فوتو: aljazeera.com

باحرەين سوتى ساياسي بەلسەندى نابەل رادجاپتى (Nabeel Rajab) عالامتورداعى كوممەنت ءۇشىن 5 جىلعا تۇرمەگە جىبەردى، - دەپ حابارلايدى Al Jazeera اقپارات اگەنتتىگى.

ول عالامتورعا قالدىرعان كوممەنتىندە يەمەندەگى سوعىسقا بايلانىستى ساۋد ارابياسىن سىنعا الىپ، ەلدەگى تۇرمەلەردى باقىلاۋ جۇيەسىنە كوڭىلى تولمايتىندىعىن بىلدىرگەن.

ادام قۇقىقتارى جونىندەگى باحرەين ورتالىعى رادجاپتىڭ قىلمىس كودەكسىندە كورسەتىلگەندەي، "سوعىس كەزىندە جالعان قاۋەسەت تاراتقانى", "باسقا ەلدى سىيلاماعانى" جانە "جارعىلىق ورگاندى قۇرمەتتەمەگەنى" ءۇشىن ايىپتالعانىن مالىمدەدى.

ادام قۇقىقتارى جونىندەگى حالىقارالىق فەدەراتسيا پرەزيدەنتى ديميتريا حريستوپولۋس (Dimitris Christopoulous) سارسەنبى كۇنى: "نابيەل رادجاپ ەشقانداي قىلمىسكەر ەمەس، ول بەلگىلى قۇقىق قورعاۋشى جانە ساياسي بەلسەندى. ونىڭ وسىنداي سەبەپپەن ايىپتالۋى ازاماتتىق قوعامنىڭ ەركىن ءومىر سۇرۋىنە جولدى جاۋىپ، باحرەيندەگى حالىقتىڭ ەركىن شەرۋگە شىعۋىنا كەدەرگى كەلتىرەدى", - دەدى.

ول ءوزىنىڭ ۇيىمى اتىنان باحرەين ۇكىمەتىنەن "رادجاپتى جانە قاماۋداعى باسقا دا بەلسەندىلەردى تەز ارادا تۇرمەدەن شىعارۋدى" تالاپ ەتتى.

ادامدى قيناۋعا قارسى حالىقارالىق ۇيىم دا سوتتىڭ شەشىمىن "ادىلەتتىلىكتى تاپتاۋ" دەپ باعالادى. ۇيىمنىڭ ءباسپاسوز حاتشىسى دجەرالد ستابروك (Gerald Staberock): "ساياسي بەلسەندىلەردىڭ سوڭىنا وسىلاي مەملەكەتتىڭ ءتۇسۋى باحرەين حالقىنىڭ اۋزىنا قاقپاق بولۋعا تىرىسۋ ارەكەتى. بۇل اياقتالۋ كەرەك", - دەدى.

2016 جىلدىڭ ماۋسىمىنان باستاپ رادجاپ دەنساۋلىق جاعدايىنا قاراماستان، "جالعىز" كامەراعا ورنالاستىرىلعان.

ادام قۇقىقتارى جونىندەگى ۇيىم رادجاپتىڭ سوت وتىرىسى 20 رەت كەيىنگە شەگەرىلگەنىن جانە ۇكىمەت زاڭگەرلەرگە ءوز قورعالۋشىسىن قورعاۋعا مۇمكىندىك بەرمەي، سوت پروتسەدۋرالارىن بۇزعانىن جازدى.

رادجاپ ەلدەگى شيتتەر (سۇننيتتەرگە قاراعاندا كوپ) مەن ءسۇننيت ۇكىمەت باسقاراتىن ارال اراسىنداعى بولىنىسكە قارسى بولعان. سول كوزقاراسىن اشىق بىلدىرگەنى ءۇشىن ونى 2012, 2014 جىلدارى ەكى رەت تۇرمەگە قامالدى. 2016 جىلدىڭ شىلدەسىنەن بەرى ول ءۇشىنشى رەت تۇرمەدە وتىر.

2011 جىلدان باستاپ ەل اۋماعىندا شيتتەرگە قارسى نارازىلىق (شيتتەر وپپوزيتسياسىن كوبىسى تەھران ۇگىت-ناسيحاتىنىڭ ناتيجەسى دەپ ويلايدى) شەرۋلەرى كوبەيىپ كەتتى. وعان  بيلىك باسىندا 2 عاسىر وتىرعان ال-حاليفا وتباسى اتىنان ساۋد ارابياسى ارالاسۋدى ءجون كوردى.

ەرەۋىلشىلەر پرەمەر-مينيستر سايلاپ، "ناعىز" كونستيتۋتسيالىق مونارحيا قۇراتىنداي رەفورما قابىلداۋدى تالاپ ەتۋدە.

ال ساۋد ارابيا ايماقتاعى باسەكەلەسى يراندى "شيت قوعامىن باحرەيننىڭ ءسۇننيت باسشىلارىنا قارسى قويدى" دەپ كىنالاۋدا.

پارسى شىعاناعىنداعى ءسۇننيت باسقارۋشى ەلدەرى ء(بىرىنشى كەزەكتە: ساۋد ارابياسى، كۋۆەيت، كاتار جانە بىرىككەن اراب امىرلىكتەرى) "شيت-يراندىق" قاۋىپتەن سەسكەنەدى. ساددام حۋسەيننىڭ كوپجىلدىق ءسۇننيت رەجيمىنەن كەيىن 2003 جىلى يراكقا باتىستىڭ ارالاسۋى كومەگىمەن بيلىك باسىنا شيتتەر كەلگەنىن ەسكەرسەك، "مۇسىلمان-باۋىرلار" (سۇننيتتەر) باسقاراتىن يوردانيا جانە مىسىر سياقتى ەلدەر دە بۇل قاۋىپتىڭ شىندىققا اينالۋىنان قورقادى.

“The Qazaq Times”