ان-148 ۇشاعى. فوتو: Delfi.

جەكسەنبىدە بولعان قايعىلى وقيعا تۋرالى الەمدىك اقپارات قۇرالدارى جازىپ جاتىر. كەشە تۇستەن كەيىن ماسكەۋدەن ورسك قالاسىنا جول العان ان-148 ۇشاعى اۋەگە كوتەرىلىپ بىرنەشە مينۋتتان كەيىن اپاتقا ۇشىرادى. ۇشاقتا 6 ەكيپاج مۇشەسى 65 جولاۋشى بولعان.  اۋە اپاتىنان قيراعان ۇشاق قالدىقتارى رامەنسكي ايماعىنان تابىلدى. الدىن الا بەرىلگەن مالىمەتتەردەن ۇشاقتاعىلار تۇگەلدەي قازا تاپقان.

حابارلارعا قاراعاندا ماسكەۋ ۋاقىتىمەن 14 ساعات 21 مينۋتتا كەڭىستىككە كوتەرىلگەن ۇشاقتان بىرنەشە مينۋتتان كەيىن بايلانىس ۇزىلگەن. اتالعان ۇشاقتىڭ تۇسىنىكسىز جاعدايدا اپاتقا ۇشىراعانىن "Flightradar" سايتى جازدى. ان-148 ۇشاعى اۋەگە كوتەرىلگەننەن كەيىن ساعاتىنا 600 شاقىرىمدىق جىلدامدىقپەن 1800 مەتر بيىكتىكتە ۇشىپ بارا جاتىپ، توسىن جاعدايدا  1500 مەترگە دەيىن تومەندەپ كەتەدى. بىرتىندەپ 1800 مەتر بيىكتىككە قايتا كوتەرىلگەن، الايدا وسىدان كەيىن بىردەن جەرگە قۇلايدى. 900 مەترگە دەيىن تومەندەگەننەن سوڭ راداردان جوعالىپ كەتەدى.

كەيبىر اقپارات كوزدەرى وزگە ءبىر تىكۇشاقپەن قاقتىعىسقان بولۋى مۇمكىن دەگەن دە بولجامدار ايتتى. الايدا، بۇل ءسوز راستالمادى.

رەسەيلىك قاۋىپسىزدىك تاراۋلارى بۇل وقيعانىڭ ۇستىنەن قىلمىستىق ءىس قوزعاپ وتىر. "ساراتوۆ اۋە جولى" كومپانياسىن دا قاتاڭ تەكسەرىس كۇتىپ تۇر. دەگەنمەن، قازىرگە دەيىن ۇشاق اپاتىنىڭ ناقتى سەبەبى تۇراقتاندىرىلمادى. دەسە دە، كەيبىر باسىلىمدار اقپارات كوزدەرىنە سىلتەمە بەرىپ، "ۇشاق قوزعالتقىشىنىڭ ىستەمەي قالعانى اپاتتىڭ باستى سەبەبى" دەپ كورسەتتى.

Mash ارناسى دا وسى پىكىردى قۋاتتايدى. ارنانىڭ تاراتقان حابارىندا "ۇشاقتىڭ قوزعالتقىشتارىنىڭ ءبىرى ىستەن شىعىپ، تەپە-تەڭدىك ساقتاي الماي اپاتقا ۇشىرادى" دەدى.

ان-148 - رەسەي مەن ۋكراينا بىرلەسىپ شىعارعان ۇشاق. كەيىنگى كەزدەرى بۇل ۇشاقتى رەسەي ءونىرىپ كەلىگەن، الايدا، رەسەي مەن ۋكراينا اراسىنداعى جانجالدان كەيىن بۇنداي ۇلگىدەگى ۇشاقتاردى ءوندىرۋ توقتاپ قالعان. بۇل رەت اپاتقا ۇشىراعان ۇشاقتى 2010 جىلى جاساپ شىعارعان اۆياقۇرىلىس كاسىپورنىنا دا تەكسەرۋ كوميسسياسى اتتاندى.

“The Qazaq Times”