ترامپ تاياۋ شىعىستاعى وپەراتسيالاردى قارجىلاندىرۋدى قىسقارتادى

اقش پرەزيدەنتى دونالد ترامپتىڭ اكىمشىلىگى 2019 جىلى تاياۋ شىعىسقا ارنالعان قارجىلىق كومەكتىڭ كولەمىن ازايتپاق (اسىرەسە، ليۆانداعى بۇۇ ميسسيالارى، وككۋپاتسيالانعان گولان (Golan Heights) بيىكتىكتەرى مەن باتىس ساحارا ءوڭىرى), - دەيدى Al Jazeera اقپارات اگەنتتىگى.

بيۋدجەتتى جوسپارلاۋ دەپارتامەنتىنىڭ باسشىسى دۋگلاس پيتكيننىڭ (Duglas Pitkin) مالىمدەۋىنشە، بۇۇ-عا باعىتتالاتىن قارجىنى جانە جالپى الەمدە بەيبىتشىلىكتى ساقتاۋ ماقساتىنداعى ميسسيالاردى قارجىلاندىرۋ ازايتىلادى.

دەپارتامەنتتىڭ اقپاراتىنا سۇيەنسەك، بىرىككەن ۇلتتاردىڭ ليۆانداعى اسكەرىن (UNIFIL) قارجىلاندىرۋ 42%-عا ازايادى، ياعني، 84,2 ملن اقش دوللارى بولىنەدى. UNIFIL 1978 جىلى قۇرىلىپ، ەلدىڭ يزرايلمەن ورتاق وڭتۇستىك شەكاراسىنداعى جاعدايدى باقىلاپ وتىرۋ ءۇشىن ليۆان اسكەرىنە كومەك كورسەتىپ كەلدى.

قارجىنىڭ ازايۋى UNIFIL-عا كورشىلەس سۇرياداعى اسكەري قاقتىعىستار كەسىرىنەن "يزرايل ەكەۋىنە ورتاق وڭتۇستىك شەكاراداعى قاۋىپسىزدىك پەن تۇراقتىلىقتى" قامتاماسىز ەتۋ مانداتىن ورىنداۋعا كەدەرگى كەلتىرۋى مۇمكىن.

سونىمەن قاتار اكىمشىلىك تاعى 10-عا جۋىق ايماق پەن ەلدەرگە قاتىستى دا وسىنداي قىسقارتۋلار بولۋى مۇمكىن ەكەندىگىن حابارلادى. ماسەلەن، گولان بيىكتەرىندەگى باقىلاۋ مەن قارۋلى قاقتىعىستاردىڭ الدىن الۋ جونىندەگى بۇۇ اسكەرىنە بولىنەتىن قارجى 55 %-عا ازايادى. 2017 جىلى وسى ميسسياعا 24,6 ملن اقش دوللارى بولىنگەن بولسا، 2019 جىلى 11,1 ملن اقش دوللارى بولىنەدى دەپ جوسپارلانۋدا.

باتىس ساحاراداعى ميسسيالارعا بولىنەتىن قارجىنى اكىمشىلىك 18,4 ملن-نان 8,4 ملن اقش دوللارىنا ازايتپاق.

اقش قىسىم كورسەتكەننەن كەيىن وتكەن جىلى بۇۇ باس اسسامبلەياسى بەيبىتشىلىكتى ساقتاۋعا ارنالعان 8 ملرد دوللارلىق بيۋدجەتتەن 600 ميلليوندى الىپ تاستادى.

اقش ەلشىسى نيككي حەلي (Nikki Haley) بۇۇ-نا: "بۇل تەك باستاماسى عانا", - دەدى.

اقش پەن بۇۇ اراسىنداعى قارىم-قاتىناس پەن سەرىكتەستىكتى دامىتۋمەن اينالىساتىن "Better World Campaign" مالىمەتىنشە، ترامپ اكىمشىلىگىنىڭ اقش-تىڭ سىرتقى ىستەر شىعىندارىن وسىنشاما قىسقارتۋى ءوزىنىڭ بۇۇ جانە ونىڭ اگەنتتەرىن قوسقاندا جالپى حالىقارالىق جەتەكشىلىگىن جوعالتۋعا الىپ كەلەدى.

بۇل قىسقارتۋلار - اقش-تىڭ حالىقارالىق دامۋ جونىندەگى بيۋدجەت شىعىنىن 25 %-عا ازايتۋ جوسپارىنىڭ ءبىر بولىگى. ترامپ سونىمەن قاتار اسكەري شىعىنداردى ارتتىرىپ، الەۋمەتتىك باعدارلامالاردى قارجىلاندىرۋدى قىسقارتۋدى جوسپارلاپ وتىر.

12 اقپان كۇنى ءوزىنىڭ تۆيتتەر اككاۋنتىندا ترامپ: "ينفراقۇرىلىس سالاسى ءۇشىن جاڭالىقتارعا تولى اپتا بولايىن دەپ تۇر. اقىماقتىققا بوي بەرىپ، تاياۋ شىعىستا 7 ملرد اقش دوللارىن جۇمساعاننان كەيىن ءوزىمىزدىڭ ەلىمىزگە قارجى قۇياتىن كەز كەلدى!", - دەپ جازعان.

پەنتاگوننىڭ مالىمدەۋىنشە، اسكەري شىعىنداردىڭ ارتۋى رەسەي مەن قىتاي تاراپىنان ءتونىپ وتىرعان قاۋىپ ناتيجەسى.

“The Qazaq Times”