ۋاشينگتوندا ءبىر توپ ءجاسوسپىرىم اق ءۇيدىڭ الدىنا جينالىپ، ۇكىمەتكە قارۋ ساتۋدى شەكتەۋ تالابىن ءبىلدىرىپ شەرۋ جاسادى. ولار وزدەرىنىڭ نارازىلىعىن ايگىلەۋ ءۇشىن اق ءۇي الدىندا ءبىر ساعاتقا جۋىق سۇلىق جاتتى. نارازىلىق قيمىلىن وتكىزگەندەردىڭ كوبى مەكتەپ جاسىنداعى جاسوسپىرىمدەر. ولار وتكەن اپتادا فلوريدا شتاتىندا بولعان وق جاۋدىرۋ وقيعاسىنان كەيىن وسىنداي قادامعا بارعان. فلوريداداعى مەكتەپكە جاسالعان شابۋىلدان 17 ادام قازا بولعان ەدى. بۇل وقيعا 2012 جىلدان بەرى اقش-تاعى ەڭ ءبىر قاندى وقيعا بولىپ قالدى. بۇل تۋرالى CNN ارناسى جانە WSJ باسىلىمى حابارلادى.

CNN بەرگەن مالىمەتكە قاراعاندا، جەردە سۇلىق جاتۋ ارقىلى نارازىلىقتارىن جەتكىزۋ ەلەانور نەحتەرلاين جانە ۋيتني بوۋەنگە ەسىمدى مەكتەپ وقۋشىلارىنىڭ يدەياسى ەكەن. ولار «قارۋ ساتۋ جونىندەگى زاڭدى قاتاڭداتۋ» تالاپتارىن ءبىلدىرۋ ءۇشىن 17 ادامدى ۇيىمداستىرىپ، اق ءۇي الدىندا 3 مينۋت سۇلىق جاتىپ، نارازىلىق شاراسىن وتكىزبەك بولعان. سەبەبى، فلوريداداعى مەكتەپتە وق اتۋ وقيعاسىندا نيكولاس كرۋز بار جوعى 3 مينۋت ىشىندە 17 ادامدى اتىپ ولتىرگەن. اكتسياعا تۋىستارى مەن تانىستارىن قاتىسۋعا شاقىرادى. ال شارا تۋرالى  الەۋمەتتىك جەلىلەردە حابارلار تاراعاننان كەيىن جۇزدەن اسا ءجاسوسپىرىم قاتىسقان.

دۇيسەنبى كۇنى پرەزيدەنت ترامپ قارۋ ساتىپ الۋشىلاردى قاتاڭ تەكسەرۋ تۋرالى زاڭدى جۇزەگە اسىرۋعا مۇمكىندىك بەرەتىن جوبا بەكىتتى. ول سەناتور جون كورنينمەن اقىلداسىپ، اتالعان ماسەلەگە قاتىستى جاڭا جوبانى دايىنداۋدى تاپسىرعان. جاڭا جوبا بويىنشا قارۋ ساتىپ الۋ ىسىنە بايلانىستى جاڭا قاتاڭ ەرەجەلەر جوق، تەك ساتىپ الۋشىلاردى قاتاڭ تەكسەرۋ جاعى كوبىرەك قاراستىرىلعان.

بۇل ماسەلەنى شەشۋ تۋراسىندا امەريكالىقتار اراسىندا ءتۇرلى پىكىرلەر وربۋدە. قۇراما شتاتتاعى باسىم كوپ حالىق حالىقتىڭ قولىندا قارۋ بولۋ ناعىز دەموكراتيا دەپ قارايدى. ءتىپتى اقش تاريحىندا قارۋعا شەكتەۋ قويۋدى كوتەرىپ، پرەزيدەنتتىك سايلاۋعا تۇسكەندەردىڭ باسىم كوبىنىڭ جولى بولا قويعان جوق.

“The Qazaq Times”