فوتو: daily.bangkokbiznews.com

ەۋروپالىق وداق كەدەندىك باج سالىعىنان تابىس تۇسپەگەنى ءۇشىن 2,7 ملرد ەۋرو كولەمىندە وتەماقى تالاپ ەتۋ شەشىمىن قابىلدادى. شەنەۋنىكتەردىڭ ايتۋىنشا، ۇلىبريتانيانىڭ كەدەن قىزمەتى قىتايلىق تاۋارلاردى تاسىمالداۋدا الاياقتىق سحەمالارىمەن دۇرىس كۇرەسپەگەن، دەپ حابارلايدى kommersant.ru.

الاياقتىقپەن كۇرەس جونىندەگى ەۋروپالىق بيۋرو (OLAF) دەرەكتەرى بويىنشا، 2013 جىل مەن 2016 جىلدار ارالىعىندا بريتاندىق پورتتار ارقىلى اكەلىنەتىن قحر تاۋارلارىنىڭ كولەمى 192 مىڭ توننادان 407 مىڭ تونناعا دەيىن ەكى ەسە ارتقان. بۇل تاۋارلار ۇلىبريتانياعا ادەيى ارزان باعامەن تاسىمالدانعان.

مىسالى ماقتادان جاسالعان ايەل شالبارى 0,9 ەۋروعا (تارازى ەسەبىمەن 1 كگ) باعالانعان. ال ەۋروپالىق ەسەپ بويىنشا ونىڭ ورتاشا باعاسى 26 ەۋرو بولعان. OLAF مالىمەتىنشە، باج سالىعى دەكلاراتسيالانعان قۇننىڭ 12 پايىزىن قۇرايدى. الايدا تاۋاردىڭ 86 پايىزى  ەو-نىڭ باسقا ەلدەرىنە دەرەۋ ەكسپورتتالىپ،  قىلمىستىق سحەماعا قاتىسى بار ءبىر كۇندىك كومپانيالار  قوسىمشا قۇن سالىعىن (ققس) تولەمەستەن جوعالىپ كەتەدى ەكەن.

وسىلايشا، ەۋرووداق كەدەندىك تولەمنەن تۇسپەگەن تابىستى 2 ملرد ەۋروعا  جانە ققس-نى 3,2 ملرد ەۋروعا باعالادى. بريۋسسەل سونداي-اق، بريتاندىق كەدەن قىزمەتىن ەۋروپالىق وداقپەن ىنتىماقتاستىقتىعى جەتكىلىكسىز بولعانى ءۇشىن ايىپتادى. OLAF تەرگەۋ ءبولىمىنىڭ باسشىسى ەرنەستو ءبيانچيدىڭ سوزىنشە، ۇلىبريتانيا كەدەنى 2016 جىلعى كەدەندىك باج سالىعىن جيناۋدان ەۋرووداق بيۋدجەتىنە تۇسپەگەن بارلىق تابىستىڭ 79 پايىزىنا جاۋاپتى.

ايتا كەتەيىك، 2017 جىلى ۇلىبريتانيا ەۋروپالىق وداقتان شىققانى ءۇشىن 40 ملرد ەۋرو تولەۋگە دايىن ەكەندەرىن مالىمدەگەن. Brexit پروتسەسىن ەليزاۆەتا II پاتشايىم مەن پرەمەر-مينيستر تەرەزا مەي قولدادى.

“The Qazaq Times”