اۋعانستاندا سودىرلار بىرىككەن ۇلتتار ۇيىمىنىڭ قىزمەتكەرىن تۇتقىنعا الدى – دەپ حابارلايدى 1TV تەلەارناسى.

جەرگىلىكتى باق وكىلدەرىنىڭ مالىمەتىنشە، سودىرلار كابۋل قالاسىندا ساعات 6:00 شاماسىندا بۇۇ-نىڭ قىزمەتكەرى مىنگەن اۆتوكولىككە شابۋىل جاسالعان. سالدارىنان وقيعا ورنىندا كولىك جۇرگىزۋشىسى كوز جۇمىپ، بۇۇ قىزمەتكەرى مەن ونىڭ بالاسى تۇتقىنعا تۇسكەن. پوليتسيا قىزمەتكەرلەرىنىڭ حابارلاۋىنشا، ازىرگە ەشقانداي تەررورلىق ۇيىم اتالمىش وقيعانى ءوز مويىنىنا الماعان.

ەستەرىڭىزگە سالايىق، بۇعان دەيىن قاڭتار ايىنىڭ 20-سى كۇنى ءدال وسى كابۋل قالاسىندا Intercontinental Hotel قوناق ۇيىنە شابۋىل جاسالعان. ول كەزدە تەرروريستەر قولىنان 43 ادام كوز جۇمىپ، ونداعان ادام جاراقات العان. كەيىننەن وققا ۇشقاندار اراسىندا قازاقستان ازاماتى بار ەكەندىگى انىقتالعان بولاتىن.

“The Qazaq Times”