اقش-تىڭ بىرنەشە جوعارى لاۋازىمدىلارىنىڭ بەرگەن مالىمەتىنە قاراعاندا، سوڭعى بىرنەشە اپتادان بەرگى جالعاسىپ جاتقان ۋاشينگتون بيلىگىنىڭ ىشىندەگى تالقىلاۋدان كەيىن، ترامپ ۇكىمەتى سولتۇستىك كورەيا باعىتتاعان ستراتەگياسىن وزگەرتەدى. ايتالىق، كحدر-مەن ىنتىماقتاستىقتى نىعايتۋ ماقساتىنداعى الدىن الا جۇرگىزەتىن كەلىسسوزدەرگە دايىن ەكەنىن ءبىلدىردى. بۇل تۋرالى «WSJ» باسىلىمى حابارلادى.

كەيبىر ساراپشىلار بۇل قادامدى «كەلىسسوزدەر ءۇشىن كەلىسسوز» دەپ اتاپ، اقش ۇكىمەتىنىڭ بۇرىنعى ەكى ەل اراسىنداعى كەلىسسوز سولتۇستىك كورەيا يادرولىق قارۋىنان باس تارتقاننان كەيىن عانا جۇرگىزەدى دەگەن ۇستانىمنىڭ وزگەرگەنىن ايتادى. اقش ۇستانىمىنىڭ وزگەرگەنىن، دۇيسەنبى كۇنى مەملەكەتتىك حاتشى رەكس تيللەرسوننىڭ سوزىنەن دە اڭعارۋعا بولادى. كايرگە جاساعان ساپارى كەزىندە تيللەرسون بولاشاقتاعى رەسمي كەلىسسوزدەر ءۇشىن الدىن الا جاسالاتىن كەلىسسوزدەردە اقش-تىڭ بۇرىنعى ۇستانىمىن شەگەرە تۇراتىنىن ايتىپ ءوتتى.

بۇل تۋرالى رەكس تيللەرسوننىڭ پىكىرىنەن بۇرىن اقش ۆيتسە-پرەزيدەنتى مايك پەنس وڭتۇستىك كورەياداعى قىسقى وليمپيادا ويىندارىنا قاتىسۋ كەزىندە، سول ەلدىڭ پرەزيدەنتىنە دە ايتقان بولاتىن. ايتالىق ونىڭ سولتۇستىك كورەيامەن كەزدەسۋگە دايىن ەكەنىن جەتكىزۋى، اقش ۇكىمەتىنىڭ سولتۇستىك كورەيامەن يادرولىق قارۋدان باس تارتقاننان كەيىن عانا كەلىسسوز جۇرگىزۋ ۇستانىمىنىڭ وزگەرگەنىن بىلدىرەدى.

دەگەنمەن ءبىر نارسەنى انىق تۇسىنۋگە تۋرا كەلەدى. اقش-تىڭ كەلىسسوز تۋرالى ۇستانىمىنىڭ جۇمسارۋى، سولتۇستىك كورەياعا ەكونوميكالىق جانە ساياسي قىسىم جاساۋدان باس تارتتى دەگەندى بىلدىرمەيدى.

اقش ۇكىمەتىنىڭ جوعارى لاۋازىمدىلارى تۇسىنىك بەرگەندە، ۋاشينگتون بيلىگى  سولتۇستىك كورەيا يادرولىق باعدارلاماسىنان باس تارتىپ، ءارى ناقتى كەلىسسوزگە كەلگەنگە دەيىن اقش ءۇش سالادا – ەكونوميكالىق، ساياسي جانە قارۋلى كۇشتەر ارقىلى قىسىمدى جالعاستىراتىنىن ايتقان.

“The Qazaq Times”