فوتو: DW.

ءسۇريا مەن يراك اۋماعىندا لاڭ سالعان «يسلام مەملەكەتى» تەررورلىق ۇيىمى قارۋ-جاراقتى قايدان العان؟

الەم بويىنشا زاڭسىز قارۋ-جاراق اينالىمىن زەرتتەيتىن ۇلىبريتانيالىق «Conflict Armament Research» ۇيىمىنىڭ مالىمەتىنشە، «يسلام مەملەكەتى» لاڭكەستىك ۇيىمىنا قارۋ-جاراقتىڭ باسىم كوپشىلىگى اقش جانە ساۋد ارابياسىنان كەلگەن. اتالمىش ەكى ەل شىعىس ەۋروپا قارۋ-جاراق وندىرۋشىلەرىنەن قارۋدى ساتىپ الىپ، ونى ءسۇريا مەن يراك اۋماعىنداعى تەررورلىق ۇيىمدارعا جەتكىزگەن.

ءسۇريا مەن يراك اۋماعىندا ءۇش جىل زەرتتەۋ جۇمىستارىن جۇرگىزگەن دەمەن سپليتەردىڭ سوزىنشە، شىعىس ەۋروپادا جاسالعان قارۋ-جاراق اقش ارقىلى «يسلام مەملەكەتى» تەررورلىق ۇيىمىنىڭ ارسەنالىنا وتە قىسقا ۋاقىت ارالىعىندا  جەتكىزىلگەن. ول ءوزىنىڭ بۇل سوزىنە دالەل رەتىندە 2015 جىلدىڭ جەلتوقسان ايىندا اقش-تىڭ بولگاريادان ساتىپ العان تانكىگە قارسى زىمىرانىن مىسالعا كەلتىرەدى. ونىڭ ايتۋىنشا،  اقش اتالمىش زىمىراندى ساتىپ العاننان كەيىن ەكى ايدان سوڭ ول «يسلام مەملەكەتى» لاڭكەستىك ۇيىمىنىڭ قويماسىنان تابىلعان.

«Conflict Armament Research» ۇيىمىنىڭ زەرتتەۋى بويىنشا، اقش-پەن قاتار ءسۇريا مەن يراك اۋماعىنا ساۋد ارابياسىدا اسا ءىرى كولەمدە قارۋ-جاراق تاسىمالداعان. ءسۇريا اۋماعىندا سوعىس باستالعانعا دەيىن شىعىس ەۋروپا ەلدەرىنىڭ قارۋ-جاراقتارىنا پىسقىرىپتا قارامايتىن رەسمي ەر-رياد سوڭعى جىلدارى بولگاريا قارۋ-جاراقتارىن ءجيى ساتىپ الاتىن بولعان جانە «يسلام مەملەكەتى» تەررورلىق ۇيىمىنىڭ ارسەنالىنداعى بولگاريالىق قارۋدىڭ باسىم كوپشىلىگى ءدال وسى ساۋد ارابياسى ارقىلى جەتكىزىلگەن.

ۇلىبريتانيالىق ۇيىمنىڭ زەرتتەۋلەرىن بولگاريا قارۋ-جاراق وندىرۋشىلەرى دە راستاعان. ولار ءوز ونىمدەرىن اقش-تىڭ «Kiesler Police Supply» كومپانياسى مەن ساۋد ارابياسىنا ساتقاندىعىن جوققا شىعارماعان. بولگاريا وندىرۋشىلەرىنىڭ سوزىنشە، «Kiesler Police Supply» كومپانياسى بولگاريالىق قارۋ-جاراقتى اقش قارۋلى كۇشتەرىنىڭ دەكلوراتسياسى ارقىلى العان جانە ءۇشىنشى ءبىر ەلدەرگە ساتپاۋعا بايلانىستى كەلىسىمگە قول قويعان.

“The Qazaq Times”