رەسمي اقوردا نۇرسۇلتان نازارباەۆتىڭ ءسوزىن كۇلكىگە اينالدىرعان بەلارۋس سىرتقى ىستەر مينيسترلىگىنە جاۋاپ بەردى.

قاڭتار ايىنىڭ 22-ءسى كۇنى قازاقستان سىرتقى ىستەر ءمينيسترىنىڭ ورىنباسارى ەرجان اشىقباەۆ جۋرناليستەر الدىندا مينسك كەلىسسوزدەرىنە قاتىستى پىكىر بىلدىرگەن. وندا ول: «ۋكرايناداعى جاعدايلاردى رەتتەۋدە مينسك كەلىسسوزدەرىنىڭ الاتىن ورنى ەرەكشە. ءبىز بۇعان ەشقانداي كۇمان كەلتىرمەيمىز جانە اتالمىش كەلىسسوزدەرگە ارالاسىپ وتىرعان جوقپىز. بىراق قازاقستان قاي ۋاقىتتا بولسىن ماسەلەنىڭ ءتۇيىنىن شەشۋگە قول ۇشىن سوزۋعا دايىن. ەگەر مۇددەلى تاراپتار  كيكىلجىڭدى شەشۋدە قازاقستاننان كومەك سۇراسا، ءبىز اتالمىش ءوتىنىشتى ءتيىستى جولدار بويىنشا قارايمىز» - دەگەن.

ەستەرىڭىزگە سالايىق، بۇعان دەيىن 19 قاڭتار كۇنى بەلارۋس سىرتقى ىستەر ءمينيسترى ۆلاديمير ماكەي: «ۋكرايناداعى جاعدايلاردى رەتتەۋگە بايلانىستى كەلىسسوزدەردى مينسكىدەن استاناعا اۋىستىرۋ ماسەلەنى شەشپەيدى. ءبىز وزگەلەرمەن سالىستىرعاندا بىتىمگەرلەر لاۆرىنىڭ ارتىنان جۇگىرىپ جۇرگەن جوقپىز» - دەپ مالىمدەگەن.

رەسمي مينسكىنىڭ اتالمىش مالىمدەمەسى نۇرسۇلتان نازارباەۆتىڭ اقش-قا ساپارىنان كەيىن ءبىر كۇننەن سوڭ جاسالعان. مينسكىنىڭ بۇنداي مالىمدەمە جاساۋىنا نازارباەۆتىڭ ۋاشينگتونعا رەسمي ءىس-ساپارى كەزىندەگى «ۋكراينا ماسەلەسىن شەشۋدە مينسك كەلىسسوزدەرى تىعىرىققا تىرەلدى» دەگەن ءسوزى سەبەپ بولعان.

“The Qazaq Times”