بريۋسسەلدە ورنالاسقان مەشىت بەلگيانىڭ ەڭ ۇلكەن مەشىتى جانە ول 40 جىلعا جۋىق ۋاقىت ساۋد ارابياسىنىڭ قاراماعىندا بولدى. Euronews اقپارات اگەنتتىگىنىڭ مالىمەتىنشە، ەلدەگى سالافيت رياد قوعامدا راديكاليزمدى ۋشىقتىرادى دەگەن  قاۋىپپەن ەندى مەشىتتى بەلگيانىڭ مۇسىلمان قاۋىمداستىعىنىڭ باقىلاۋىنا بەرمەك.

بۇل كەلىسىم وتكەن ايدا بەلگيانىڭ ءسىم ديدير رەيندەرس (Didier Reynders) جانە ونىڭ ساۋدتىق ارىپتەسى ادەل ال-دجۋبەير (Adel al-Jubeir) اراسىنداعى كەلىسسوزدەن كەيىن جاسالعان بولاتىن.

مەشىتكە تۇراقتى كەلۋشىلەردىڭ ايتۋىنشا، بۇل مەشىتتە ەشقانداي راديكالدى سيپاتتا ۇگىت-ناسيحات جۇرگىزىلمەيتىن. "مەشىتكە قارسى قانداي دا ءبىر دالەل بولاتىن بولسا، ول ۋاعىزداردىڭ ءوزى. بىراق ولاردى اۋدارعان كۇننىڭ وزىندە تەرروريزممەن نەمەسە راديكالدى يدەيالارمەن بايلانىستى ەشنارسە تابا المايسىز", - دەيدى ولار.

رياد ۇزاق ۋاقىت بويى ۋلترا-كونسەرۆاتيۆتى يسلامنىڭ الەمدىك ەكسپورتەرى سانالىپ كەلدى. ەۋروپاداعى بىرنەشە تەررورلىق شابۋىلداردان كەيىن كەيبىر ەلدەر مۇسىلمان قوعامداستىقتارىن باسقاراتىن، قالىپتى (راديكالدى ەمەس) كوزقاراستاردى ۇستاناتىن يمامداردى ىنتالاندىرۋعا تىرىستى.

بريۋسسەلدىڭ دانالىق پەن الەم بەيبىتشىلىگى فورۋمىنىڭ پرەزيدەنتى حاليد حادجيدىڭ (Khalid Hajji) ايتۋىنشا، مەشىتتەر ەۋروپا مەن بەلگيادا تارالعان ءدىني  ديسكۋرستاردى جاڭارتۋ كەرەك.

ساۋد ارابيانىڭ قازىرگى حانزاداسى مۋحاممەد بين سالمان (Mohammed bin Salman) راديكالدى يدەيالاردى ناسيحاتتايدى دەپ ايىپتالعانى ءۇشىن شەت ەلدەردەگى مەشىتتەر مەن ءدىني مەكتەپتەردى قولداۋدى توقتاتىپ، 2017 جىلى قالىپتى يسلامدى ناسيحاتتاۋعا ۋادە بەرگەننەن كەيىن ەلدە وسى باعىتتا ءتۇرلى رەفورمالار قابىلدانا باستادى.

“The Qazaq Times”