"حالىقارالىق باعدارلامالار ورتالىعى" اق سايتىندا قازاقستاندىقتار تەگىن وقي الاتىن شەتەلدىك جوعارى وقۋ ورىندارىنىڭ ءتىزىمى جاريالاندى. شەتەل ازاماتتارى ءۇشىن تەگىن ءبىلىم الۋدى گەرمانيا، فرانتسيا، نورۆەگيا، چەحيا، پولشا جانە گرەكيا ۋنيۆەرسيتەتتەرى ۇسىنىپ وتىر.

الايدا حالىقارالىق باعدارلامالار ورتالىعىنىڭ مالىمەتىنشە، تىزىمدەگى ءاربىر جوو-نىڭ وقۋعا تۇسۋگە قاتىستى ءوز تالاپتارى بار.

سونداي-اق، شەتەلدە وقىعىسى كەلەتىندەر ورتالىقتىڭ 8 (7172) 76-90-44, 76-91-04, 76-90-92, 24-93-96 نومىرىنە حابارلاسىپ، "بولاشاق" ستيپەندياسى تۋرالى، ۇكىمەتارالىق گرانتتار جانە قۇجاتتاردى قابىلداۋ، تالاپكەرلەردى ىرىكتەۋ شارتتارى تۋرالى بىلە الادى.

بۇدان بۇرىن بەلگىلى بولعانداي، 2018 جىلى ۆەنگريا  جوو-لارى قازاقستاندىقتار ءۇشىن 200 ءبىلىم گرانتىن بولگەن. وقۋ تەگىن. سونداي-اق ۆەنگريا تارابى جاتاقحانا مەن مەديتسينالىق ساقتاندىرۋمەن قامتاماسىز ەتۋگە دايىن.

دەسەك تە، حبو پرەزيدەنتى جانبولات مەلدەشوۆ 2017 جىلدىڭ قاراشا ايىندا قازاقستاندىقتاردىڭ كوبى گرانت ۇسىنىپ وتىرعان ەۋروپالىق ۋنيۆەرسيتەتتەردەن گورى اقش پەن انگليانىڭ اقىلى جوو-لارىن ءجيى تاڭدايتىنىن ايتقان.

“The Qazaq Times”