ۋگو چاۆەس (Hugo Chavez) 1998 جىلى ۆەنەسۋەلا پرەزيدەنتى بولىپ سايلاندى. Al Jazeera مالىمەتىنشە، ءناسىل مەن كلاسقا قاتتى ءمان بەرەتىن، اق ناسىلدىلەر بەلگىلى ارتىقشىلىقتارعا يە ۆەنەسۋەلا سياقتى ەلدە چاۆەستىڭ جەڭىسكە جەتۋى راسىمەن تاريحي جاعداي بولدى. 

"ۆەنەسۋەلاداعى ساياسي رەفورمانىڭ ساتسىزدىككە ۇشىراۋى" اۆتورى دجۋليا باكستون (Julia Buxton): "ول بۇعان دەيىنگى پرەزيدەنت سايلاۋلارىندا، اق ناسىلدىلەر بيلىك ەتىپ ۇيرەنىپ قالعان ەلدە نەمەسە جالپى ساياساتتا بولعان ادامدارعا ۇقسامايدى" دەگەن بولاتىن.

ۋگو چاۆەستىڭ پرەزيدەنت پوستىنداعى العاشقى 3 جىلى ۇلتتى ءبولىپ جىبەردى. 2002 جىلدىڭ ساۋىرىندە ەلدىڭ مۇناي يندۋسترياسىن باسقارۋعا قاتىستى داۋ-داماي شارىقتاۋ شەگىنە جەتتى. ۇلتتىق مۇناي كومپانياسى PDVSA-نى باقىلاۋدى ءوز قولىنا الۋ ارقىلى چاۆەس ۆەنەسۋەلانىڭ ەڭ قۋاتتى، ءارى ەڭ ۇلكەن اكتيۆتىڭ يەسى اتانعىسى كەلدى.

باكستوننىڭ ايتۋىنشا، چاۆەس پرەزيدەنت بولعان ساتتە-اق، ەلدەگى وپپوزيتسيا بىردەن كوتەرىلدى، سەبەبى ونىڭ ارەكەتى ەلدەگى رەجيمگە مۇلدەم ساي كەلمەيتىن.

2002 جىلى ەلدە اسكەري كوتەرىلىس بولىپ، چاۆەستى كەڭسەسىنەن قۋىپ شىقتى. ونى ارالدا ورنالاسقان اسكەري بازاعا اپاردى. وپپوزيتسيالىق كاسىپكەرلەردى بىرىكتىرەتىن ورگان - فەدەكاماراس (Fedecamaras) پرەزيدەنتى پەدرو كارمونا (Pedro Carmana) ءوزىن پرەزيدەنت ەتىپ جاريالاپ الدى.

سايلاۋدا چاۆەستى تاڭداعاندار كوشەگە كوتەرىلىسكە شىعىپ، ونى بيلىك باسىنا قايتارۋىن تالاپ ەتتى. ال 48 ساعات وتكەن سوڭ چاۆەس قايتادان ورنىنا كەلدى.

ۆەنەسۋەلا ورتالىق ۋنيۆەرسيتەتىنىڭ پروفەسسورى مارگاريتا لوپەز (Margarita Lopez): "ناعىز گولليۆۋدتىق كينو بولىپ كەتتى. چاۆەستى تۇندە ءوزىنىڭ ادامدارى تىكۇشاقپەن ۇشىپ كەلگەندە كۇتىپ الدى. سودان كەيىن ول "مەن وسىندامىن، ەندى ۇيىقتايىق. مەن قايتادان پرەزيدەنتپىن" - دەدى.

ۋگو چاۆەس 2013 جىلدىڭ 5 ناۋرىزىندا سىرقاتتان قايتىس بولدى.

“The Qazaq Times”