رەسەي سپورتشىلارىنىڭ «تاعدىرى» سپورتتىق اربيتراجدى سوتتا شەشىلەدى

2014 جىلى سوچيدە وتكەن وليمپيادا ويىندارىندا دوپينگ قولدانعان دەگەن ايىپپەن حالىقارالىق وليمپيادا كوميتەتىنىڭ شەشىمىمەن الەمدىك سپورتتىق دودالارعا قاتىسۋدان شەتتەتىلگەن رەسەيلىك سپورتشىلاردىڭ ءىسى  بۇگىننەن باستاپ، سپورتتىق اربيتراجدى سوتتا (Court of Arbitration for Sport (CAS)) قارالادى. ولار وزدەرىنە تاعىلعان ايىپ پەن ءومىر بويىنا وليمپيادا ويىندارىنا قاتىستىرىلماۋ جازاسىنىڭ كۇشى جويىلعانىن قالايدى. بۇل تۋرالى AFP اقپاراتتىق اگەنتتىگى جازدى.

الداعى وليمپيادا ويىندارى قارساڭىندا رەسەيدىڭ سپورت سالاسىنىڭ بولاشاعىن انىقتايتىن ماڭىزدى سوت وتىرىسى لوزاننادان جەنەۆاعا كوشىرىلىپ، ورتالىقتا وتەتىن بولدى. سوت تىڭدالىمىنا 39 رەسەيلىك سپورتشى قاتىسادى دەپ كۇتىلۋدە. كۋاگەرلەردىڭ قاتارىندا 2014 جىلعى سوچي وليمپياداسى كەزىندە انتيدوپينگتىك زەرتحانانى باسقارعان گريگوري رودچەنكوۆ پەن كانادالىق قورعاۋشى، اتالعان ءىس بويىنشا تاۋەلسىز زەرتتەۋ جۇرگىزگەن  ريچارد ماكلارەن بار.

اتالعان داۋ گريگوري رودچەنكوۆتىڭ رەسەيدىڭ مەملەكەتتىك دوپينگ باعدارلاماسى مەن بيلىكتىڭ تاپسىرماسىمەن ءوزى ويلاپ تاپقان اتلەتتەردىڭ اعزاسىندا انىقتالۋى قيىن، بىراق اعزاعا ۇلكەن كۇش بەرەتىن حيميالىق قوسپا تۋرالى اتىشۋلى مالىمدەمەسىنەن كەيىن باستالدى. RUSADA-نىڭ (رەسەيدىڭ انتيدوپينگتىك اگەنتتىگى) قوس بىردەي ەكس-باسشىسى قازا تاپقاننان كەيىن، اقش-قا كەتىپ قالعان گريگوري رودچەنكوۆ سوت وتىرىسىنا قاتىسپايدى. ول ارنايى ۆيدەو-بايلانىس ارقىلى كۋالىك ەتەدى.

سوت شەشىمى 29 قاڭتار مەن 2 اقپان ارالىعىندا بەلگىلى بولادى. وسىدان بۇرىن حالىقارالىق وليمپيادا كوميتەتى 2018 جىلى پيوڭچاڭدا وتەتىن قىسقى وليمپيادا ويىندارىنا قاتىسۋعا نيەتتى رەسەيلىك سپورتشىلار ارنايى تاعايىندالعان دوپينگ سىناماسىن تاپسىرىپ، قانىنان بوگدە زاتتار تابىلماسا، ءوز مەملەكەتىنىڭ ەمەس، "نەيترالدى" تۋ استىندا ونەر كورسەتە الاتىنى جونىندە مالىمدەمە جاساعان بولاتىن.

“The Qazaq Times”