كاددافي وتباسىنىڭ ەۋروپادا بۇعاتتالعان قارجىسى جوعالىپ كەتتى

كاددافي وتباسىنىڭ بەلگيادا بۇعاتتالعان 11 ميلليارد ەۋرو قارجىسى جوعالىپ كەتتى – دەپ حابارلايدى Le Vif جۋرنالى.

باسىلىم مالىمەتىنشە، 2011 جىلى بۇۇ سالعان سانكتسيادان كەيىن مۋاممار كاددافي وتباسىنىڭ جەكە شوتىندا قۇندى قاعاز ەسەبىندە 14,2 ملرد ەۋرو جانە 1,9 ملرد ەۋرو اقشالاي قارجى بولعان. الايدا بۇل قارجى 2017 جىلى 11 ملرد ەۋروعا كەمىگەن. قازىرگى تاڭدا كاددافي وتباسىنا تيەسىلى دەلىنگەن ليۆيالىق «Libyan Investment Authority» ينۆەستيتسيالىق كومپانياسىنىڭ ەسەپشوتىندا 5 ملرد ەۋرو قارجى قالعان. 11 ملرد قارجىنىڭ قايدا كەتكەنىن ەشكىم بىلمەيدى. «Le Vif» جۋرنالىنىڭ جىبەرگەن ساۋالىنا بەلگيا باس پروكۋراتۋراسى ماردىمدى جاۋاپ بەرمەگەن. ەگەر بەلگيا قۇزىرلى ورگاندارى 11 ميلليارد ەۋرونىڭ قايدا كەتكەنىن انىقتاماسا، وندا بۇل حالىقارالىق داۋعا ۇلاسۋى مۇمكىن.

ليۆيا باسشىسى مۋاممار كاددافي 2011 جىلى مەملەكەتتىك توڭكەرىس كەزىندە كوز جۇمعان. ءدال وسى جىلى بىرىككەن ۇلتتار ۇيىمى سالعان سانكتسيادان كەيىن كاددافي وتباسىنا قاتىسى بار دەلىنگەن  500-گە جۋىق كومپانيانىڭ جەكە شوتتارى بۇعاتتالعان. بۇۇ قاۋىپسىزدىك كەڭەسى مەن ناتو ەلدەرى كاددافيدىڭ شوتىندا بۇعاتتالعان قارجى ازاماتتىق سوعىستان كەيىن ليۆيانى قالپىنا كەلتىرۋگە جۇمسالادى دەپ مالىمدەگەن.

“The Qazaq Times”