2018 جىلى قازاقستاندىقتاردى تەگىن ءدارى-دارمەكپەن قامتاماسىز ەتىپ،  ۆيرۋستىق گەپاتيتتى ەمدەۋ ءۇشىن 2,7 ملرد تەڭگە سوماعا 5 پرەپاراتتىڭ اتاۋى جانە ۆ ۆيرۋستىق گەپاتيتىنا قارسى ۆاكتسينا بىرىڭعاي ديستريبيۋتوردىڭ جۇيەسى ارقىلى ساتىپ الىندى. بۇل تۋرالى قر دەنساۋلىق ساقتاۋ مينيسترلىگىنىڭ ءباسپاسوز قىزمەتى حابارلادى. 

مينيسترلىكتىڭ مالىمەتىنشە ۆيرۋستىق گەپاتيتتى ەمدەۋگە ارنالعان پرەپاراتتاردىڭ قولجەتىمدىلىگى 2018 جىلى الدىڭعى جىلدارمەن سالىستىرعاندا 3,6 ەسەگە ارتقان.

ۆيرۋستىق گەپاتيتتىڭ ەمى ءۇشىن بىرىڭعاي ديستريبيۋتور جىل سايىن پەگينتەرفەرون الفا 2b جانە  ريباۆيرين پرەپارتتارىن ساتىپ الادى. بۇدان بولەك، 2018 جىلعى تەگىن دارىمەن قامتاماسىز ەتۋ تىزىمىنە  C ۆيرۋستى گەپاتيتىن ەمدەۋدىڭ زاماناۋي حاتتامالارىنا سايكەس سوفوسبۋۆير جانە داكلاتاسۆير جاڭا اتاۋلارى ەنگىزىلدى. وسى دارىلەردى جەتكىزۋدى بۇۇ دامۋ باعدارلاماسى ارقىلى جۇزەگە اسىرۋ جوسپارلانىپ وتىر.

"بيىلعى جىلى سوزىلمالى گەپاتيت B ۆيرۋستىق ينفەكتسياسىنىڭ الدىن الۋ ءۇشىن جانە ونىڭ اۋىر زارداپتارى، سونىڭ ىشىندە باۋىر تسيرروزى جانە گەپاتوكلەتكالى راكقا  445 400 دوزا ۆاكتسينا ساتىپ الىندى. بالالاردى ەرتە جاستان  ۆ ۆيرۋستىق گەپاتيتكە قارسى ۆاكتسيناتسيالاۋ ۇلتتىق ەگۋ كۇنتىزبەسىنە ەنگىزىلدى", - دەلىنگەن ءباسپاسوز حابارلاماسىندا.

“The Qazaq Times”