورى  1842,6 توننا جانە ەلدىڭ حالىقارالىق رەزەرۆىنىڭ تەك 2,4%-ىن عانا قۇرايدى.

ايتا كەتەيىك، بۇدان بۇرىن قر ۇلتتىق بانكىنىڭ توراعاسى دانيار اقىشەۆ قازاقستان التىن قورى ەڭ كوپ 15 ەلدىڭ قاتارىنا كىرۋگە نيەتتى ەكەنىن مالىمدەگەن.

“The Qazaq Times”